Maan e fa e wla e gua Ɲanmiɛn Sielɛ’n su kpa
“Nyanmiɛn su bɔ e lafi’n ti, e si weiin kpa kɛ y’a nyan like nga e wla o su’n.”—EBR. 11:1.
?AMUN KWLA YIYI NUN?
An nian kuku nga be flɛ i kɛ“Like nga Ɲanmiɛn yó naan i klun sa’n w’a kpɛn su’n” nun, naan an tɛ kosan nga’m be su
?Ngue yɛ nda nga Ɲanmiɛn tɛli i Edɛni fie’n nun lɔ’n, ɔ kle e ɔ?
?Ngue yɛ aenguɛ nga Ɲanmiɛn nin Abraamu be trali’n, ɔ nin aenguɛ ng’ɔ nin Davidi be trali’n, be kle e ɔ?
?Ngue yɛ nda nga Ɲanmiɛn tali Zezi kɛ ɔ́ yó i ɲrun jranfuɛ kɛ Mɛlkizedɛki liɛ’n sa’n, ɔ kle e ɔ?
1, 2. (a) ?Ngue ti yɛ e kwla lafi su kpa kɛ like nga ti yɛ Ɲanmiɛn yili sran mun’n, ɔ́ kpɛ́n su ɔ? (b) ?Kɛ nga Efɛzfuɛ Mun 2:12 fa kan’n sa’n, ngue ti yɛ e le like mɔ e fa e wla e gua su ɔ? (An nian desɛn ng’ɔ o kan like suanlɛ’n bo i bo lɛ’n.)
E MƆ e ti Zoova i Lalofuɛ’n, e kan Ɲanmiɛn Sielɛ’n i ndɛ juejue su. E kan kle sran mun kɛ Ɲanmiɛn Sielɛ’n ti yɛ cɛn wie lele’n, sran’m be liɛ yó ye ɔ. ?Sanngɛ e bɔbɔ’n, e lafi su kɛ Ɲanmiɛn Sielɛ’n wo lɛ sakpa? ?Yɛ e lafi su kɛ Ɲanmiɛn Sielɛ’n ti yɛ cɛn wie lele’n, like nga ti yɛ Ɲanmiɛn yili sran mun’n, ɔ́ kpɛ́n su ɔ? ?Ngue ti yɛ e kwla fa e wla e gua Ɲanmiɛn Sielɛ’n i su kpa ɔ?—Ebr. 11:1.
2 Ɲanmiɛn Sielɛ’n, ɔ ti famiɛn diwlɛ kun. Ɲanmiɛn Zoova bɔbɔ yɛ ɔ sieli ɔ. Famiɛn diwlɛ sɔ’n ti’n, like nga ti yɛ Ɲanmiɛn yili sran mun’n, ɔ́ kpɛ́n su. Asa ekun’n, ɔ́ yó maan sran’m bé sí kɛ Zoova yɛ ɔ si sran’m be sie ɔ. ?Sanngɛ, wan yɛ ɔ́ dí famiɛn’n niɔn? ?Wan mun yɛ be nin i bé dí famiɛn’n niɔn? ?Wan mun yɛ famiɛn sɔ’m bé síe be ɔ? Kosan cinnjin sɔ mun ti’n, Zoova tali sran wie’m be nda annzɛ ɔ nin be trali aenguɛ fanunfanun. Kpɛkun, i Wa Zezi Klist nin i sɔnnzɔnfuɛ wie’m be trali aenguɛ wie. Sɛ e yiyi aenguɛ tralɛ sɔ’m be nun’n, é wún kɛ Ɲanmiɛn i klun sa’n ɔ́ kpɛ́n su sakpa. Asa ekun’n, é wún kɛ Ɲanmiɛn Sielɛ’n, ɔ o lɛ sakpa naan e kwla fa e wla e gua su.—An kanngan Efɛzfuɛ Mun 2:12 nun.
3. ?Ngue yɛ é wá yíyí nun like suanlɛ nga nun, ɔ nin ng’ɔ́ bá lɛ’n nun ɔn?
