Ɲanmiɛn sulɛ awlo lɔ’n: Like nga amun kwla yo naan w’a yo fɛ kpa’n

Siɛ kun m’ɔ fin Brezili’n seli kɛ: “Kɛ nnɔsua nun min nin min yi nin e mma mun é sú Ɲanmiɛn awlo lɔ’n, e koko yalɛ lelee. Sɛ m’an seman kɛ ɔ ti kpa sɔ’n, aliɛ njɛnniɛn tó e su.” Zapɔn lɔ siɛ kun i wa yasua’n le afuɛ 10. I waan kɛ ɔ nin i wa’n bé sú Ɲanmiɛn awlo lɔ’n, dɔ’n sín’n, i wa’n wunman nun. Yɛ ba’n kloman kɛ ɔ wie. ?Ngue ti ɔ? Siɛ’n waan: “Ɲanmiɛn sulɛ’n awlo lɔ’n i bo tranlɛ’n yo i fɛ.”

Kɛ awlobo wie’m bé sú Ɲanmiɛn awlo lɔ’n, nán ba ngba yɛ be klo kɛ bé trɛ́n i bo ɔ. ?Ngue ti ɔ? Togo lɔ siɛ kun seli kɛ: “Ɔ fataman kɛ Zoova i sulɛ’n, ɔ yo aɲrunkoun.” Sɛ Ɲanmiɛn sulɛ amun awlo lɔ’n yo ɲrun koun’n, atrɛkpa’n ɔ fin wafa nga amun tinngɛ aɲia’n. Ezai blɛ su wunmiɛn delɛ cɛn nun’n, Izraɛlifuɛ’m be ‘klun jɔ.’ Awlobo kpanngban be wunnin i wlɛ kɛ blɛ mɔ bé sú Ɲanmiɛn awlo lɔ’n, be klun kwla jɔ sɔ wie.​—Eza. 58:13, 14.

Siɛ sunman be seli kɛ sɛ be waan bé sú Ɲanmiɛn awlo lɔ naan ɔ yo fɛ’n, ɔ fata kɛ like suanlɛ’n yo be kwlaa be fɛ. Be flɛ siɛ kun kɛ Ralf. Ɔ le ba bla nsan nin ba yasua kun. I waan kɛ bé sú Ɲanmiɛn awlo lɔ’n, be yo i kɛ be su koko yalɛ sa. Sran kun kɛn i klun ndɛ. Sanngɛ, i sɔ yolɛ timan pɔpɔ. Niɛn kun seli kɛ: “N klo kɛ Ɲanmiɛn sulɛ e awlo lɔ’n yo fɛ. Sanngɛ ɔ ti kekle man min.” ?Kɛ ɔ yo amun sɔ wie ɔ? ?Ngue yɛ amun kwla yo naan Ɲanmiɛn sulɛ amun awlo lɔ’n w’a yo fɛ ɔ?

NÁN Ɔ TAKA LIKE SUANLƐ KUNNGBA’N SU

Alemaɲi lɔ siɛ kun le ba nɲɔn. Kun le afuɛ 9, yɛ kun le afuɛ 6. Siɛ sɔ’n waan: “E like suanlɛ’n takaman like kunngba’n su trilili.” Niɛn kun suan Natali. Ɔ le ba bla nɲɔn. Kun le afuɛ 14, yɛ kun le afuɛ 6. I waan: “Like ng’ɔ ti cinnjin kpa’n, yɛle kɛ e kacikaci like nga e suan’n.” Awlobo sunman be kpɛkpɛ be like suanlɛ blɛ’n nun. Be flɛ siɛ kun kɛ Klɛtɔn, ɔ fin Brezili. Yɛ ɔ le ba bla nɲɔn. I waan: “Kɛ e yo sɔ’n, sran ngba i wun kpɛjɛ i, yɛ like suanlɛ’n yo fɛ.” Kɛ siɛ nin niɛn’m be kpɛkpɛ like suanlɛ blɛ’n nun’n, i sɔ’n yo maan be kwla fa be ɲin sie ba’m be tinuntinun be su. Like ng’ɔ ti ba’m be tinuntinun be cinnjin’n, i su yɛ like nga bé súan’n táka ɔ.

