Siɛ nin niɛn mun an ta amun mma’m be kpa

“Nian ɔ nnɛn’m be lika kpa, nian be su kpa.”​—NYA. 27:23.

?WAFA SƐ YƐ AMÚN TƐ́ SU Ɔ?

?Sɛ é kwlá sé’n, wafa sɛ yɛ siɛ nin niɛn’m be di junman kɛ bua sunianfuɛ sa ɔ?

?Wafa sɛ yɛ siɛ nin niɛn’m be kwla kle be mma’m be like naan b’a su Zoova ɔ?

?Wafa sɛ yɛ Ɲanmiɛn sulɛ awlo lɔ’n, ɔ yoli ba wie’m be ye ɔ?

1, 2. (a) ?Junman benin yɛ laa Izraɛli lɔ bua sunianfuɛ’m be di ɔ? (b) ?Sɛ é kwlá sé’n, wafa sɛ yɛ siɛ nin niɛn’m be di junman kunngba sɔ’n wie ɔ?

LAA Izraɛli lɔ bua sunianfuɛ’m be ɲanman be ti kaan sa. Wawa nun o, ayrɛ blɛ nun o, be tran be bua’m be wun. Be sasa be bua mun naan nnɛn wlɛfuɛ’m b’a diman be, annzɛ sran’m b’a wuaman be. Asa ekun’n, be fa be ɲin sie be bua’m be su kunngunngun. Be yo i sɔ tikatika. Ɔ maan, bua ng’ɔ kpinndinman’n, be wun i be yo i ayre. I li bua ba mun yɛ bua tafuɛ’m be nian be lika kpa ɔ. Afin be ja nin a tinman.​—Bob. 33:13.

² Klistfuɛ nga be ti siɛ nin niɛn’n, sɛ é kwlá sé’n, junman nga bua sunianfuɛ’m be di’n i wie yɛ be di ɔ. Ɔ fata kɛ be nian be mma’m be su, yɛ be “ta be kpa e Min’n liɛ’n su, yɛ [be] tu be fɔ.” (Efɛ. 6:4) Junman dan kpa yɛ Ɲanmiɛn fa mannin siɛ nin niɛn mun lɛ ɔ. Afin, Satan fa sa tɛ yolɛ’n sie i ba’m be ɲrun cɛn kwlakwla. Kpɛkun ba’m be bɔbɔ’n, fɔ’n o be nun. Ɔ maan, be ɲin o like nga gbanflɛn annzɛ talua konvi sɔ i’n i sin. (2 Tim. 2:22; 1 Zan 2:16) ?Siɛ nin niɛn mun, ngue yɛ amún yó naan amun a uka amun mma mun ɔn? Ɔ fata kɛ amun yo like nsan. Yɛle kɛ amun nian be lika, amun fa Ɲanmiɛn ndɛ’n kle be, yɛ amun kle be atin kpafuɛ’n. Like nsan sɔ’n yɛ like suanlɛ nga wá yíyí nun ɔn.

AN NIAN BE LIKA

3. ?Ngue yɛ siɛ nin niɛn’m bé yó naan b’a nian be mma’m be lika kpa ɔ?

³ Bua sunianfuɛ kpa’n, ɔ fɛ i ɲin sie i bua’m be su kunngunngun. I liɛ’n, ɔ wun bua ng’ɔ timan juejue’n i wlɛ. Ɲanmiɛn Ndɛ’n se kɛ: “Nian ɔ nnɛn’m be lika kpa, nian be su kpa.” (Nya. 27:23) Siɛ nin niɛn mun, sɛ é kwlá sé’n, like kunngba’n yɛ ɔ fata kɛ amun yo ɔ. Ɔ fata kɛ amun ɲin tran amun mma’m be ayeliɛ’n i su kpa. Kpɛkun, wafa nga sa kun yo be’n, ɔ nin akunndan nga be bu’n, amun wun be wlɛ wie. I sɔ’n ti’n, ɔ fata kɛ amun nin amun mma’m be koko yalɛ titi.

4, 5. (a) ?Ngue yɛ siɛ nin niɛn’m be kwla yo naan be mma’m b’a kan be klun ndɛ b’a kle be ɔ? (An nian foto ng’ɔ o kan like suanlɛ’n bo i bo lɛ’n.) (b) ?Ngue yɛ amun bɔbɔ amun yoli naan amun mma’m b’a kan be klun ndɛ b’a kle amun ɔn?

