BIBLU’N I SU KOSAN’M BE SU TƐLƐ

?Zezi cɛnnin sran wie mun sakpa?

Biblu’n kan kɛ Zezi cɛnnin sran wie mun. Zezi yoli sɔ sakpa, nán ngua dilɛ ndɛ ɔ. Afin lika nga Zezi yoli i sɔ sa mun’n, Biblu’n bo be su. I wie yɛle kɛ, afuɛ nga be flɛ i 31 nun cɛn kun’n, Zezi nin sran kaka kpa be fin Kapɛrnaɔmu be su kɔ klɔ mɔ be flɛ i Nain’n su. Kɛ bé wá jú klɔ’n i anuan’n nun lɛ’n, be nin sran kpanngban kpa b’a yia. Sran sɔ’m be nin saka kun be su kɔ asieliɛ. Zezi jrannin be. Kpɛkun, ɔ cɛnnin sran m’ɔ wuli’n. Sran kpanngban kpa sɔ mɔ be nin saka’n be su kɔ’n, be ɲrun lɛ yɛ Zezi cɛnnin sran m’ɔ wuli’n niɔn. Ɔ maan, a kwla lafi su kɛ Zezi yoli sɔ sakpa.​—An kanngan Lik 7:11-15 nun.

Kɛ Zezi i janvuɛ Lazali wuli mɔ be sieli i’n, ɔ dili cɛn nnan. Sanngɛ Zezi cɛnnin i. Zezi yoli sa sɔ’n sran kpanngban kpa be ɲrun. Ɔ maan, a kwla lafi su kɛ ɔ yoli sɔ sakpa wie.—An kanngan Zan 11:39-45 nun.

?Ngue ti yɛ Zezi cɛnnin sran mun ɔn?

Sran’m be yoli Zezi i annvɔ. I ti yɛ ɔ cɛnnin be sran nga be wuli mun ɔn. Asa ekun’n, Zezi yoli sɔ naan ɔ́ klé kɛ i Si Ɲanmiɛn mɔ nguan’n i bo’n wo i wun lɔ’n, ɔ tinnin i kɛ ɔ cɛn sran mun.​—Kanngan Zan 5:21, 28, 29 nun.

Cɛn wie lele’n, Zezi wá cɛ́n sran kpanngban kpa ekun. Sa tɛ yofuɛ mɔ b’a kwlá siman Ɲanmiɛn i su ndɛ nanwlɛ’n bɔbɔ’n, Zezi cɛ́n be wie. Kpɛkun, bé klé be Ɲanmiɛn i su like naan be klo i. E lafi su kɛ Zezi wá cɛ́n sran mun sakpa. Afin i nun m’ɔ o asiɛ’n su wa’n, ɔ cɛnnin sran wie mun.​—Kanngan Sa Nga Be Yoli’n 24:15 nun.

Sɛ a kunndɛ kɛ á sí nun ekun’n, nian fluwa ng’ɔ o yɛ’n i ndɛ tre 7 nun. Zoova i Lalofuɛ mun yɛ be yili ɔ.

A kwla ko fɛ i ɛntɛnɛti lika nga nun lɔ: www.jw.org/bci