3 Aenguɛ tralɛ nga Biblu’n kan be ndɛ’n, be nun nsiɛn be nuan yia Zezi Klist i famiɛn dilɛ’n su. Aenguɛ tralɛ nsiɛn sɔ mun yɛ: (1) aenguɛ nga Ɲanmiɛn nin Abraamu be trali’n, (2) aenguɛ nga Ɲanmiɛn nin Izraɛlifuɛ’m be trali’n, (3) aenguɛ nga Ɲanmiɛn nin Davidi be trali’n, (4) aenguɛ nga Ɲanmiɛn nin sran m’ɔ́ káci i ɲrun jranfuɛ kɛ Mɛlkizedɛki liɛ’n sa’n, be trali’n (5) aenguɛ uflɛ’n, (6) aenguɛ nga Zezi nin i sɔnnzɔnfuɛ wie’m be trali’n. Like suanlɛ nga nun’n, ɔ nin ng’ɔ́ bá lɛ’n nun’n, é wá yíyí aenguɛ tralɛ sɔ’m be nun. Ɔ maan, é wún wafa nga be nuan yia Ɲanmiɛn Sielɛ’n su’n. Kpɛkun, é wún wafa nga Ɲanmiɛn Sielɛ’n wá yó naan like nga ti yɛ Ɲanmiɛn yili asiɛ’n nin sran’n, w’a kpɛn su’n.—An nian kuku nga be flɛ i kɛ “Like nga Ɲanmiɛn yó naan i klun sa’n w’a kpɛn su’n” i nun.
NDA KUN MƆ ƝANMIƐN TALI’N M’Ɔ KLE KƐ I KLUN SA’N KPƐ́N SU’N
4. ?Kɛ nga mɛn’n i bo bolɛ fluwa’n fa kan’n sa’n, ngue ti yɛ Ɲanmiɛn yili sran mun ɔn?
4 Ɲanmiɛn yili asiɛ’n i klanman kpa naan sran’m be tran su. Ɔ yili sran’n kɛ i bɔbɔ Ɲanmiɛn’n sa. I sin’n, ɔ seli Adam nin i yi kɛ be wu ba naan be nin be mma’m be di asiɛ’n i su junman, naan asiɛ wunmuan’n ɔ kaci lika klanman. Kpɛkun, ɔ seli be ekun kɛ nán be di sa kpa nin sa tɛ’n be silɛ waka’n i mma liɛ’n. (Bob. 1:26, 28; 2:16, 17) Like nga ti yɛ Ɲanmiɛn yili sran mun’n, yɛ ɔ o lɛ ɔ. ?Yɛ ngue ti yɛ ɔ nin sran wie’m be wa trali aenguɛ ɔ?
5, 6. (a) ?Ngue yɛ Satan yoli naan Ɲanmiɛn klun sa’n w’a kpɛnman su ɔ? (b) ?Ɲin kekle yolɛ mɔ Satan kpɛli i ba Edɛni fie’n nun lɔ’n, wafa sɛ yɛ Zoova tɛli su ɔ?
5 Mɛn’n i bo bolɛ nun’n, Satan kunndɛli kɛ ɔ́ tánndan Ɲanmiɛn ɲrun. I sɔ’n ti’n, ɔ yoli maan Adam nin i yi’n be yoli ɲin kekle Ɲanmiɛn su. Yɛle kɛ ɔ lakali Ɛvu. Ɔ maan, Adam nin Ɛvu be dili sa kpa nin sa tɛ’n be silɛ waka’n i mma mɔ Ɲanmiɛn seli kɛ nán be di’n. (Bob. 3:1-5; Ngl. 12:9) Ndɛ nga Satan kan kleli Ɛvu’n i bo’n yɛle kɛ, Ɲanmiɛn siman sran sie. Kɛ ɔ́ kɔ́ i ɲrun’n, Satan buali sran’m be su ato kɛ like nga be kwla ɲɛn i Ɲanmiɛn i sulɛ nun’n, i ti yɛ be su i ɔ.—Zɔb 1:9-11; 2:4, 5.
6 ?Ɲin kekle yolɛ mɔ Satan kpɛli i ba Edɛni fie’n nun lɔ’n, wafa sɛ yɛ Zoova tɛli su ɔ? Zoova kwla se kɛ ɔ́ ká lɛ núnnún ɲin keklefuɛ sɔ mun. Sanngɛ, maan e wla kpɛn su kɛ Zoova seli Adam nin Ɛvu kɛ be wu ba naan be nin be mma’m be di asiɛ’n i su junman. Sɛ Adam nin Ɛvu be wuli be ja nun lɛ’n, ndɛ nga Ɲanmiɛn kannin’n, ɔ su kwlá kpɛnman su. I sɔ’n ti’n, Ɲanmiɛn tali nda cinnjin kpa kun Edɛni fie’n nun lɔ. E kwla flɛ nda sɔ’n kɛ nda mɔ Ɲanmiɛn tɛli i Edɛni fie’n nun lɔ’n.—An kanngan Bo Bolɛ 3:15 nun.
