NDƐ NG’Ɔ KLƐ FLUWA’N SU’N | ?WAFA SƐ YƐ ƝANMIƐN BU SIKLƐTI NƆNLƐ’N NIƆN?

Wafa nga Ɲanmiɛn bu siklɛti nɔnlɛ’n

Ndɛ akpasua ng’ɔ sinnin lɛ’n nun’n, e kannin kɛ Naoko yacili siklɛti nɔnlɛ. I waan: “Kɛ n sili Ɲanmiɛn nin like ng’ɔ seli kɛ ɔ́ yó’n, yɛ n kacili min nzuɛn’n niɔn.” Ɲanmiɛn Ndɛ’n yɛ ɔ ukali Naoko ɔ. Nán kɛ Ɲanmiɛn Ndɛ’n kan siklɛti nɔnlɛ’n i ndɛ trele sa ɔ. Sanngɛ, ɔ kle e wafa nga Ɲanmiɛn bu siklɛti nɔnlɛ’n.a Ɲanmiɛn Ndɛ’n ukali sran kpanngban kpa naan b’a yaci siklɛti nɔnlɛ’n. (2 Timote 3:16, 17) Siklɛti nɔnlɛ’n ti’n, ɲrɛnnɛn sa wie mun be ju sran’m be su. Ndɛ akpasua nga nun’n, é wá kán sa sɔ’m be nun nsan be ndɛ. Kpɛkun, é wún be su ndɛ nga Biblu’n kan’n.

SIKLƐTI NƆNLƐ’N I YACILƐ TI KEKLE

Like kun o asra’n nun’n, ɔ ti tuun kɛ gudrɔn sa. I yɛ ɔ ti asra’n i ta’n niɔn. Asra’n i ta sɔ’n ti’n, kɛ sran’n nɔn siklɛti’n, ɔ yo i kɛ w’a ɲan wunmiɛn sa. Ɔ maan, siklɛti nɔnlɛ’n i yacilɛ’n ti kekle. Kɛ sran kun nɔn siklɛti’n, asra’n i ta’n wlu i ti’n nun ndɛndɛ kpa. Ɔ maan, be nga cɛn kwlaa be nɔn siklɛti kpo kun’n, asra’n i ta ng’ɔ wlu be wunnɛn nun’n ɔ timan kaan. I sɔ’n ti’n, siklɛti nɔnlɛ’n i yacilɛ’n ti kekle kpa. Kɛ sran kun bo siklɛti nɔnlɛ bo’n, ɔ kaci i kanga. Ɔ maan, sɛ ɔ ɲanman wie nɔnman’n, i wun yrɛyrɛ i.

Biblu’n nun ndɛ’n tike e ɲin. Ɔ maan, e wun i wlɛ kɛ siklɛti nɔnlɛ’n ti like tɛ. Ɔ se kɛ: “?An si-man kɛ sɛ an fa amun wun man sran kun bɔ an kaci i sran’n bɔ amun nyin yi i’n, wuun an ti i kanga?” (Rɔmfuɛ Mun 6:16) Kɛ sran kun fa siklɛti nɔnlɛ’n saci i akunndan’n, ɔ kaci siklɛti nɔnlɛ’n i kanga. Ɲanmiɛn Zoova kunndɛ kɛ e wla sa ng’ɔ saci sran’n ɔ nin akunndan tɛtɛ’n be ase. (Jue Mun 83:18; 2 Korɛntfuɛ Mun 7:1) Kɛ sran kun si Zoova, ɔ wun i wlɛ kɛ ɔ fata kɛ ɔ tu i klun su i. Sɛ ɔ ti sa tɛ yolɛ i kanga’n, ɔ su kwlá yoman sɔ. I sɔ’n ti, ɔ miɛn i ɲin wla sa tɛ yolɛ’n i ase.

Be flɛ bian kun kɛ Olaf. Ɔ fin Alemaɲi. Ɔ nɔnnin siklɛti lele afuɛ 16. Kɛ ɔ́ bó i nɔnlɛ bo’n, nn ɔ le afuɛ 12. I waan kɛ ɔ́ nɔ́n i siklɛti klikli’n, ɔ buli i ngowa kanlɛ like. Sanngɛ i sin’n, ɔ wa kacili siklɛti nɔnlɛ’n i kanga. Afin cɛn kun’n, i konvi sɔli siklɛti nɔnlɛ. Kɛ m’ɔ ɲanman wie’n ti’n, ɔ isali siklɛti ng’ɔ dun mmua nɔnnin be’n be buebue’n. Ɔ kpukpuli be nun asra ng’ɔ ka’n, ɔ fa guali fluwa kan su. Kpɛkun, ɔ ɲɔnɲɔnnin i naan w’a sɔ i nuan w’a nɔn. Kɛ ɔ yoli sɔ’n, ɲannzuɛn kunnin i kpa. Kɛ ɔ́ kɔ́ i ɲrun’n, ɔ yacili siklɛti nɔnlɛ. ?Ngue ti ɔ? I waan: “Like cinnjin kpa nga ti yɛ n yacili siklɛti nɔnlɛ’n, yɛle kɛ n kunndɛli kɛ Zoova klun jɔ min wun. Zoova ti sran klofuɛ, ɔ fa ninnge kpa mun sie e ɲrun kɛ e ɲan be. I sɔ mɔ n wunnin i wlɛ’n, ɔ mannin min wunmiɛn naan m’an wla nzuɛn tɛ sɔ’n i ase.”