⁴ Kɛ ba’m bé ɲín’n, siɛ nin niɛn wie’m be waan kɛ ɔ yo naan be nin be koko yalɛ’n, ɔ ti kekle. Afin, ba’m be kanman be klun ndɛ kleman be. ?Sɛ amun wun kɛ amun wa’n ɔ yo sɔ’n, ngue yɛ amun kwla yo ɔ? Nán an se kɛ amún trɛ́n i ase, naan amún míɛn i kɛ ɔ kɛn i klun ndɛ kle amun. Sanngɛ amun nin ba’n be yo ninnge mun likawlɛ. (Mml. 6:6, 7) I wie yɛle kɛ, amun nin i be kwla kɔ wlanwlanlɛ. Amun nin i be kwla kan ngowa, yɛ amun nin i be yo awlo lɔ ninnge mun. Kɛ amun nin i bé yó sɔ mɔ amun nin i bé íjɔ’n, i wun kwla kpɛjɛ i. Ɔ maan, ɔ kwla kɛn i klun ndɛ kle amun.

⁵ ?Sɛ amun yoli i kwlaa sɔ’n naan amun wa’n wo i osu kunngba’n nun’n nin? I lɛ’n nun’n, amun fa ajalɛ uflɛ. Wienun ɔn, amun kunndɛ kɛ amún sí ninnge nga amun wa’n yoli be’n. I lɛ’n nun’n, nán amun usɛ i trele kɛ ɔ kan. Sanngɛ, amun bɔbɔ amun dun mmua kan ninnge nga amun yoli be cɛn sɔ’n nun’n, be ndɛ kle i. I liɛ’n, i wun kpɛ́jɛ i. Ɔ maan, ɔ́ kɛ́n i liɛ’n klé amun. Sɛ kusu amun kunndɛ kɛ amún sí sa wie i su akunndan ng’ɔ bu’n, nán maan ɔ yo kɛ amun su sɛ i be nian sa. Sanngɛ, amun usɛ i wafa nga i janvuɛ’m be bu sa sɔ’n. Kpɛkun, amun usɛ i afɔtuɛ ng’ɔ kwla fa mɛn i janvuɛ mun sa sɔ’n su’n.

6. ?Ngue yɛ amún yó naan amun mma’m b’a wun kɛ amun like yolɛ yoman ya naan be kwla kan be klun ndɛ kle amun ɔn?

⁶ Sɛ amun mma’m be wun kɛ amun ɲanman amun ti naan amun like yolɛ yo ya’n, be su kanman be klun ndɛ be kleman amun. ?Ngue yɛ amún yó naan amun mma’m b’a wun kɛ amun like yolɛ yoman ya, naan be kwla kan be klun ndɛ be kle amun ɔn? Yɛle kɛ, nán amun se amun wa’n i ngbɛn kɛ: “Sɛ ndɛ wie o lɛ’n, kan kle min.” Amun mma’m be kunndɛ kɛ ndɛ nga bé kán klé amun’n, ɔ yo amun cinnjin. Kusu’n, ɔ fataman kɛ amun fa yo ndɛ be kpankpan be su. Siɛ nin niɛn sunman be kle ajalɛ klanman kpa i lɛ’n nun. Be flɛ talua kun m’ɔ le afuɛ blu nin ngwlan’n kɛ Keila. Ɔ seli kɛ: “N kan min klun ndɛ kwlaa n kle min si. Ɔ kpaloman min nuan ndɛ. Ɔ buman min fɔ. Ɔ sie i su kpa min nuan bo. Kpɛkun, ɔ man min afɔtuɛ kpa titi.”

7. (a) ?Kɛ siɛ annzɛ niɛn kun, ɔ nin i wa’n bé kán bla annzɛ bian jalɛ’n i su ndɛ’n, wafa sɛ yɛ ɔ kwla kɛn i ngwlɛlɛ su ɔ? (b) ?Ngue yɛ siɛ annzɛ niɛn kun yó naan w’a bemɛn i wa’n i awlɛn ɔn?