7. ?Ngue yɛ nda nga Zoova tɛli i Edɛni fie’n nun lɔ’n, ɔ kle ɔ?
7 Edɛni fie’n i nun lɔ nda nga Zoova tali’n, ɔ kle kɛ cɛn wie lele’n, bé núnnún wuo’n ɔ nin i osu’n. Wuo’n yɛle Mmusu’m be si Satan. I osu’n kusu yɛle sran kwlaa nga bé wá sú i su’n. Ɲanmiɛn maan bla’n i osu’n, ɔ́ núnnún Satan nin i osu’n. Ɔ maan, nda nga Zoova tali’n, ɔ kle weiin kɛ Satan nin i osu’n be su tranman lɛ kun. Kpɛkun, sa kwlaa nga ɲin kekle yolɛ’n kpɛli be ba’n, be su tranman lɛ kun wie. Asa ekun’n, nda sɔ mɔ Zoova tali’n, ɔ kle wafa nga sa kwlaa sɔ’m bé kpɛ́n su’n.
8. ?Wan yɛle bla’n, ɔ nin i osu’n?
8 ?Wan yɛle bla’n, ɔ nin i osu’n? E si kɛ Satan ti aolia nun sran. E si ekun kɛ bla’n i osu’n, ɔ́ wá “kwlá mmusu’m be si Satan’n,” yɛle kɛ ɔ́ núnnún Satan. I sɔ’n kle weiin kɛ bla’n i osu’n, ɔ ti aolia nun sran wie. (Ebr. 2:14) Ɔ maan bla’n timan sran jrɛiin, ɔ ti like kun nzɔliɛ. Kɛ Zoova tali nda Edɛni fie’n nun lɔ’n, afuɛ 4.000 tra su sinnin naan b’a si bla’n ɔ nin i osu’n. Kɛ ɔ́ yó sɔ’n, nn wuo’n i osu’n, ɔ́ trɛ́. Afuɛ sɔ’m be nun’n, Zoova nin i sufuɛ’m be trali aenguɛ fanunfanun. Aenguɛ tralɛ sɔ’m be fa e ɲin sie i bla’n i osu’n i su. Kpɛkun, be kle wafa nga bla’n i osu’n, ɔ́ wá yó naan ɲrɛnnɛn nga Satan fa yi sran’m be su’n w’a wie’n.
AENGUƐ TRALƐ KUN MƆ MAAN E SI BLA’N I OSU’N
9. (a) ?Aenguɛ benin yɛ Zoova nin Abraamu be trali ɔ? (b) ?Blɛ benin nun yɛ be boli aenguɛ sɔ’n i su dilɛ bo ɔ?
9 Kɛ Zoova tali nda Edɛni fie’n nun lɔ’n mɔ afuɛ kɔe 2.000 sinnin’n, cɛn kun’n, ɔ yili i wun nglo kleli Abraamu. Ɔ seli Abraamu kɛ ɔ jaso i klɔ Ir lɔ, naan ɔ ko tran Kanaan mɛn’n nun. (Yol. 7:2, 3) Zoova seli Abraamu kɛ: “Jaso ɔ mɛn’n nun, jaso ɔ osufuɛ’m be afiɛn ɔ si i awlo’n nun kɔ mɛn nga ń wá klé wɔ’n nun. Ń yó maan ɔ osu’n wá yó nvle dan kun, ń yó wɔ ye, ń yó maan ɔ dunman’n fú. Ɔ dunman nun ti ń yó sran’m be ye. Sran ng’ɔ bu ɔ wun akunndan kpa’n, ń yó i ye. Sran nga kusu b’ɔ bo wɔ sannzan’n, ḿ bó i sannzan wie. Ɔ dunman nun yɛ ń yó nvle-nvle’m be kwlaa be ye-ɔ.” (Bob. 12:1-3) I lɛ’n nun’n, Zoova nin Abraamu be trali aenguɛ. E siman afuɛ trele nga i nun yɛ Zoova nin Abraamu be trali aenguɛ sɔ’n. Like nga e si i’n yɛle kɛ, afuɛ nga be flɛ 1943 nun naan y’a ju Klist blɛ su’n, Abraamu tuli Aran lɛ. Ɔ ɔli Kanaan mɛn’n nun Efrati nzue’n i sin lɔ. Kɛ Abraamu yoli sɔ’n, yɛ aenguɛ mɔ Ɲanmiɛn nin i be trali’n, be boli i su dilɛ bo ɔ. I blɛ sɔ’n nun’n, nn Abraamu lɛ afuɛ 75.
