Fluwa nun kannganfuɛ’m be usa kɛ...

?Sran kun yɛ ɔ boli Ɲanmiɛn ɔn?

▪ Biblu’n tɛ su kɛ sran fi w’a boman Ɲanmiɛn. Ɲanmiɛn ti anannganman. Atrɛkpa’n, ndɛ sɔ’n i wlɛ wunlɛ’n kwla yo kekle man e. Sanngɛ nɛ́n i sɔ’n ti yɛ é sé kɛ ɔ timan nanwlɛ ɔ.

Sran fi kwlá seman kɛ ɔ wun ninnge kwlaa nga Ɲanmiɛn yo be’n, be wlɛ. Sran ng’ɔ bu i sɔ’n, nanwlɛ ɔ su lɛkɛ i wun. Akoto Pɔlu kannin kɛ: “Eee, Nyanmiɛn ti anyanbeunfuɛ o! Ɔ si ngwlɛlɛ o! Ɔ si sa’n kwlakwla kpan! ?Wan yɛ ɔ si i klun lɔ akunndan nin-ɔn? ?Wan yɛ ɔ wun sa ng’ɔ yo be’n be wlɛ-ɔ?” (Rɔmfuɛ Mun 11:33) Ngwlɛlɛ nin sa nga Ɲanmiɛn si be’n, be tra e kpɛn. E kwlá wunman be ngba’n be wlɛ. I kunngba’n yɛle bakanngan mun. Be kwlá wunman ninnge kwlaa nga be si annzɛ be nin yo’n, be wlɛ. Ɲanmiɛn i ngwlɛlɛ nin i aunnvuɛ m’ɔ si’n mɔ be ti be liɛ ngunmin’n, be ndɛ yɛ Ɲanmiɛn maan Pɔlu kannin ɔn. Sanngɛ ndɛ sɔ’n maan e wun i wlɛ kɛ sran’n i wafa nga Ɲanmiɛn Zoova ti’n, ɔ nin ninnge nga ɔ yo be’n, be tra e kpɛn. Ɔ maan, Ɲanmiɛn mɔ be se kɛ ɔ o lɛ tititi naan sran fi w’a bomɛn i’n, ɔ tra e kpɛn wie. Sanngɛ, e kwla fa e wla’n gua ndɛ nga Biblu’n kɛn i Ɲanmiɛn su’n, i su. Zezi Klist kannin ndɛ ng’ɔ o Ɲanmiɛn ndɛ’n nun’n, i ndɛ seli kɛ: “Ɔ ndɛ’n ti nanwlɛ.”—Zan 17:17.

Moizi srɛli Zoova kɛ: “I sin naan [...] mɛn’n bɔbɔ w’a bo i bo’n, wuun a ti Nyanmiɛn, á ká sɔ tititi.” (Jue Mun 90:2) Ndɛ nga Moizi kɛnnin i lɛ’n, ɔ fa e ɲin sie i like nɲɔn su. I klikli’n yɛle kɛ Ɲanmiɛn trán lɛ tititi. Zoova ti sran ‘b’ɔ o lɛ titi’ ɔ. (Sa Nglo Yilɛ 4:10) Ɔ maan, Ɲanmiɛn ká lɛ lele anannganman. Ndɛ’n i nɲɔn su’n, yɛle kɛ i sin naan like kwlaa w’a bo i bo’n nn ɔ o lɛ. I sɔ’n kle kɛ sran fi w’a bomɛn i.

Sɛ Ɲanmiɛn kunngba yɛ be flɛ i ‘Famiɛn b’ɔ ti anannganman’n, b’ɔ wu-man’n,’ e kwla se kɛ i sɔ’n nin i fata klanman. (1 Timote 1:17) Amun e bu ndɛ nga i akunndan kan e nian. Sɛ Zezi Klist nin anzi beblebe nga be o ɲanmiɛn su lɔ’n, ɔ nin klɔ sran mɔ be o asiɛ’n su wa’n, be ɲannin nguan’n, ɔ fin sran kun. (Kolɔsfuɛ Mun 1:15, 16) Sanngɛ Ɲanmiɛn liɛ’n w’a yoman sɔ. Sɛ e waan saan fi naan sran kun yɛ ɔ boli Ɲanmiɛn’n, i sɔ’n ti e wun yalɛ klelɛ ngbɛn. Ɔ ti kɛ e su kunndɛ kɛ é sí sran ng’ɔ boli sran ng’ɔ boli like kwlaa’n sa. Zoova kunngba liɛ’n, “ɔ o lɛ tititi.”—Daniɛl 6:27.

Nán kɛ Ɲanmiɛn leman bo bolɛ’n ti yɛ é sé kɛ e kleman e wun yalɛ e suɛnmɛn i su like ɔ. Sɛ e fa e ɲin e sie i srɛlɛ mɔ Moizi srɛli Ɲanmiɛn su’n, e wun i kɛ, kɛ mɔ Ɲanmiɛn o lɛ anannganman’n ti’n, nda nga ɔ tɛli i kɛ é ɲán anannganman nguan’n, e kwla lafi su. Ɲanmiɛn timan kɛ ninnge nga be o asiɛ’n su wa mɔ kɛ ɔ yo kaan nn b’a wu’n sa. Sanngɛ be waan ‘kɛ ɔ fɛ i e nannan’m be blɛ su lele b’ɔ́ jú e blɛ liɛ’n su yɛ’n, ɔ yoli e fiawlɛ tititi.’ Zoova ti siɛ kpa m’ɔ klo i sufuɛ mun ɔn. Ɔ yoli i sɔ laa, ɔ yo sɔ andɛ, yɛ ɔ́ yó sɔ tititi. Maan nanwlɛ ndɛ fɛfɛ sɔ’n, ɔ wla e fanngan!—Jue Mun 90:1.