SIKLƐTI NƆNLƐ’N MAN TUKPACƐ

Fluwa kun m’ɔ kan asra’n i su ndɛ’n seli kɛ: “Siklɛti nɔnlɛ’n ɔ saci sran’n i wunnɛn wunmuan’n. Kpɛkun sran’n tɔ tukpacɛ ndɛndɛ yɛ ɔ wu.” Sran kwlaa si kɛ sran ng’ɔ nɔn siklɛti’n, ɔ kwla ɲan awlɛn ba ya nin afɔkɔ nun kannin, ɔ nin tukpacɛ wie mun ekun. Tukpacɛ sɔ’m be saman. Sanngɛ, anuannzɛ ng’ɔ nian mɛn wunmuan’n nun sran’m be ayre yolɛ’n su’n, ɔ seli kɛ siklɛti nɔnlɛ’n man tukpacɛ wie mɔ be sa sran ɔ. Tukpacɛ sɔ’n kun yɛle tanngɔ ufue’n.

Ɲanmiɛn Zoova se e kɛ e bu e wunnɛn’n nin e nguan’n, be like. Yɛ maan e akunndan’n tran like ng’ɔ ti kpa’n i su. Ndɛ kun mɔ i Wa Zezi kannin’n, ɔ kle sɔ weiin. Ɔ seli kɛ: “Klo ɔ Min Nyanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su.” (Matie 22:37) Nanwlɛ, Zoova kunndɛ kɛ e si nanti. Ɔ kunndɛman kɛ e saci e wunnɛn’n. Kɛ e si Zoova mɔ e si like ng’ɔ se kɛ ɔ́ yó be’n, e klo i kpɛkun e si ye. Ɔ maan, sa kwlaa ng’ɔ saci sran’n, e ɲan wunmiɛn e wlɛ i ase.

Ble flɛ Ɛndi lɔ dɔɔtrɔ bian kun kɛ Elis. Ɔ nɔnnin siklɛti lele afuɛ 38. I waan: “N wunnin i dɔɔtrɔ fluwa’m be nun kɛ siklɛti nɔnlɛ’n ti like tɛ. N si kɛ ɔ saci sran. Be nga n yo be ayre’n, n se be kɛ be yaci siklɛti nɔnlɛ. M bɔbɔ mɔ n kan sɔ’n, m miannin min ɲin kpɛ sunman kɛ ń yáci siklɛti nɔnlɛ. Sanngɛ, ɔ yoman ye.” Kɛ ɔ́ kɔ́ i ɲrun’n, Elis wa yacili siklɛti nɔnlɛ’n. ?Ngue ti yɛ ɔ kwla yacili i nɔnlɛ ɔ? I waan: “N suannin Biblu’n nun like. N kunndɛ kɛ Zoova klun jɔ min wun. I sɔ’n mannin min wunmiɛn maan n wlali siklɛti nɔnlɛ’n i ase.”

Ɔ MAN BE NGA BE NƆNMAN’N BE TUKPACƐ WIE

Siklɛti wɛnsrɛn’n, ɔ yo be nga be nɔnman siklɛti’n be tɛ wie. Yɛle kɛ, ɔ kwla man be afɔkɔ’n nun kannin nin tukpacɛ uflɛ ekun. Afuɛ kwlaa nun’n, siklɛti wɛnsrɛn’n kun sran 600.000 mɔ be nɔnman siklɛti wie’n. Bla nin bakanngan mun yɛ ɔ kun be dan lika ɔ. Anuannzɛ ng’ɔ nian mɛn wunmuan’n nun sran’m be ayre yolɛ’n su’n waan: “Siklɛti wɛnsrɛn ng’ɔ gua sran kun su’n, sɛ ɔ ti kaan annzɛ ɔ ti dan o, ɔ ti tɛ.”

Zezi seli kɛ e klo e wiengu. E wiengu mun yɛle e awlofuɛ mun nin e janvuɛ mun, ɔ nin sran kwlaa. E wiengu klolɛ’n yɛ ɔ ti Ɲanmiɛn mmla’n i nun dan’n, i nɲɔn su niɔn’n. ?Sɛ like nga e yo’n saci e wiengu’n, e wiengu klolɛ yɛle i sɔ’n? Sran ng’ɔ klo i wiengu’n, ɔ nanti Biblu’n nun afɔtuɛ nga su: “Nán maan sran fi bu i bɔbɔ wun akunndan, sanngɛ maan ɔ bu i wiengu akunndan.”​—1 Korɛntfuɛ Mun 10:24.

