Nán e wla fi blɛ kwlaa nun Ɲanmiɛn junman difuɛ’m be su
“E akunndan o like nga Krist su bɔ an lafi’n ti an yo’n, nin junman nga an di klolɛ bɔ an fa klo Nyanmiɛn nin sran’n, be su.”—1 TƐS. 1:3.
?WAFA SƐ YƐ AMÚN TƐ́ SU Ɔ?
?Ɲanmiɛn junman’n i dilɛ fanunfanun benin yɛ Klistfuɛ klikli’m be dili ɔ? ?Ngue yɛ be wiengu Klistfuɛ’m be yoli naan b’a suan be bo ɔ?
?Wafa sɛ yɛ a bu andɛ blɛ kwlaa nun Ɲanmiɛn junman’n i dilɛ fanunfanun mun ɔn?
?Wafa sɛ yɛ a kwla suan be nga be ti blɛ kwlaa nun Ɲanmiɛn junman difuɛ’n, be bɔ ɔ?
1. ?Wafa sɛ yɛ Pɔlu kleli kɛ i wla fiman be nga be tu be klun be di Zoova i junman’n be su ɔ?
AKOTO PƆLU i wla w’a fimɛn i aniaan nga be tu be klun be di Ɲanmiɛn junman’n, be su le. Ɔ seli kɛ: “E akunndan o like nga Krist su bɔ an lafi’n ti an yo’n, nin junman nga an di klolɛ bɔ an fa klo Nyanmiɛn nin sran’n, ɔ nin amun wla bɔ an fa gua e Min Jésus-Krist su kpa’n be su, yɛ e kan kle e Si Nyanmiɛn.” (1 Tɛs. 1:3) Zoova bɔbɔ i wla fiman junman nga i sufuɛ’m be di be mɛn i’n i su. Kannzɛ junman nga be dili’n ɔ ti kaan sɛ’n, sanngɛ ɔ bu i like dan.—Ebr. 6:10.
2. ?Ngue yɛ like suanlɛ nga, ɔ́ wá kɛ́n i ndɛ ɔ?
2 Klistfuɛ kpanngban be klɛnnin be wun be dili Zoova junman’n i blɛ kwlaa nun. Like suanlɛ nga, ɔ́ wá kán be nun wie mɔ be yoli sɔ Klistfuɛ Klikli’m be blɛ su’n, be ndɛ. Kpɛkun, be nga be su Zoova sɔ wie e blɛ liɛ’n nun’n, é kán be ndɛ wie. Yɛ é wún like nga e kwla yo naan y’a kle kɛ e wla fiman be su’n.
KLISTFUƐ KLIKLI’M BE BLƐ SU’N
3, 4. (a) ?Ɲanmiɛn junman’n i dilɛ fanunfanun benin yɛ Klistfuɛ klikli’m be dili ɔ? (b) ?Nin yɛ be ɲannin like be tili be wun ɲanman nun ɔn?
3 Kɛ be yoli Zezi i batɛmu cɛ’n, ɔ boli Ɲanmiɛn Sielɛ’n i ndɛ kanlɛ’n i bo. Kpɛkun, ɔ kleli sran’m be like naan be di junman sɔ’n wie. (Lik 3:21-23; 4:14, 15, 43) Kɛ ɔ wuli’n, be m’ɔ sunmannin be’n be boli jasin fɛ’n i kpa. Ɔ maan, Ɲanmiɛn ndɛ’n truli. (Yol. 5:42; 6:7) Klistfuɛ wie’m be boli jasin fɛ’n klɔklɔ’m be su. Be nun kun yɛle Filipu m’ɔ ti jasin fɛ’n bofuɛ’n. Ɔ boli jasin fɛ’n i Zerizalɛmu akpasua’n su. (Yol. 8:5, 40; 21:8) Pɔlu nin sran wie’m be liɛ’n, be tuli ajalɛ be ɔli nvlenvle’m be su. (Yol. 13:2-4; 14:26; 2 Kor. 1:19) Ɲanmiɛn maan Klistfuɛ wie’m be klɛli i nuan ndɛ’n. Be nun wie yɛle Marki nin Liki. Yɛ be nun wie’m be ukali Ɲanmiɛn Ndɛ’n i klɛfuɛ mun. Be nun kun yɛle Silvɛn. (1 Piɛ. 5:12) Blɛ sɔ’n nun’n, aniaan bla kpanngban kpa be suannin aniaan sɔ’m be bo. (Yol. 18:26; Rɔm. 16:1, 2) Ɲanmiɛn Ndɛ’n i bue nga laa be klɛli i Glɛki nun’n, ɔ kan Klistfuɛ yasua nin bla sɔ’m be ndɛ. Sɛ e kanngan nun’n, é wún kɛ Zoova bu junman nga i sufuɛ’m be di’n i like dan, naan ɔ nian be lika.