⁷ Ndɛ wie’m be o lɛ’n, be su yalɛ kokolɛ’n timan pɔpɔ. I wie yɛle bla annzɛ bian jalɛ ndɛ’n. Sɛ amun nin amun wa’n be su koko i su yalɛ’n, nán amun kan aja’n i nun afɛ’n i ngunmin i ndɛ. Sanngɛ, amun fa amun wa’n i ɲin sie ajalɛ kpa ng’ɔ kwla fa’n i su. Maan e fa sunnzun ase kun e nian. Wienun ɔn, amun a wɔ aliɛ tɔnwlɛ kun nun aliɛ dilɛ. Kpɛkun, tukpacɛ nga aliɛ nga be tɔn i lɔ’n, ɔ kwla man amun’n, be ndɛ yɛ be kan kle amun ɔn. ?I lɛ’n nun’n, ngue yɛ amún yó ɔ? Nanwlɛ, amún kɔ́ aliɛ dilɛ lika uflɛ. I kunngba’n niɔn. Sɛ aja’n i nun afɛ’n i ndɛ ngunmin yɛ amun kan kle amun wa’n, i sɔ’n kwla be i awlɛn. Ɔ maan, ɔ́ kó úsa sran uflɛ i ngwlɛlɛ afɛ. (An kanngan Kolɔsfuɛ Mun 3:21 nun.) I sɔ’n ti’n, amun kan ndɛ’n i ngwlɛlɛ su kle amun wa’n. Be flɛ talua kaan kun kɛ Emili. I waan: “Kɛ min si nin min nin be nin min kókó bian jalɛ’n i su yalɛ’n, be wlaman min srɛ. Sran nga be si i mɔ be jɛ i’n i su aklunjuɛ nga be di’n, i su yɛ be fa min ɲin sie ɔ. Ɔ maan kɛ ń kɛ́n i sɔ ndɛ ń klé be’n, srɛ kunman min. I kpa bɔbɔ’n, sran kwlaa ng’ɔ kunndɛ kɛ ɔ nin min sán nun’n, m bo su n kle be. N fiaman ndɛ fi su be wun.”

8, 9. (a) ?Kɛ siɛ nin niɛn’m be tra be awlɛn be sie be su be wa’n i nuan bo’n, wafa sɛ yɛ i bo gua ɔ? (b) ?Kɛ amun bɔbɔ amun sieli amun su amun mma’m be nuan bo’n, wafa sɛ yɛ i bo guali ɔ?

⁸ Kɛ amun mma’m bé kán ndɛ klé amun’n, an tra amun awlɛn be sie be su kpa be nuan bo. I lɛ’n nun yɛ amún klé kɛ amun like yolɛ yoman ya ɔ. (An kanngan Zak 1:19 nun.) Be flɛ bla kun kɛ Ketia. I ngunmin yɛ ɔ tɛ i wa’n niɔn. Ɔ seli kɛ: “Laa’n, n siman min awlɛn tra. Kɛ min wa bla’n ɔ kan ndɛ kle min cɛ’n, nn m’an plan. Wie liɛ’n, afɛ m’ɔ o min su’n ti yɛ n yo sɔ ɔ. Wie liɛ kusu’n, ijɔlɛ yoman min fɛ. Siɛn’n, n yoman sɔ kun. Min wa’n kusu w’a kaci i nzuɛn’n wie. Ɔ maan, e koko yalɛ kpa siɛn’n.”

⁹ Be flɛ siɛ kun kɛ Rolan. I wa bla’n le afuɛ 16. I waan: “Kɛ min wa’n seli min kɛ ɔ su klo i suklu lɔ ba kun’n, min awlɛn ka lɛ beli min klun. Sanngɛ, m buli wafa nga Zoova trɛ i awlɛn i sufuɛ’m be wun’n, m’ɔ maan be kwla fa be wun be mɛntɛn i’n i akunndan. N wunnin i wlɛ kɛ ɔ fata kɛ n sie min su min wa’n i nuan bo. I sin naan m’an mɛn i afɔtuɛ. I sɔ yɛ n yoli ɔ. I bo m’ɔ́ gúa’n, ɔ boli min nuan. Yɛle kɛ, min wa’n sɔli min afɔtuɛ’n nun klanman. Ɔ seli min kɛ ɔ́ káci i nzuɛn’n.” Siɛ nin niɛn mun, amun nin amun mma’m be koko yalɛ titi. Sɛ amun yo sɔ’n, amún sí wafa nga sa kun yo be’n, ɔ nin akunndan nga be bu’n. Ɔ maan, amún kwlá úka be naan b’a fa ajalɛ ng’ɔ ti kpa’n.a

AMUN KLE BE LIKE

10, 11. ?Ngue yɛ amun kwla yo naan amun mma’m b’a mlinman ɔn?