Be flɛ bian kun kɛ Armɛn. Abloki lɔ akpasua nga be flɛ i Armeni’n, lɔ yɛ ɔ tran ɔn. I waan: “Min osufuɛ’m be seli min titi kɛ n yaci siklɛti nɔnlɛ naan ɔ kwla man be tukpacɛ. Sanngɛ kɛ be kan sɔ’n, m bumɛn i nanwlɛ.” Kɛ ɔ́ kɔ́ i ɲrun’n, Armɛn yacili siklɛti nɔnlɛ. I waan: “Kɛ n suannin Biblu’n nun like’n, n kloli Zoova kpa. Ɔ maan n yacili siklɛti nɔnlɛ. N wunnin i wlɛ kɛ siklɛti nɔnlɛ’n saci min. Kpɛkun, ɔ saci sran uflɛ wie.”

SRAN FI SU NƆNMAN SIKLƐTI KUN

Biblu’n nun like mɔ Olaf nin Elis, ɔ nin Armɛn be suannin’n ti’n, be wunnin i wlɛ kɛ siklɛti nɔnlɛ’n ɔ saci be bɔbɔ ɔ nin sran uflɛ. Sanngɛ, nɛ́n i sɔ mɔ be wunnin wlɛ’n, i ngunmin ti yɛ be yacili i nɔnlɛ ɔ. Like nga ti yɛ be yacili’n, yɛle kɛ be klo Zoova yɛ be kunndɛ kɛ i klun jɔ be wun. 1 Zan 5:3 waan: “Nyanmiɛn i klolɛ’n yɛlɛ kɛ e fɛ i ndɛ’n su, i ndɛ sɔ’n i su falɛ’n yo-man ya.” I yo, Ɲanmiɛn i mmla’m be su falɛ’n kwla yo kekle cɛn kunngun. Sanngɛ, sɛ e klo Ɲanmiɛn kpa sakpa’n, é mían e ɲin é fɛ́ i mmla’m be su.

Kɛ é sé yɛ’n, Ɲanmiɛn Zoova maan be su kle sran’m be like asiɛ wunmuan’n su. Ɔ maan, sran kpanngban kpa be wla siklɛti nɔnlɛ’n i ase mlɔnmlɔn. (1 Timote 2:3, 4) Zoova sieli i Wa Zezi Klist Famiɛn ɲanmiɛn su lɔ. Ɔ ka kan’n, ɔ́ wá núnnún siklɛti aata difuɛ’m be kwlaa. Ɔ maan, sran fi su nɔnman siklɛti kun. Sran kwlaa nga be nanti Ɲanmiɛn i mmla’m be su’n, be su tɔman tukpacɛ kun. Afin fɔ su tranman be nun kun.​—Ezai 33:24; Sa Nglo Yilɛ 19:11, 15.

Sɛ amun su kpli kpa kɛ amún yáci siklɛti nɔnlɛ’n, nán amun sa sin bubu amun. Amun suan Zoova i su ndɛ naan amun klo i. Kpɛkun wafa nga ɔ bu siklɛti nɔnlɛ’n, amun bu i sɔ wie. I liɛ’n, amún ɲán wunmiɛn bé yáci siklɛti i nɔnlɛ’n. Zoova i Lalofuɛ’m be klo kɛ bé úka amun naan amun a si Ɲanmiɛn i mmla mun naan amun a fa be su. Nanwlɛ, sɛ amun kunndɛ kɛ amún yáci siklɛti’n i nɔnlɛ sakpa’n, Zoova su yiman amun ase. Ɔ́ súan amun bo. Ɔ maan, amún ɲán wunmiɛn wlá siklɛti nɔnlɛ’n i ase.​—Jue Mun 121:2.

[Ja ngua lɛ ndɛ’n]

[Ndɛ kwle, bue 4]

“Sɛ an fa amun wun man sran kun bɔ an kaci i sran’n bɔ amun nyin yi i’n, wuun an ti i kanga.”​—Rɔmfuɛ Mun 6:16.

[Ndɛ kwle mun, bue 5]

?Sɛ a kaci siklɛti nɔnlɛ’n i kanga’n, á kwlá sé kɛ ɔ ɲin yi Ɲanmiɛn sakpa?

“Klo ɔ Min Nyanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su.”​—Matie 22:37.

?Sɛ a nɔn siklɛti a saci ɔ wunnɛn’n, á kwlá sé kɛ a klo Ɲanmiɛn naan ɔ ɲin yi i sakpa?

[Ndɛ kwle mun, bue 6]

“Klo ɔ wiengu kɛ a fa klo ɔ bɔbɔ wun’n sa.”​—Matie 22:39.

?Sɛ like nga a yo’n, ɔ saci ɔ osufuɛ mun nin sran uflɛ’n, á kwlá sé kɛ a klo wɔ wiengu sakpa?