4 ?Klistfuɛ sɔ mɔ be dili Ɲanmiɛn junman’n i blɛ kwlaa nun’n, wafa sɛ yɛ be yoli naan be sa w’a mianman like wun, naan b’a kwla di be junman’n i titi ɔ? B’a mianman sran fi kɛ ɔ nian be lika. Sanngɛ aniaan’m be sikeli be klun ufue su, be nin be wluli awlo, annzɛ be yoli ninnge wie mun ekun be fa ukali be. (1 Kor. 9:11-15) Wie liɛ bɔbɔ’n, asɔnun wunmuan kun nunfuɛ’m be bo yoli kun be fali ajalɛ be ukali be. (An kanngan Sa Nga Be Yoli’n 16:14, 15, ɔ nin Filipfuɛ Mun 4:15-18 be nun.) Wie liɛ kusu’n, kɛ blɛ kwlaa nun Ɲanmiɛn junman difuɛ sɔ’m be ɲɛnnin i wun alaje’n, be dili be junman kan. I sɔ yɛ Pɔlu nin i wiengu m’ɔ nin be bo jasin fɛ’n be yoli ɔ.
E BLƐ SU BLƐ KWLAA NUN ƝANMIƐN JUNMAN DIFUƐ MUN
5. ?Blɛ kwlaa nun Ɲanmiɛn junman dilɛ’n i su ndɛ benin yɛ aniaan kun nin i yi mɔ be dili wie’n, be kannin ɔn?
5 Andɛ’n, aniaan kpanngban be di Ɲanmiɛn i junman fanunfanun blɛ kwlaa nun. (An nian kuku nga be flɛ i kɛ “Be nga be ti blɛ kwlaa nun Ɲanmiɛn junman difuɛ’n” i nun.) ?Wafa sɛ yɛ be bu be junman’n niɔn? An fa kosan sɔ’n be usa be nun wie mun. Wafa nga bé wá tɛ́ amun su’n, ɔ́ wlá amun fanngan dan. Maan e fa ndɛ nga aniaan kun kannin’n e nian. Aniaan sɔ’n yoli titi atin bofuɛ. I sin’n, ɔ yoli ngunmin atin bofuɛ. I sin ekun’n, ɔ yoli ngaliɛ difuɛ. Kpɛkun, ɔ dili junman Betɛli lɔ nvle uflɛ nun. Ɔ seli kɛ: “Kɛ n niɛn i sa’n, ajalɛ nga n fali mɔ n di Ɲanmiɛn junman’n i blɛ kwlaa nun’n yɛ ɔ ti ajalɛ kpafuɛ’n niɔn. I nun mɔ n le afuɛ 18, n kwla se kɛ ń kɔ́ Inivɛsite, annzɛ ń dí junman naan be tua min kalɛ, annzɛ kusu ń yó atin bofuɛ. Ajalɛ’n i falɛ’n w’a yoman pɔpɔ. Sanngɛ, n wunnin kɛ min wun mɔ n klɛnnin m mannin Zoova mɔ n di i junman’n i blɛ kwlaa nun’n, i wla fiman su. N fa ninnge nga n si be yo’n, annzɛ ngwlɛlɛ nin wunmiɛn nga Zoova mannin min’n, n di i junman’n. Sɛ mɛn’n nun junman yɛ n dili’n, nn m’an kwlá yoman sɔ.” I yi’n kusu seli kɛ: “Ɲanmiɛn i junman kwlaa nga n dili’n, ɔ ukali min maan n fali min wun mantannin Ɲanmiɛn kpa. E wunnin kɛ Zoova sasali e, yɛ ɔ kleli e atin titi. Sɛ e waan é yó e bɔbɔ e ninnge liɛ mun naan é dí pɔɔ’n, nn e bumɛn i kɛ ɔ kwla yoli sɔ. Zoova i junman mɔ e di i blɛ kwlaa nun ti’n, n lɛ i ase cɛn kwlakwla.” Amun kunndɛ kɛ amun liɛ yo ye sɔ wie. ?Nɛ́n i ɔ?