¹⁰ Kɛ bua’m bé dídí’n, bua sunianfuɛ kpa’n si kɛ ɔ cɛman naan bua’m be nun kun w’a didi w’a ɔ i liɛ ngunmin. Kpɛkun, blɛblɛblɛ w’a mlin. Ba’m be kwla yo sɔ wie. Be janvuɛ mun, annzɛ be ɲin su yiyilɛ wie ti’n, be kwla yaci ndɛ nanwlɛ atin’n i su falɛ blɛblɛblɛ. Kpɛkun, b’a mlin. (Nya. 13:20) ?Ngue yɛ amun kwla yo naan i sɔ sa w’a ɲanman amun mma mun ɔn?

¹¹ Amun kle an mma’m be like. Sɛ amun wun kɛ be su fa nzuɛn tɛ wie’n, amun tinngɛ be ndɛndɛ. Like nga be yo m’ɔ ti kpa kusu’n, amun yo be mo naan b’a ɲan wunmiɛn b’a yo i titi. (2 Piɛ. 1:5-8) Blɛ mɔ amun nin amun mma’m bé sú Ɲanmiɛn awlo lɔ’n, yɛ ɔ fata kɛ amun yo i sɔ kpa ɔ. Afuɛ 2008, Ɔktɔblu nun Ɲanmiɛn Sielɛ Blɛ junman fluwa’n se kɛ: “Zoova waan siɛ’m be kle be awlofuɛ’m be Biblu’n nun like kpa titi.” ?Amun nin amun mma’m be su Ɲanmiɛn awlo lɔ? Kɛ amun mma’m be wun kɛ an mian amun ɲin be kle be like awlo lɔ’n, ɔ yo be fɛ dan.​—Mat. 5:3; Fil. 1:10.

12. (a) ?Wafa sɛ yɛ Ɲanmiɛn sulɛ awlo lɔ titi’n, ɔ yoli ba wie’m be ye ɔ? (An nian kuku nga be flɛ i “Be klo ɲanmiɛn sulɛ awlo lɔ’n” i nun wie.) (b) ?Wafa sɛ yɛ Ɲanmiɛn sulɛ awlo lɔ’n, ɔ yoli amun bɔbɔ amun ye ɔ?

¹² Be flɛ talua kun kɛ Keriza. Ɔ nin i si nin i nin’n be su Ɲanmiɛn be awlo lɔ titi. I waan: “Nanwlɛ, kɛ n wun kɛ e tran ase likawlɛ e koko yalɛ’n, ɔ yo min fɛ dan. I sɔ mɔ e yo’n ti’n, e afiɛn mantan kpa. Ɲanmiɛn sulɛ awlo lɔ’n, ɔ ti min si i cinnjin kpa. Ɔ miɛn i ɲin kpa naan w’a yo sɔ titi. Nanwlɛ, i sɔ’n wla min fanngan dan. Ɔ maan, m bu Ɲanmiɛn sulɛ awlo lɔ’n i like cinnjin wie. Min ɲin yi min si kpa ekun. Afin, n wun kɛ ɔ nian e lika kpa Ɲanmiɛn liɛ’n su.” Be flɛ talua kan kun ekun kɛ Blitini. I waan: “Awlo lɔ Ɲanmiɛn sulɛ’n ti’n, min nin min si nin min nin e afiɛn mantan kpa. Be kle min kɛ min ndɛ ti be cinnjin naan be klo kɛ bé úka min. I sɔ’n ti’n, e bo ti kun.” Siɛ nin niɛn mun, amun kle amun mma’m be like naan be klo Zoova. Blɛ mɔ amun kwla yo i sɔ kpa’n, yɛle blɛ mɔ amun nin be sú Ɲanmiɛn awlo lɔ’n.b

AN KLE BE ATIN KPAFUƐ’N

13. ?Ngue yɛ maan ba kun bɔbɔ kwla fa ajalɛ kɛ ɔ́ sú Zoova ɔ?

¹³ Bua sunianfuɛ kpa’n, ɔ fa waka m’ɔ o i sa nun’n sɛsɛ i bua mun. Kpɛkun, ɔ fa kankan be naan be ɔ “didiwlɛ kpa nun.” (Eze. 34:13, 14) Siɛ nin niɛn mun, sɛ é kwlá sé’n, like kunngba’n yɛ amun yo ɔ. Amun kunndɛ kɛ amun mma’m be fa atin kpa’n, naan be su Zoova. Ndɛ nga Jue tofuɛ kun kannin’n, amun kunndɛ kɛ amun mma’m be kan wie. Ɔ seli kɛ: “Min Nyanmiɛn, min waan ń yó ɔ klun sa. Ɔ mmla’n ɔ o min klun.” (Jue. 40:9) Sɛ amun mma’m be bu akunndan kunngba sɔ’n wie’n, bé fá be wun mán Zoova. Kpɛkun, bé yó be batɛmu. Sɛ be wun ndɛ nanwlɛ’n i wlɛ kpa’n, be bɔbɔ bé fá ajalɛ kɛ bé sú Zoova.