10. (a) ?Wafa sɛ yɛ Abraamu kleli kɛ ɔ lafi Zoova su ɔ? (b) ?Ngue yɛ Zoova yoli naan b’a wun bla’n i osu’n i wlɛ ɔ?
10 Nda nga Zoova tali Abraamu’n, Zoova kan flannin nun kpɛ sunman. I kpɛ kwlaa sɔ’n nun’n, ɔ kannin ndɛ uflɛ fa tuli nda sɔ m’ɔ tali’n i ɲin. (Bob. 13:15-17; 17:1-8, 16) Abraamu lafili Zoova su. Ɔ maan, ɔ kplinnin su kɛ ɔ́ fɛ́ i wa kunngba cɛ’n ɔ́ yí tɛ mán Zoova. Abraamu i ayeliɛ sɔ’n ti’n, Zoova kannin ndɛ kun kleli i. Ndɛ sɔ’n kle kɛ aenguɛ ng’ɔ nin Abraamu be trali’n, ɔ su kaman ngbɛn. (An kanngan Bo Bolɛ 22:15-18, ɔ nin Ebre Mun 11:17, 18 be nun.) Kɛ Zoova nin Abraamu be boli aenguɛ mɔ be trali’n i su dilɛ bo’n, Zoova kannin ndɛ wie mun ekun naan b’a wun bla’n i osu’n i wlɛ. Osu sɔ’n, ɔ́ fín Abraamu i anunman’m be nun yɛ ɔ́ trɛ́. I nunfuɛ’m bé yó famiɛn, bé núnnún Ɲanmiɛn i kpɔfuɛ mun. Ɔ maan, sran kpanngban be liɛ yó ye.
11, 12. (a) ?Wafa sɛ yɛ Ɲanmiɛn Ndɛ’n kle kɛ aenguɛ nga Ɲanmiɛn nin Abraamu be trali’n i su kpɛnlɛ danfuɛ’n, ɔ o siɛn ɔn? (b) ?Ngue yɛ i sɔ’n kle e ɔ?
11 Kɛ Abraamu i osu nunfuɛ’m be trannin mɛn nga Zoova seli kɛ ɔ́ fá mán be’n i nun lɔ’n, aenguɛ ng’ɔ nin Abraamu be trali’n, ɔ kpɛnnin su. Sanngɛ, Ɲanmiɛn Ndɛ’n kle kɛ aenguɛ sɔ’n i su kpɛnlɛ danfuɛ’n, ɔ o siɛn. (Gal. 4:22-25) Pɔlu yiyili nun kɛ Abraamu i osu nga Ɲanmiɛn kɛnnin i ndɛ’n, yɛle Klist. Sanngɛ, sran 144.000 mɔ Ɲanmiɛn kpali be sieli be ngunmin’n, be ti Abraamu i osu nunfuɛ wie. (Gal. 3:16, 29; Ngl. 5:9, 10; 14:1, 4) Bla mɔ Ɲanmiɛn kɛnnin i ndɛ Edɛni fie’n nun lɔ’n kusu’n, yɛle Ɲanmiɛn i anuannzɛ’n i bue ng’ɔ o ɲanmiɛn su lɔ’n. Anuannzɛ sɔ’n i nunfuɛ mun yɛle anzi mun. Ɲanmiɛn Ndɛ’n flɛ bla sɔ’n kɛ “Zerizalɛm ng’ɔ o nyanmiɛn su lɔ’n.” (Gal. 4:26, 31) Aenguɛ nga Zoova nin Abraamu be trali’n, ɔ kle kɛ bla’n i osu’n, ɔ́ wá yó asiɛ’n i sufuɛ’m be kwlaa be ye.