?Ngue yɛ awlobo wie’m be yo ɔ? Wie’m be bo Ɲanmiɛn sulɛ be awlo lɔ’n i bo nin Zoova i manmanlɛ jue. Mɛksiki lɔ siɛ kun suan Kuan. Ɔ le ba yasua kun nin ba bla kun. I waan: “Kɛ e yo sɔ’n, e kwlaa e akunndan tran like nga e su wa suan’n i su, yɛ e wun kpaja e.” Like nga bé wá súan’n, i mma’m be nian su be fɛ i su jue.

Awlobo wie’m be kanngan Biblu’n nun likawlɛ. Sɛ sran fanunfanun be ijɔ akpasua nga be su wa kanngan nun’n i nun’n, be niɛn i sɔ’n su be cɛcɛ nun. Siɛ kun m’ɔ fin Zapɔn’n seli kɛ: “Laa e kannganman nun sɔ.” Sanngɛ kɛ ba’m be wun kɛ be nin be si nin be nin be kanngan Biblu’n nun likawlɛ’n, ɔ yo be fɛ. Awlo wie nun’n, be yi sa wie mɔ Biblu’n kan be ndɛ’n i su anɔ. Be flɛ siɛ kun kɛ Roze. Ɔ fin sran ble mɛn’n i ngua lɔ nvle kun nun. Yɛ ɔ le ba yasua nɲɔn. I waan: “Kɛ é yí sa kun i nglo’n, sɛ e wla fi i kpɔlɛ kun su’n, ba’m be kpɛn e wla.”

Kɛ ɔ ko yo naan Ɲanmiɛn sulɛ awlo lɔ’n w’a yoman ɲrun koun’n, awlobo’m be kwla yo ninnge wie mun ekun likawlɛ. Be kwla se kɛ bé bóbó mmeli nga Nowe boboli’n, annzɛ bé kplán Ɲanmiɛn sulɛ sua nga Salomɔn kplannin’n i wunsu. Kɛ bé kúnndɛ like sɔ’m be su ndɛ’n, be kwlaa be wun kpaja be. Azi mɛn’n nun lɔ’n, siɛ kun nin i nin’n, ɔ nin i yi’n nin be wa bla’n be tran likawlɛ. Kɛ bé sú Ɲanmiɛn awlo lɔ’n, be jaja lika nga kɛ akoto Pɔlu dí i ngaliɛ difuɛ junman’n, ɔ sinnin’n. Awlobo kun liɛ’n, be jaja lika nga Izraɛlifuɛ’m be sinnin mɔ Ezipt Lɔ Tulɛ fluwa’n kɛn i ndɛ’n. Togo lɔ ba kun suan Donal. Ɔ le afuɛ 19. I waan: “Kɛ é sú Ɲanmiɛn awlo lɔ mɔ e kacikaci like suanlɛ’n, e kwlaa e di aklunjuɛ.” ?Amun kusu, ngue yɛ amun kwla yo naan Ɲanmiɛn sulɛ amun awlo lɔ’n w’a yo fɛ kpa ɔ?