6. ?Wafa sɛ yɛ Zoova bu junman nga e di e mɛn i’n niɔn?
6 Asamian wie ti’n, Klistfuɛ wie’m be kwlá yoman blɛ kwlaa nun Zoova junman difuɛ. Sanngɛ, be mian be ɲin be su i. Be ɲin sɔ mɔ be mian’n, Zoova bu i like dan. Filemɔn 1-3 nun’n, Pɔlu yoli Kolɔsu lɔ Klistfuɛ’m be kwlaa be mo. Ɔ boli be nun wie’m be dunman yoli be mo be tinuntinun. (An kanngan nun.) Pɔlu i wla w’a fimɛn i niaan sɔ’m be su. Zoova kusu’n, ɔ bu junman nga e di e mɛn i’n i like dan, i wla fiman su. ?Ngue yɛ e kwla yo naan y’a kle kɛ be nga be di Ɲanmiɛn junman’n i blɛ kwlaa nun’n, e wla fiman be su wie ɔ?
WAFA NGA E KWLA SUAN ATIN BOFUƐ’M BE BO’N
7, 8. (a) An kan titi atin bofuɛ’m be junman’n i ndɛ. (b) ?Wafa sɛ yɛ e kwla suan be bo ɔ?
7 Klistfuɛ klikli’m be blɛ su’n, be mɔ be ti jasin fɛ bofuɛ’m be ukali asɔnun’n i dan kpa. Like kunngba’n yɛ e blɛ su titi atin bofuɛ’m be yo ɔ. Anglo kwlaa nun’n, titi atin bofuɛ sɔ’m be nun sunman be bo jasin fɛ’n dɔ 70. ?Wafa sɛ yɛ e kwla suan be bo ɔ?
8 Aniaan bla kun m’ɔ ti titi atin bofuɛ’n seli kɛ: “Jasin fɛ’n mɔ atin bofuɛ’m be bo i cɛn kwlakwla’n ti’n, kɛ a wun be sa’n, ɔ waan be mianman kɛ be uka be. Sanngɛ, be kunndɛ kɛ be wla be fanngan.” (Rɔm. 1:11, 12) Aniaan bla kun ekun m’ɔ yoli atin bofuɛ afuɛ kpanngban’n, ɔ kannin be asɔnun’n i nun lɔ atin bofuɛ’m be ndɛ. I waan atin bofuɛ’m be di junman dan kpa. Ɔ maan, kɛ cɛn kunngun aniaan wie’m be fa be loto nun annzɛ be nin be wlu awlo, annzɛ be wla be sa bo sika kan mɔ be fa tua be loto kpa’n, annzɛ be kwla fa to like uflɛ mɔ be sa miɛn i wun’n, ɔ yo be fɛ kpa. Afin i lɛ nun’n, be wun i wlɛ kɛ be ndɛ lo aniaan mun.
9, 10. ?Wafa sɛ yɛ aniaan wie’m be suannin atin bofuɛ’m be bo ɔ?
9 Wafa nga e kwla suan atin bofuɛ’m be bo ekun’n yɛle kɛ, maan e nin be e bo jasin fɛ’n. Aniaan bla kun m’ɔ ti atin bofuɛ’n, ɔ seli kɛ: “Kɛ ɔ fɛ i Kisie lele m’ɔ́ fá jú Ya’n, e ɲanman sran naan w’a ko sunman e.” I wiengu atin bofuɛ kun seli kɛ: “Nnɔsua wia’n nun yɛ e ɲanman sran naan w’a ko sunman e kpa’n niɔn.” Aniaan bla kun di junman Betɛli ng’ɔ o Amlɛnkɛn’m be lɔ klɔ nga be flɛ i Bluklini’n i su lɔ. Wafa nga be suɛnnin i bo i nun m’ɔ ti atin bofuɛ’n, ɔ kɛnnin i ndɛ. I waan: “Aniaan bla kun m’ɔ le loto’n, ɔ seli min kɛ: ‘Blɛ kwlaa nga a ɲanman sran naan w’a ko sunman wɔ’n, flɛ min. Ń kó súnman wɔ.’ Aniaan bla sɔ’n suannin min bo dan.” Be flɛ aniaan bla kun kɛ Sari. Ɔ seli kɛ: “Kɛ atin bofuɛ nga be nin a jaman bla annzɛ bian’n, be wie jasin fɛ’n i bo mɔ be kɔ awlo’n, wie liɛ’n, be ɲrun yo be koun. I sɔ’n ti wie liɛ’n, kɛ amún sú Ɲanmiɛn awlo lɔ’n, amun flɛ be naan be trɛn i bo. Kɛ amun nin amun awlofuɛ mun amún yó ninnge uflɛ wie mun’n, sɛ be trɛn i bo wie’n, ɔ́ yó be fɛ kpa.”