14, 15. (a) ?Ngue yɛ siɛ nin niɛn nga be ti Klistfuɛ’n, be kunndɛ kɛ be mma’m be yo ɔ? (b) ?Ngue ti yɛ wie liɛ’n, ba’m be faman ajalɛ kɛ bé sú Zoova ɔ?

¹⁴ Wienun ɔn, amun wun kɛ amun wa’n ɔ nin Zoova be afiɛn’n mantan kpa. Atrɛkpa’n, ɔ lafiman ndɛ nanwlɛ’n su kpa. ?Ngue yɛ amún yó ɔ? Amun nin ba’n be koko yalɛ, yɛ amun mian amun ɲin be kle i like naan ɔ klo Zoova kpa. Amun fɛ i ɲin sie ninnge kwlaa nga Zoova yo mɛnnin i’n be su, naan ɔ wun i wlɛ kɛ Zoova o lɛ sakpa. (Ngl. 4:11) Sɛ ɔ wun i wlɛ sɔ’n, i bɔbɔ fá ajalɛ kɛ ɔ́ sú Zoova.

¹⁵ Sɛ amun wa’n lafiman ndɛ nanwlɛ’n su’n, an tra amun awlɛn be kle i like. An yo sɔ naan ɔ wun i wlɛ kɛ Zoova sulɛ’n yɛ ɔ ti like kpafuɛ’n niɔn. Naan sran ng’ɔ su Zoova i liɛ yo ye. Kusu’n, like nga ti yɛ ɔ lafiman ndɛ nanwlɛ’n su’n, maan amun wun i wlɛ. Atrɛkpa’n, ndɛ nga Biblu’n kan’n yɛ ɔ lafiman su ɔ. Wie liɛ’n, kɛ ɔ́ yó naan ɔ bo jasin fɛ’n ɔ kle i janvuɛ mun’n, ɲannzuɛn kun i. Wie liɛ kusu’n, ɔ bumɛn i kɛ Ɲanmiɛn i mmla’m be ti kpa sakpa. Wie liɛ ekun’n, ɔ bu i kɛ sɛ ɔ su Zoova ɔ su ɲanman janvuɛ.

16, 17. ?Ngue yɛ siɛ nin niɛn’m be kwla yo naan be mma’m b’a lafi ndɛ nanwlɛ’n su naan b’a su Zoova ɔ?

¹⁶ ?Ngue yɛ amún yó naan amun wa’n w’a lafi ndɛ nanwlɛ’n su naan w’a su Zoova ɔ? Siɛ nin niɛn sunman be fali ajalɛ wie mɔ i bo’n guali kpa ɔ. Yɛle kɛ, be usali be wa’n i kosan wie mun kɛ: “?Kɛ a niɛn i sa’n, Ɲanmiɛn i mmla’m be su nantilɛ’n ti kekle annzɛ ɔ ti pɔpɔ? ?Mmlusuɛ benin yɛ sran ng’ɔ su Ɲanmiɛn’n, ɔ ɲɛn i ɔ? ?Ninnge benin yɛ a bu i kɛ be ti kpa mɔ Zoova i sulɛ’n ti, a kwlá yoman ɔn? ?Wafa sɛ yɛ a bu mmlusuɛ nga e ɲan be dɔ nga su’n, ɔ nin nga cɛn wie lele é ɲán be’n mun ɔn? ?Mmlusuɛ sɔ mun nin ninnge nga a bu i kɛ be ti kpa mɔ Zoova i sulɛ’n ti a kwlá yoman’n, beninfuɛ’n yɛ ɔ ti cinnjin ɔn?” Kɛ amun usa amun wa’n i kosan sɔ mun’n, nán maan ɔ yo kɛ amun su ijɔ i sa. Sanngɛ, amun kɛn i amanniɛn su naan ɔ wun i wlɛ kɛ i ndɛ lo amun. Amun nin i be kwla koko Mark 10:29, 30 i su yalɛ. Siɛ nin niɛn wie’m be se be wa’n i kɛ ɔ fa fluwa naan i bue kun su’n, ɔ klɛ Ɲanmiɛn sulɛ’n i mmlusuɛ nga Klistfuɛ kun kwla ɲɛn i’n. Kpɛkun i bue uflɛ su’n, ɔ klɛ like nga i su falɛ’n ɔ ti kekle’n. I sɔ yolɛ’n, ɔ ukali siɛ annzɛ niɛn wie mun naan b’a wun sa ng’ɔ tanndan be wa’n i ɲrun’n. Ɔ maan, be kwla ukɛli i. Sɛ amun fa fluwa Biblu’n kle, ɔ nin fluwa ‘Ɲanmiɛn klo e,’ be kle amun mma’m be like’n, ɔ ti kpa. ?I sɔ yɛ amun yo ɔ?

