FLUWA NUN KANNGANFUƐ’M BE USA KƐ...
?Wan yɛ ɔ yili Ɲanmiɛn ɔn?
Cɛn kun’n, siɛ kun nin i wa yasua kan’n, be o lɛ bé kókó yalɛ. Ba’n le afuɛ nso. Siɛ’n seli i kɛ: “Ɔ fin laa kpa’n, Ɲanmiɛn yili asiɛ’n, ɔ nin i su ninnge’n kwlaa. Kpɛkun, ɔ yili wia’n, ɔ nin anglo ba’n nin nzraama mun.” Bakan’n jrannin kouun, kpɛkun ɔ usɛli i si kɛ: “?Baba, yɛ wan yɛ ɔ yili Ɲanmiɛn bɔbɔ ɔ?”
Siɛ’n tɛli i wa’n su kɛ: “Sran fi w’a yiman Ɲanmiɛn. Ɔ o lɛ titi.” Ba’n w’a siman ndɛ’n i su tɛlɛ sɔ’n i su akplowa. Sanngɛ kɛ ɔ́ ɲín’n, ɔ usɛli i wun titi kɛ: ‘?Sɛ sran kun yɛ ɔ yili ninnge kwlaa’n, naan nglo nin asiɛ’n bɔbɔ sran kun yɛ ɔ yili be’n, wan yɛ ɔ yili Ɲanmiɛn ɔn?’
?Wafa sɛ yɛ Biblu’n tɛ kosan sɔ’n su ɔ? Ndɛ nga siɛ’n kan kleli i wa’n, i wie yɛ Biblu’n kan ɔn. Moizi seli Ɲanmiɛn kɛ: “Min Min, [...] I sin naan b’a wun oka mun mɛn’n nun’n, naan mɛn’n bɔbɔ w’a bo i bo’n, wuun a ti Nyanmiɛn, á ká sɔ tititi.” (Jue Mun 90:1, 2) Ɲanmiɛn nuan Ijɔfuɛ Ezai kusu seli kɛ: “?Amun si-man sɔ? ?B’a kan kle-man amun? Anannganman Nyanmiɛn b’ɔ ti adudua’n yɛ ɔ yili asiɛ’n kɛ ɔ fɛ i bue kun su lele fa ju i bue kun su lɔ nin-ɔn.” (Ezai 40:28) Zidi kannin kɛ Ɲanmiɛn “ti kpli, yɛ ɔ kwla sa’n kwlaa yo.”—Zid 25.
Ndɛ sɔ’m be kle kɛ Ɲanmiɛn ti “famiɛn b’ɔ ti anannganman’n.” I sɔ yɛ Pɔlu kannin ɔn. (1 Timote 1:17) Yɛle kɛ, Ɲanmiɛn o lɛ titi. Yɛ ɔ́ ká lɛ tititi. (Sa Nglo Yilɛ 1:8) I ti yɛ be se kɛ like fi nunmɛn i sin’n niɔn.
?Ngue ti yɛ ndɛ sɔ’n i wlɛ wunlɛ’n ti kekle man e ɔ? Yɛle kɛ e klɔ sran mun’n, e nguan ɲanman’n ti tika. I sɔ’n ti, wafa nga e ka blɛ’n, ɔ nin Ɲanmiɛn liɛ’n timan kun mlɔnmlɔn. Kɛ mɔ Ɲanmiɛn ti anannganman’n ti’n, afuɛ akpi ti i ɲrun cɛn ba kun. (2 Piɛr 3:8) Maan e fa sunnzun ase kun e nian. Kakaa nga be flɛ i lalo’n, sɛ be waan w’a cɛ o, yɛle cɛn 50. ?Sɛ kakaa sɔ’n wun sa wlɛ naan be se i kɛ klɔ sran’m be kwla di afuɛ 70 annzɛ afuɛ 80, ɔ́ wún i wlɛ? Cɛcɛ. Ɲanmiɛn Ndɛ’n kusu waan e ti kɛ lalo sa Ɲanmiɛn ɲrun. E ngwlɛlɛ’n jumɛn i liɛ’n nun kaan sa. (Ezai 40:22; 55:8, 9) I sɔ’n ti, sɛ Zoova i wun ndɛ wie o lɛ naan e wunmɛn i wlɛ’n, ɔ boman e nuan.
Kɛ be se kɛ Ɲanmiɛn ti anannganman’n, i wlɛ wunlɛ kwla yo kekle man e. Sanngɛ, i sɔ’n nin Ɲanmiɛn fata. Sɛ sran kun yɛ ɔ yili Ɲanmiɛn’n, nn sran sɔ’n yɛ ɔ ti like yifuɛ’n niɔn. Kusu’n, Biblu’n waan Zoova yɛ ɔ “yili like’n kwlaa-a.” (Sa Nglo Yilɛ 4:11) Ninnge kwlaa sɔ’m be boli be bo blɛ kun nun. (Bo Bolɛ 1:1, 2) ?Wan yɛ ɔ boli be yilɛ bo ɔ? I nun nga ninnge sɔ’m be nunman lɛ’n, nn Ɲanmiɛn o lɛ. Ɔ maan, Ɲanmiɛn yɛ ɔ kwla yili be ɔ. Ɔ yili i Wa kpɛn’n, ɔ nin anzi mun nin sran mun. (Zɔb 38:4, 7; Kolɔsfuɛ Mun 1:15) I sɔ’n kle kɛ blɛ kun nun’n, Ɲanmiɛn i ngunmin yɛ ɔ o lɛ ɔ. Sran fi w’a yimɛn i.
E bɔbɔ, ɔ nin nglo lɔ nin asiɛ’n be su ninnge’n kwlaa be kle weiin kɛ Ɲanmiɛn o lɛ titi. Ɲanmiɛn yɛ ɔ yili ninnge’n kwlaa ɔ. I yɛ ɔ kpɛli mmla ng’ɔ sie ninnge sɔ mun’n niɔn. Ɲanmiɛn ti anannganman. Ɔ maan, i kunngba cɛ yɛ ɔ kwla yili ninnge mun ɔn.—Zɔb 33:4.