10 Aniaan bla kun yoli blɛ kwlaa nun Ɲanmiɛn junman difuɛ afuɛ 50. Wafa nga be niɛnnin i bɔbɔ nin aniaan bla wie mɔ be yoli atin bofuɛ kɛ i sa’n be lika’n, ɔ kɛnnin i ndɛ. Ɔ seli kɛ: “Anglo nɲɔn kwlaa nun’n, asɔnun kpɛnngbɛn’m be nian e osu. Be nian sɛ e wun kpaja e o. Kpɛkun, be usa e junman’n i sundɛ. Yɛ be usa e like kwlaa nga e sa kwla miɛn i wun’n. Be niannian e sua’n nun be nian, sɛ e sa mian like wie wun o. Nanwlɛ, e ndɛ loli be dan.” Asɔnun kpɛnngbɛn sɔ mun nin aniaan wie mun ekun be yo kɛ Onezifɔr sa. Klistfuɛ sɔ’n, ɔ ti awlobo kpɛnngbɛn. Ɔ nin i sɔ ngba’n, ɔ niannin Pɔlu i lika wie.—2 Tim. 1:18.
11. An kan ngunmin atin bofuɛ’m be junman’n i ndɛ.
11 Blɛ kwlaa nun Ɲanmiɛn junman dilɛ’n i wafa kun ekun yɛle ngunmin atin bolɛ junman’n. Aniaan nga be di i sɔ junman’n, be nun sunman be bo jasin fɛ’n dɔ 130 anglo kwlaa nun. Kpɛkun, be di asɔnun’n i nun junman kpanngban. Kɛ mɔ Ɲanmiɛn junman’n yɛ be di i mlɔnmlɔn’n ti’n, Betɛli’n man be sika kan naan be fa ti be wun ɲanman nun. I liɛ’n, be ɲin kwla tran be junman’n i su mlɔnmlɔn.
12. ?Wafa sɛ yɛ asɔnun kpɛnngbɛn nin aniaan onga’m be kwla suan ngunmin atin bofuɛ’m be bo ɔ?
12 ?Wafa sɛ yɛ e kwla suan ngunmin atin bofuɛ’m be bo ɔ? Asɔnun kpɛnngbɛn kun m’ɔ di junman Betɛli kun nun’n, ɔ nin atin bofuɛ sunman be koko yalɛ titi. Ɔ seli kɛ: “Ɔ fata kɛ asɔnun kpɛnngbɛn’m be nin be koko yalɛ naan be wun sa ng’ɔ o be su’n i wlɛ, naan be suan be bo. Aniaan wie’m be se be klun lɔ kɛ ngunmin atin bofuɛ’m be mianman like fi wun. Afin be man be sika kan. Sanngɛ ninnge kpanngban wie’m be o lɛ mɔ aniaan’m be kwla yo naan b’a suan ngunmin atin bofuɛ’m be bo ɔ.” Kɛ titi atin bofuɛ mun sa’n, ngunmin atin bofuɛ’m be klo kɛ aniaan’m be ko sunman be naan be bo jasin fɛ’n. ?Amun nin be bo jasin fɛ’n?
WAFA NGA E KWLA SUAN AKPASUA SUNIANFUƐ’M BE BO’N
13, 14. (a) ?Ngue yɛ e kwla yo e kle kɛ e wla fiman akpasua sunianfuɛ mun nin be yi’m be su ɔ? (b) ?Wafa sɛ yɛ a kwla suan akpasua sunianfuɛ mun nin be yi’m be bo ɔ?