12 Aenguɛ nga Ɲanmiɛn nin Abraamu be trali’n, ɔ kle kɛ Ɲanmiɛn wá síe famiɛn kun. Kpɛkun, ɔ́ fá sran wie mun naan be nin famiɛn’n be di famiɛn ɲanmiɛn su lɔ. (Ebr. 6:13-18) ?Sanngɛ, afuɛ nɲɛ yɛ bé dí aenguɛ sɔ’n i su ɔ? Bo Bolɛ 17:7 waan “aenguɛ sɔ’n ɔ lɛ-man awieliɛ.” Ɔ maan, aenguɛ sɔ’n ɔ́ ká lɛ lele Ɲanmiɛn i famiɛn’n, ɔ́ núnnún i kpɔfuɛ mun. Kpɛkun, ɔ́ yó asiɛ’n i sufuɛ’m be kwlaa be ye tititi. (1 Kor. 15:23-26) Nanwlɛ, aenguɛ nga Zoova nin Abraamu be trali’n, ɔ su kaman ngbɛn. Ɔ kle weiin kɛ Zoova wá yó maan i klun sa’n, ɔ́ kpɛ́n su. Kpɛkun, sran kpa’m bé ‘yí asiɛ’n, bé síe i.’—Bob. 1:28.
AENGUƐ TRALƐ KUN M’Ɔ KLE KƐ FAMIƐN DIWLƐ’N Ɔ́ KÁ LƐ TITITI’N
13, 14. ?Ngue yɛ aenguɛ nga Ɲanmiɛn nin Davidi be trali’n, ɔ kle ɔ?
13 Nda nga Zoova tɛli i Edɛni fie’n nun lɔ’n, ɔ nin aenguɛ ng’ɔ nin Abraamu be trali’n, be kle like kun. Be kle kɛ Zoova i famiɛn bia’n, ɔ taka ndɛ nanwlɛ’n su tititi. Ndɛ nanwlɛ kunngba’n, i su yɛ Mɛsi i famiɛn dilɛ’n ɔ taka ɔ. (Jue. 89:15) Famiɛn dilɛ sɔ’n, ɔ́ ká lɛ tititi, ɔ su saciman le. Aenguɛ nga Zoova nin sran kun ekun be trali’n, ɔ kle sɔ weiin.
14 Zoova nin Davidi be trali aenguɛ. Kɛ ɔ́ yó sɔ’n, nn Davidi ti Izraɛli famiɛn. (An kanngan 2 Samiɛl 7:12, 16 nun.) Zoova seli Davidi kɛ Mɛsi’n, ɔ́ fín i osu’n nun. (Lik 1:30-33) I lɛ’n nun’n, Zoova w’a kle awlo nga i nun yɛ Mɛsi’n, ɔ́ bá’n. Mɛsi sɔ’n yɛ Ɲanmiɛn wá “kpɛ́ i” kɛ ɔ yo famiɛn ɔn. (Eze. 21:30-32) Zezi m’ɔ fin Davidi osu’n nun’n, ɔ́ yó famiɛn titi. Afin Ɲanmiɛn Ndɛ’n waan: “Sɛ i osu’n nunfuɛ tú famiɛn bia’n su’n, nn wia’n nunman lɛ kun.” (Jue. 89:34-37) Nanwlɛ, Ɲanmiɛn Sielɛ’n su saciman le. Yɛ ɔ́ yó sran’m be ye tititi.
AENGUƐ TRALƐ KUN M’Ɔ KLE KƐ FAMIƐN’N Ɔ́ YÓ ƝANMIƐN ƝRUN JRANFUƐ’N
15-17. (a) ?Junman benin yɛ famiɛn’n, ɔ́ wá dí i kɛ Mɛlkizedɛki liɛ’n sa mɔ Ɲanmiɛn nin i be trɛli i su aenguɛ ɔ? (b) ?Ngue ti yɛ Zezi yó Ɲanmiɛn ɲrun jranfuɛ kɛ Mɛlkizedɛki liɛ’n sa ɔ?
15 Aenguɛ nga Ɲanmiɛn nin Abraamu be trali’n, ɔ nin aenguɛ ng’ɔ nin Davidi be trali’n, be kle kɛ bla’n i osu’n ɔ́ yó famiɛn. Sanngɛ, nán famiɛn junman’n i ngunmin yɛ ɔ́ dí ɔ. Ɔ́ yó Ɲanmiɛn ɲrun jranfuɛ wie. Afin, kɛ ɔ ko yo naan fɔ’n w’a tu sran’m be nun’n, naan b’a kaci Ɲanmiɛn i mma mun’n, ɔ fata kɛ be yi be ti tɛ. I sɔ’n ti’n, Zoova tali bla’n i osu’n i nda. Ɔ tɛli i nda kɛ ɔ́ yó i ɲrun jranfuɛ m’ɔ́ ká lɛ titi kɛ Mɛlkizedɛki liɛ’n sa.