AN SIESIE AMUN WUN

Kɛ awlobo’m be kacikaci like nga bé súan’n, Ɲanmiɛn sulɛ awlo lɔ’n yo fɛ. Sanngɛ kɛ ɔ ko yo naan like suanlɛ sɔ’n w’a yo be kwlaa be ye’n, ɔ fata kɛ be siesie be wun. Wie liɛ’n, kɛ ɔ yo naan ba’m be ɲin tran like kun su’n, ɔ ti kekle. Ɔ maan, ɔ fata kɛ siɛ’n dun mmua bu like nga bé súan’n i akunndan naan ɔ siesie i wun kpa. Siɛ kun seli kɛ: “Kɛ n siesie min wun kpa’n, like suanlɛ’n yo e kwlaa e ye.” Alemaɲi lɔ siɛ kun liɛ’n, ɔ dun mmua bo like nga bé wá súan’n i su kle i awlobo’n. Benɛn lɔ siɛ kun le ba kanngan 6. Be liɛ’n, be nian DVD kun. Kwlaa naan b’a nian’n, ɔ kle ba mun kosan ng’ɔ́ wá fá úsa be’n. Nanwlɛ, kɛ e siesie e wun kpa’n, Ɲanmiɛn sulɛ awlo lɔ’n yo fɛ.

Kɛ awlofuɛ’m be kwlaa be si like nga i su yɛ be like suanlɛ’n wá táka’n, be koko su yalɛ. Ɔ maan, be wun blibli be kɛ like suanlɛ cɛn’n ju ndɛndɛ. Asa ekun’n, kɛ be man awlofuɛ’m be tinuntinun be junman kɛ be di’n, be kwlaa be wun i wlɛ kɛ Ɲanmiɛn sulɛ awlo lɔ’n ti be liɛ wie.

NÁN AN KPƐ I NUN CƐN

Kɛ awlobo’m be su Ɲanmiɛn be awlo lɔ’n, ɔ ti kpa. Sanngɛ, kɛ ɔ yo naan be yo sɔ titi’n, ɔ ti kekle man be nun sunman.

Siɛ sunman be di junman lele. I wie yɛle Mɛksiki lɔ siɛ kun liɛ’n. Kɛ ɔ kɔ junman nglɛmun dɔ nsiɛn su’n, ɔ sɛ i sin kɔnguɛ dɔ mɔcuɛ su. Wie liɛ’n, cɛn nga awlobo wie’m be su Ɲanmiɛn awlo lɔ’n i nun yɛ akpasua sunianfuɛ’n ba asɔnun’n i lika nianlɛ ɔ. Annzɛ kusu e wla kpɛnlɛ cɛn aɲia’n, ɔ tɔ be like suanlɛ cɛn. Kɛ ɔ yo sɔ’n, wie liɛ’n, ɔ fata kɛ be sie like suanlɛ’n i cɛn uflɛ.

I kwlaa yoli o, ɔ fata kɛ e mian e ɲin e su Ɲanmiɛn awlo lɔ titi. Togo lɔ ba bla kun suan Loisi, yɛ ɔ le afuɛ 11. Ɔ seli kɛ: “Kannzɛ sa wie ju naan y’a kwlá suman Ɲanmiɛn awlo lɔ dɔ nga e kleli’n su’n, sanngɛ e mian e ɲin e yo i cɛn sɔ’n nun.” I sɔ’n ti, awlobo wie’m be liɛ’n, kɛ le mɔcuɛ’n bo i bo’n yɛ be su Ɲanmiɛn be awlo lɔ ɔ. I liɛ’n, sɛ sa wie ju naan b’a kwlá yomɛn i cɛn sɔ’n nun’n, be kwla sie i cɛn uflɛ.

“Ɲanmiɛn sulɛ awlo lɔ’n” ti cinnjin kpa. I sɔ’n ti, le mɔcuɛ kwlaa nun’n, amun nin amun awlobo’n an su Zoova be ‘yi i ayɛ.’ (Oze 14:3) Maan blɛ sɔ’n nun’n, ‘aklunjuɛ ng’ɔ fin Anannganman’n, ɔ man amun fanngan’ naan amun awlobo’n i klun jɔ.​—Nee. 8:9, 10.

[Kuku, bue 29]

KƐ A NIN WƆ AWLOBO’N ÁN SÚ ƝANMIƐN AWLO LƆ’N:

Nán ɔ yo ɲrun koun

Nán ɔ taka like suanlɛ kunngba’n su

An siesie amun wun kpa

An yo i titi, nán an kpɛ nun cɛn