13 Akpasua sunianfuɛ mun nin be yi’m be ɲin w’a ti Ɲanmiɛn i sulɛ’n nun kpa. Ɔ maan, be wla aniaan’m be fanngan. Sanngɛ, be kunndɛ kɛ be wla be fanngan wie. Asa ekun’n, be kunndɛ kɛ aniaan’m be nin be bo jasin fɛ’n. Kɛ aniaan’m bé yíyí be ɲin su mɔ be flɛ be kɛ be trɛn i bo’n ɔ yo be fɛ. Sɛ e wun kɛ akpasua sunianfuɛ’n annzɛ i yi’n ɔ kpinndinman, annzɛ ɔ la dɔɔtrɔ’n, maan e ko niɛn i osu. Yɛ maan e yo ninnge wie mɔ i sa mɛn i wun’n e mɛn i. I sɔ yɛ “Lik b’ɔ ti dɔɔtrɔ’n,” ɔ yoli ɔ. Kɛ akoto Pɔlu nin i wiengu’m bé sín asɔnun’m be su’n, ɔ niannin be lika.—Kol. 4:14; Yol. 20:5–21:18.
14 Akpasua sunianfuɛ mun nin be yi’m be kunndɛ kɛ aniaan’m be klo be, yɛ be wla be fanngan. Akpasua sunianfuɛ kun seli kɛ: “Kɛ min sa sin bubu min’n, min janvuɛ’m be sie i nzɔliɛ. Be usa min kosan wie mun. Ɔ maan, n kan min klun ndɛ n kle be. Kɛ be sie be su min nuan bo’n, i sɔ’n wla min fanngan dan.” Kɛ akpasua sunianfuɛ mun nin be yi’m be wun kɛ be ndɛ lo aniaan mun’n, ɔ yo be fɛ kpa.
WAFA NGA E KWLA SUAN BETƐLI LƆ JUNMAN DIFUƐ’M BE BO’N
15, 16. (a) ?Junman wafa benin yɛ aniaan nga be tran Betɛli lɔ’n, ɔ nin Ɲanmiɛn sulɛ sua kplanfuɛ’m be di ɔ? (b) ?Wafa sɛ yɛ e kwla kle kɛ e wla fiman be su ɔ?
15 Aniaan wie’m be di junman Betɛli lɔ. Yɛ wie’m be kplan Ɲanmiɛn sulɛ sua mun. Junman nga aniaan kwlaa sɔ’m be di’n, ɔ ti Ɲanmiɛn Sielɛ junman. ?Aniaan nga be di junman Betɛli lɔ’n be nun wie o amun asɔnun’n nun, annzɛ amun akpasua’n su? ?Wafa sɛ yɛ amun kwla kle kɛ amun wla fiman be su ɔ?
16 Kɛ aniaan’m be kɔ Betɛli lɔ tranlɛ uflɛuflɛ nun’n, be ti kɛ aofuɛ sa. Be wla lo be osufuɛ nin be janvuɛ mun. Ɔ maan, kɛ aniaan nga be tran Betɛli lɔ titi’n, be nin asɔnun nunfuɛ’m be fa be yo be janvuɛ’n, ɔ yo be fɛ dan. (Mar. 10:29, 30) Aniaan nga be tran Betɛli lɔ’n, be kɔ aɲia’m be bo, yɛ be bo jasin fɛ’n le mɔcuɛ kwlaa nun. Sanngɛ wie liɛ’n, junman nga be di i lɔ’n, ɔ tra be ase. Ɔ maan sɛ amun a wunman be’n, nán an kan be ndɛ tɛ. Sanngɛ, maan amun kle kɛ amun bu junman nga be di’n i like dan.—An kanngan 1 Tɛsalonikfuɛ Mun 2:9 nun.
WAFA NGA E KWLA SUAN BE NGA BE DI ƝANMIƐN JUNMAN NVLE UFLƐ NUN’N BE BO’N
17, 18. ?Junman wafawafa benin yɛ be nga be kɔ nvle uflɛ nun Ɲanmiɛn junman’n i dilɛ blɛ kwlaa nun’n, be di ɔ?