16 Zoova kan kleli Famiɛn Davidi kɛ ɔ́ wá tá Zezi i nda like nɲɔn su. I klikli’n yɛle kɛ, ɔ́ sé Zezi kɛ ɔ “tran ase [i bɔbɔ Ɲanmiɛn i] fama su” lele maan ɔ yi i kpɔfuɛ’m be ase naan ɔ tia be su. I nɲɔn su’n, ɔ́ tá Zezi i nda sé i kɛ “a ti Nyanmiɛn nyrun jranfuɛ bɔ á ká lɛ titi kɛ Mɛlkizedɛk liɛ’n sa.” (An kanngan Jue Mun 110:1, 2, 4 nun.) ?Ngue ti yɛ Zezi yó Ɲanmiɛn ɲrun jranfuɛ kɛ “Mɛlkizedɛk liɛ’n sa” ɔ? Yɛle kɛ, kwlaa naan Izraɛlfuɛ’m b’a ko tran mɛn nga Ɲanmiɛn seli kɛ ɔ́ fá mán be’n i nun’n, Mɛlkizedɛki yoli Salɛm famiɛn. I kunngba’n, ɔ yoli “Nyanmiɛn bɔ like fi nun-mɛn i sin’n i nyrun jranfuɛ.” (Ebr. 7:1-3) Ɲanmiɛn bɔbɔ yɛ ɔ sieli Mɛlkizedɛki sɔ ɔ. Mɛlkizedɛki kunngba cɛ, yɛ Biblu’n kɛn i ndɛ kɛ blɛ kunngba nun’n, ɔ yoli famiɛn nin Ɲanmiɛn ɲrun jranfuɛ ɔ. Asa ekun’n, sran fi w’a diman junman sɔ’n i laa, yɛ sran fi w’a sinmɛn i ja nun. I sɔ’n ti’n, be kwla se kɛ ɔ ti ‘Nyanmiɛn ɲrun jranfuɛ b’ɔ́ ká lɛ titi.’
17 Nda mɔ Ɲanmiɛn tali Zezi ti’n, Ɲanmiɛn bɔbɔ sieli Zezi kɛ ɔ yo i ɲrun jranfuɛ. Yɛ Zezi “ká lɛ titi kɛ Mɛlkizedɛk liɛ’n sa.” (Ebr. 5:4-6) Nda sɔ mɔ Ɲanmiɛn tali’n, ɔ kle ekun kɛ Mɛsi i famiɛn dilɛ’n ti’n, like nga ti yɛ Ɲanmiɛn yili asiɛ’n nin sran’n, ɔ́ kpɛ́n su.
FAMIƐN DIWLƐ’N Ɔ TAKA NDA NGA ƝANMIƐN TALI BE’N BE SU
18, 19. (a) ?Mɛsi’n i famiɛn dilɛ’n i su like benin yɛ aenguɛ nga Ɲanmiɛn nin sran wie’m be trali’n, be kle e ɔ? (b) ?Kosan benin yɛ like suanlɛ ng’ɔ́ bá lɛ’n, ɔ́ wá tɛ́ su ɔ?
18 Like suanlɛ nga nun’n, e kannin aenguɛ wie mɔ Ɲanmiɛn nin sran wie’m be trali’n be ndɛ. E wunnin kɛ aenguɛ tralɛ sɔ’m be nuan yia Mɛsi i famiɛn dilɛ’n su, naan i famiɛn dilɛ sɔ’n ká lɛ tititi. Nda nga Zoova tɛli i Edɛni fie’n nun lɔ’n, ɔ kle kɛ bla’n i osu’n ti’n, like nga ti yɛ ɔ yili asiɛ’n nin sran mun’n, ɔ́ kpɛ́n su. Aenguɛ ng’ɔ nin Abraamu be trali’n i kusu ti’n, e si bla’n i osu’n, yɛ e si junman ng’ɔ́ wá dí’n.
