NDƐ NG’Ɔ KLƐ FLUWA’N SU’N | A KWLA FA Ɔ WUN MANTAN ƝANMIƐN

?A bu i kɛ a nin Ɲanmiɛn amun afiɛn mantan?

“Kɛ sran kun nin Ɲanmiɛn be afiɛn mantan’n, sran sɔ’n i wla gua ase. I wun usumɛn i. Ɔ wun i wlɛ kɛ Ɲanmiɛn niɛn i lika.”​—KLISTƆFU. Ɔ fin GHANA.

“Ɲanmiɛn wun sa nga be o min su’n. Ɔ fɔnvɔ min. Like nga n sunnzunman bɔbɔ’n, ɔ fa man min.”​—ANA. Ɔ le afuɛ 13, yɛ ɔ fin AMLƐNKƐN MƐN’N NUN.

“Kɛ n si kɛ e nin Ɲanmiɛn e afiɛn mantan’n, ɔ yo min fɛ dan. Min wla gua ase.”​—ZINA. Ɔ le afuɛ 45, yɛ ɔ fin ZAMAIKI.

Kɛ nga Klistɔfu nin Ana, nin Zina be fa kɛnnin i lɛ’n sa’n, sran sunman be lafi su kpa kɛ be nin Ɲanmiɛn be afiɛn mantan naan Ɲanmiɛn ti be janvuɛ. ?Yɛ wɔ li, a lafi su kɛ a nin Ɲanmiɛn be afiɛn mantan wie? ?Annzɛ kusu’n, a kunndɛ kɛ á fá ɔ wun mántan Ɲanmiɛn naan Ɲanmiɛn fɛ i wun mantan wɔ wie? Atrɛkpa kusu’n, a usa ɔ wun kɛ: ‘?Ɲanmiɛn mɔ like fi nunmɛn i sin’n, ń yó sɛ yɛ naan m’an fa min wun m’an mɛntɛn i?’

A KWLA FA Ɔ WUN MANTAN ƝANMIƐN

Biblu’n kle kɛ klɔ sran kwla fɛ i wun mantan Ɲanmiɛn. I waan Abraamu fɛli i wun mantannin Ɲanmiɛn. Ɔ maan, Ɲanmiɛn flɛli i kɛ: “Min janvuɛ.” (Ezai 41:8) Zak 4:8 kusu se kɛ: “An fa amun wun mantan Nyanmiɛn, yɛ i kusu fɛ́ i wun mántan amun-ɔn.” Ndɛ sɔ’n kle weiin kɛ klɔ sran’n, ɔ kwla fɛ i wun mantan Ɲanmiɛn. Kpɛkun, ɔ kaci Ɲanmiɛn i janvuɛ. Sanngɛ a kwla usa ɔ wun kɛ: ‘?Kɛ mɔ sran fi kwlá wunman Ɲanmiɛn’n niɔn, wafa sɛ yɛ n kwla fa min wun ‘mɛntɛn i’ ɔ?

Kɛ ɔ ko yo naan y’a tɛ su’n, maan e bu like nga sran nɲɔn be yo mɔ be kaci janvuɛ’n, i akunndan e nian. I klikli nun’n, be bo be dunman kle be wiengu. I sin’n, be koko yalɛ tikatika. Be kan be klun ndɛ kle be wiengu. Be yo be wiengu ye. Kpɛkun, be janvuɛ’n w’a tra kpa. Sɛ é kwlá sé’n, like kunngba’n yɛ ɔ fata kɛ sran kun yo naan ɔ nin Ɲanmiɛn be afiɛn w’a mantan ɔn.