NDƐ NG’Ɔ KLƐ FLUWA’N SU’N | A KWLA FA Ɔ WUN MANTAN ƝANMIƐN
Be wun mɔ be fa mantan Ɲanmiɛn’n, ɔ ti kpa dan
?Ngue yɛ sran kun yó naan ɔ nin Ɲanmiɛn be afiɛn w’a mantan ɔn? E kannin like nsan m’ɔ fata kɛ sran’n yo’n be ndɛ:
1. Ɔ fata kɛ ɔ si Ɲanmiɛn i dunman’n naan ɔ fa flɛ i.
2. Ɔ fata kɛ ɔ nin Ɲanmiɛn be koko yalɛ titi. Yɛle kɛ, maan ɔ srɛ Ɲanmiɛn. Kpɛkun, maan ɔ suan Biblu’n nun like.
3. Ɔ fata kɛ ɔ yo like ng’ɔ jɔ Zoova klun’n i titi.
?Kɛ a nian ɔ klun lɔ siin’n, a yo ninnge nsan sɔ mun? ?Annzɛ kusu’n, be nun kun o lɛ m’ɔ fata kɛ a bo ɔ ɲin ase yo ɔ? Bo ɔ ɲin ase yo naan nian. Á wún i su mmlusuɛ nga á ɲɛ́n i’n.
Be flɛ bla kun kɛ Zenifɛli. Ɔ tran Amlɛnkɛn’m be lɔ. Ɔ seli kɛ: “Kɛ sran kun miɛn i ɲin yo like kwlaa ng’ɔ kwla yo naan ɔ nin Ɲanmiɛn be afiɛn w’a mantan’n, ɔ yomɛn i nsisɔ le. Afin kɛ ɔ yo sɔ’n, ɔ si Ɲanmiɛn kpa, ɔ lafi i su kpa. Kpɛkun, ɔ klo i dan kpa. Nanwlɛ, be wun mɔ be fa mantan Ɲanmiɛn’n, ɔ ti kpa dan!”
Sɛ a klo kɛ á fá ɔ wun mántan Ɲanmiɛn’n, Zoova i Lalofuɛ’m be kwla uka wɔ. Bé klé wɔ Biblu’n nun like. A su tuaman be kalɛ. Asa ekun’n, a kwla kɔ be aɲia’m be bo.a Sɛ a yo sɔ’n, a nin be nun wie’m bé trá janvuɛ. Ɔ maan, ndɛ nga jue tofuɛ’n kannin’n, á kwlá kán wie. Ɔ seli kɛ: “Nyanmiɛn i tranlɛ bɔ e nin wɔ tran’n ɔ ti min anyanbeun like.”—Jue Mun 73:28.
[Ja ngua lɛ ndɛ’n]
a Sɛ ɔ waan be kle wɔ Biblu’n nun like’n, yɛ sɛ a kunndɛ kɛ á sí ɔ tranwlɛ lɔ lika nga Ɲanmiɛn Sielɛ Sua’n wo’n, usa sran ng’ɔ mannin wɔ fluwa’n. Annzɛ kusu’n, kɔ ɛntɛnɛti adrɛsi nga su: www.jw.org/bci. Kpɛkun, tin ja ngua lɛ lika nga be klɛli kɛ USA E OSU’N i su.