17 Aniaan wie’m be kplin su be kɔ nvle uflɛ nun be ko di Ɲanmiɛn junman’n i blɛ kwlaa nun. Kɛ be ju lɔ’n, wie liɛ’n, be suan nvle sɔ’n i nun lɔ aniɛn’n, yɛ be di aliɛ mɔ be nin a diman wie le’n. Wie liɛ ekun’n, be suan lɔfuɛ’m be ninnge yolɛ wafa’n, naan b’a si wafa nga be nin be kwla tran klanman’n. ?Junman benin yɛ aniaan sɔ’m be di ɔ?
18 Aniaan sɔ’m be nun wie’m be ti ngaliɛ difuɛ yɛ be bo jasin fɛ’n i mlɔnmlɔn. Be si jasin fɛ’n i bo kpa, yɛ be si sran like kle kpa wie. Ɔ maan, be uka aniaan mun naan be si i sɔ yo wie. Nvle nga be o su lɔ’n i Betɛli’n, ɔ kunndɛ be tranwlɛ kan. Kpɛkun, ɔ man be sika kan naan be fa ti be wun ɲanman nun. Aniaan sɔ’m be nun wie’m be di junman Betɛli’n be nun. Wie’m be kusu’n, be kplan Ɲanmiɛn sulɛ sua mun. I wie yɛle kɛ be kplan Betɛli sua mun, ɔ nin sua nga e kaci e fluwa’m be nun ndɛ mun aniɛnaniɛn’m be nun’n, ɔ nin aɲia yowlɛ sua dandan mun, nin Ɲanmiɛn Sielɛ sua mun. Aniaan sɔ’m be kusu be kɔ aɲia’m be bo, yɛ be nin aniaan’m be bo jasin fɛ’n i titi. Ɔ maan, be uka asɔnun’n i dan kpa.
19. ?Aniaan mɔ be fin nvle uflɛ nun’n, wafa sɛ yɛ e kwla suan be bo ɔ?
19 ?Aniaan sɔ mɔ be fin nvle uflɛ nun’n, wafa sɛ yɛ e kwla suan be bo ɔ? Sɛ e waan e nin be é wlú awlo’n, maan ɔ kpɛn e klun titi kɛ wie liɛ’n, be siman e klɔ aliɛ mun. Kpɛkun atrɛkpa’n, aliɛ wie o lɛ mɔ be kunndɛman kɛ bé dí wie ɔ. Wie liɛ kusu’n, be kwla se kɛ bé dí wie bé nían. I sɔ’n ti’n, maan e dun mmua e kan aliɛ nga e kunndɛ kɛ é fá sɔ́ be nun’n i ndɛ e kle be. Sɛ be su suan e aniɛn’n i kanlɛ’n, annzɛ e ninnge yolɛ wafa’n i yolɛ wie’n, maan e tra e awlɛn be wun. Yɛ maan e uka be blɛblɛblɛ. Aniɛn uflɛ suanlɛ’n, ɔ timan pɔpɔ. Sanngɛ, aniaan sɔ’m be kunndɛ kɛ bé súan.
20. ?Wafa sɛ yɛ e kwla uka blɛ kwlaa nun Ɲanmiɛn junman difuɛ’m be sran oke mun ɔn?
20 Aniaan nga be ti blɛ kwlaa nun Ɲanmiɛn junman difuɛ’n, be nun wie’m be si nin be nin’m b’a yo oke. Kɛ ɔ yo sɔ’n, wie’m be kunndɛ kɛ bé kó nían be sran oke’n i lika. Sanngɛ wie liɛ’n, siɛ nin niɛn nga be bɔbɔ be ti Zoova i Lalofuɛ’n, be kunndɛman kɛ be wa’n ɔ yaci Ɲanmiɛn junman’n i dilɛ. (3 Zan 4) I kwlaa yoli o, ɔ fata kɛ aniaan sɔ’m be mian be ɲin be ko nian be sran oke’n i osu cɛn kunngun, naan be niɛn i lika. Aniaan nga be nin sran oke’n be tran akpasua kunngba’n su’n, be kwla ko niɛn i osu be niɛn i lika wie. Maan e wla kpɛn su titi kɛ jasin fɛ bolɛ’n m’ɔ ti junman cinnjin kpafuɛ’n, yɛ blɛ kwlaa nun Ɲanmiɛn junman difuɛ’m be di ɔ. (Mat. 28:19, 20) I sɔ’n ti’n, maan e yo like kwlaa nga e kwla yo’n naan e uka be si nin be nin oke mun.