19 Aenguɛ nga Ɲanmiɛn nin Davidi be trali’n, ɔ kle kɛ Mɛsi’n fín Davidi osu’n nun. Ɔ kle ekun kɛ, Zezi wá dí famiɛn tititi. Ɔ maan, Ɲanmiɛn klun sa’n ɔ́ kpɛ́n su. Asa ekun’n, Ɲanmiɛn tali Zezi i nda kɛ ɔ́ yó i ɲrun jranfuɛ kɛ Mɛlkizedɛki liɛ’n sa. Sanngɛ, nán Zezi ngunmin yɛ ɔ́ yó maan fɔ’n, tu sran’m be nun ɔn. Ɲanmiɛn wá kpá sran wie mun naan be nin Zezi be di famiɛn’n. Kpɛkun, bé káci Ɲanmiɛn ɲrun jranfuɛ wie. ?Wan mun yɛ Ɲanmiɛn wá kpá be kɛ be di i sɔ junman’n niɔn? Like suanlɛ ng’ɔ́ bá lɛ’n, ɔ́ wá tɛ́ su.
[Kuku, bue 15]
LIKE NGA ƝANMIƐN YÓ NAAN I KLUN SA’N W’A KPƐN SU’N
Nda nga Ɲanmiɛn tɛli i Edɛni fie’n nun lɔ’n, ɔ kle kɛ Ɲanmiɛn wá síe famiɛn diwlɛ kun. Famiɛn diwlɛ sɔ’n ti’n, like nga ti yɛ Ɲanmiɛn yili asiɛ’n nin sran’n, ɔ́ kpɛ́n su. I sɔ’n ti’n, Ɲanmiɛn nin sran wie’m be trali aenguɛ fanunfanun. Aenguɛ tralɛ nsiɛn yɛ’n be nuan yia Ɲanmiɛn Sielɛ’n su:
AENGUƐ NGA ƝANMIƐN NIN ABRAAMU BE TRALI’N
I TRAFUƐ MUN: Zoova nin Abraamu.
LIKE NGA TI YƐ BE TRALI’N: ‘Bla’n i osu’ mɔ Bo Bolɛ 3:15 kɛn i ndɛ’n, ɔ́ yó Ɲanmiɛn Sielɛ’n i su famiɛn.
AENGUƐ NGA ƝANMIƐN NIN IZRAƐLIFUƐ’M BE TRALI’N
I TRAFUƐ MUN: Zoova nin Izraɛlifuɛ mun.
LIKE NGA TI YƐ BE TRALI’N: ‘Bla’n i osu’n,’ ɔ su saciman. Kpɛkun sɛ osu sɔ’n ɔ ba’n, sran’m bé wún i wlɛ kɛ i yɛ ɔ ti Mɛsi’n niɔn.
AENGUƐ NGA ƝANMIƐN NIN DAVIDI BE TRALI’N
I TRAFUƐ MUN: Zoova nin Davidi.
LIKE NGA TI YƐ BE TRALI’N: Mɛsi’n, ɔ́ fín Davidi i osu’n nun naan i famiɛn dilɛ’n, ɔ́ ká lɛ tititi.
AENGUƐ NGA ƝANMIƐN NIN SRAN M’Ɔ́ WÁ YÓ I ƝRUN JRANFUƐ KƐ MƐLKIZEDƐKI SA’N BE TRALI’N
I TRAFUƐ MUN: Zoova nin Zezi.
LIKE NGA TI YƐ BE TRALI’N: Zezi m’ɔ ti ‘bla’n i osu’n’ i nun sran cinnjin kpafuɛ’n, ɔ́ yó famiɛn nin Ɲanmiɛn ɲrun jranfuɛ tititi.
AENGUƐ UFLƐ’N
I TRAFUƐ MUN: Zoova nin Izraɛlifuɛ mɔ be ti i liɛ sakpa’n.
LIKE NGA TI YƐ BE TRALI’N: Ɲanmiɛn wá fá Klistfuɛ 144.000 yó i mma mun. Kpɛkun, bé káci bla’n i “osu” wie.
AENGUƐ NGA ZEZI NIN I SƆNNZƆNFUƐ WIE’M BE TRALI’N
I TRAFUƐ MUN: Zezi nin Izraɛlifuɛ mɔ be ti Ɲanmiɛn liɛ sakpa’n.
LIKE NGA TI YƐ BE TRALI’N: Klistfuɛ wie’m be nin Zezi bé dí famiɛn. Kpɛkun be kunngba’n, bé yó Ɲanmiɛn ɲrun jranfuɛ ɲanmiɛn su lɔ.