¹⁷ Siɛ nin niɛn mun, nán Zoova mɔ amun bɔbɔ amun su i kpa’n, i ti yɛ amun mma’m bé ká lɛ bé sú i wie ɔ. Kɛ bé ɲín’n, be bɔbɔ yɛ bé fɛ́ i sɔ ajalɛ ɔ. Ɔ fata kɛ be bɔbɔ be fa be wun mantan Zoova. (Nya. 3:1, 2) Sɛ amun wun kɛ amun wa’n, ɔ fɛmɛn i sɔ ajalɛ’n, amun ukɛ i naan ɔ fa kosan wie mun usɛ i wun. Ɔ kwla usɛ i wun kɛ: “?Ngue yɛ ɔ kle min kɛ Ɲanmiɛn o lɛ sakpa ɔ? ?Ngue yɛ ɔ kle kɛ Zoova nian min lika sakpa ɔ? ?Ngue yɛ ɔ kle kɛ sɛ n nanti Ɲanmiɛn i mmla’m be su’n, min liɛ yó ye ɔ?” Siɛ nin niɛn mun, an yo kɛ bua sunianfuɛ kpa’n sa. An tra amun awlɛn be kle amun mma’m be like. Amun uka be naan be wun i wlɛ kɛ Zoova sulɛ’n yɛ ɔ ti like kpafuɛ’n niɔn.​—Rɔm. 12:2.

18. ?Wafa sɛ yɛ siɛ nin niɛn’m be kwla nian like nga Zoova m’ɔ ti e sunianfuɛ danfuɛ’n, ɔ yo’n su ɔ?

¹⁸ Like nga Zoova m’ɔ ti e sunianfuɛ danfuɛ’n ɔ yo’n, Klistfuɛ kwlakwla kunndɛ kɛ ɔ́ nían su yó wie. (Efɛ. 5:1; 1 Piɛ. 2:25) Siɛ nin niɛn mun yɛ ɔ fata kɛ be yo sɔ kpa’n niɔn. Like ng’ɔ ti amun nanndoliɛ kpa’n yɛle amun mma mun. I sɔ’n ti’n, an nian be su yɛ an kle be like. Sɛ amun yo sɔ’n, amun mma’m be liɛ yó ye tititi. Siɛ nin niɛn mun, an yo like kwlaa nga an kwla yo’n naan amun kle amun mma’m be like naan be klo Zoova.

[Ja ngua lɛ ndɛ mun]

[Kuku, bue 21]

BE KLO ƝANMIƐN SULƐ AWLO LƆ’N

Aniaan bla nɲɔn be kannin wafa nga Ɲanmiɛn sulɛ awlo lɔ’n, ɔ yoli be ye’n i ndɛ. Ndɛ nga be kannin’n yɛ.

“Ɲanmiɛn sulɛ awlo lɔ’n ti’n, e awlo lɔfuɛ mun e afiɛn sɛ. Kpɛkun, e nin Zoova e afiɛn’n ɔ mantan kpa wie. Asa ekun’n, i sɔ yolɛ’n ɔ uka e naan y’a si wafa ng’ɔ fata kɛ e nanti naan e nin Ɲanmiɛn e afiɛn w’a mantan kpa ekun’n.”

“Kɛ e su Ɲanmiɛn awlo lɔ’n, e wun kpaja e. Sran kun kwla kɛn i klun ndɛ. Blɛ sɔ nun’n, e wla fi e su sa’m be su. Zoova sulɛ’n i su yɛ e ɲin o ɔ. Laa mɔ e suman Ɲanmiɛn awlo lɔ’n, e wun kpajaman e kɛ ngalɛ’n sa. Nanwlɛ, Ɲanmiɛn sulɛ awlo lɔ’n, ɔ ti like kpa dan.”