21. ?Kɛ sran wie man blɛ kwlaa nun Ɲanmiɛn junman difuɛ’m be like, annzɛ ɔ kle kɛ i wla fiman junman nga be di’n su’n, wafa sɛ yɛ i sɔ’n yo be ɔ?
21 Like nga sran kpanngban be yo’n, be yo i sika klolɛ ti. Be nga be ti blɛ kwlaa nun Ɲanmiɛn junman difuɛ’n be liɛ’n, ɔ timan sɔ. Be liɛ’n, be kunndɛ kɛ bé dí junman bé mán Zoova, naan bé úka be wiengu. Sanngɛ sɛ sran wie man be like’n, be lɛ i ase dan. Aniaan bla kun m’ɔ ti blɛ kwlaa nun Ɲanmiɛn junman difuɛ nvle uflɛ nun’n seli kɛ: “Fluwa ngbɛn bɔbɔ nga aniaan’m be klɛ be fa la e ase’n, ɔ yo e fɛ. I sɔ’n kle e kɛ be bu e sran naan be wla fiman junman nga e di’n su.”
22. ?Wafa sɛ yɛ a bu Ɲanmiɛn junman’n i dilɛ blɛ kwlaa nun’n niɔn?
22 Zoova junman’n i dilɛ blɛ kwlaa nun’n, ɔ man aklunjuɛ dan. Andɛ’n, junman sɔ’n yɛ ɔ ti junman cinnjin kpafuɛ’n niɔn. Be nga be di i sɔ junman’n, be fa nzuɛn kpa mun. Nzuɛn sɔ’n, ɔ de be sa sunman nun blɛ nga nun. Kpɛkun, ɔ́ dé be mɛn klanman ng’ɔ́ bá lɛ’n nun. Ɔ ka kan’n, Zoova i sufuɛ’m be kwlaa bé wá sú i aklunjuɛ su blɛ kwlaa nun. Sanngɛ lele nin kɛ blɛ sɔ’n jú’n, maan e wla kpɛn be nga be ti blɛ kwlaa nun Ɲanmiɛn junman difuɛ’n be su. Afin ‘klolɛ bɔ be fa klo Nyanmiɛn nin sran’n,’ i ti yɛ be di “junman” sɔ’n niɔn.—1 Tɛs. 1:3.
[Kuku, bue 29]
Be nga be ti blɛ kwlaa nun Ɲanmiɛn junman difuɛ’n
Titi atin bofuɛ mun: Titi’n, be bo jasin fɛ’n dɔ 70 anglo kwlaa nun. Be nun wie’m be ko bo jasin fɛ’n lika nga be sa mian jasin bofuɛ wun lɔ’n i nun.
Ngunmin atin bofuɛ mun: Titi’n, be bo jasin fɛ’n dɔ 130 anglo kwlaa nun. Be fa be kɔ lika nga be sa mian jasin bofuɛ wun lɔ dan’n i nun.
Akpasua sunianfuɛ mun: Akpasua sunianfuɛ’m be sin asɔnun’m be su. Be uka aniaan mun naan be si jasin fɛ’n i bo kpa. Kpɛkun, be wla aniaan’m be fanngan sa sunman nun.
Betɛli lɔ junman difuɛ mun: Be nun wie’m be kaci fluwa’m be nun ndɛ mun aniɛn’m be nun. Be nun wie mun ekun be yi fluwa mun. Yɛ wie’m be nian jasin fɛ bolɛ junman’n su.
Ngaliɛ difuɛ mun: Titi’n, be fa be kɔ nvle uflɛ nun. Be nun sunman be bo jasin fɛ’n dɔ 130 anglo kwlaa nun.
Be nga be kɔ nvlenvle’n be nun Ɲanmiɛn junman dilɛ be klunklo su’n: Be ko uka aniaan mun be kplan Betɛli sua mun, ɔ nin aɲia dandan yowlɛ sua mun, ɔ nin Ɲanmiɛn Sielɛ sua mun.
Ɲanmiɛn Sielɛ sua kplanfuɛ mun: Be kleli be Ɲanmiɛn Sielɛ sua’n i kplanlɛ. Ɔ maan, be kplan Ɲanmiɛn Sielɛ sua mun be bɔbɔ be nvle liɛ’n nun.