BIBLU’N I SU KOSAN’M BE SU TƐLƐ
?Ngue ti yɛ sran sunman be se kɛ Ɲanmiɛn yɛ ɔ yili ninnge kwlaa ɔ?
Nguan’n ti abonuan like. ?Nɛ́n i ɔ?
I afuɛ kɔe 3.000 yɛ, jue tofuɛ kun seli Ɲanmiɛn kɛ: “Ń yó wɔ mo yilɛ klanman bɔ a yili min’n ti.” (Jue Mun 139:14) Wafa nga ba’m be yo kpa be nin’m be ku sɛ’n nun lɔ lele naan b’a wu be’n, bu i akunndan nian. Ɔ yo ɲɛnmɛn dan. ?Nɛ́n i ɔ? I sɔ’n ti’n, sran sunman be se kɛ Ɲanmiɛn yɛ ɔ yili ninnge kwlaa ɔ.—An kanngan Jue Mun 139:13-17, ɔ nin Ebre Mun 3:4 be nun.
Sran ng’ɔ yili nglo nin asiɛ’n, i wun lɔ yɛ nguan’n i bo’n wo ɔ. (Jue Mun 36:10) Asa ekun’n, ɔ kɛnnin i bɔbɔ i wun ndɛ kleli sran mun.—An kanngan Ezai 45:18 nun.
?Nnɛn yɛ ɔ kacili sran ɔn?
Klɔ sran’n i wunnɛn’n i lika wie’m be o lɛ’n, nnɛn’m be le wie. I sɔ’n kle kɛ, Ɲanmiɛn yili sran nin nnɛn mun naan be tran asiɛ’n su. Sanngɛ, nán nnɛn yɛ ɔ kacili sran ɔn. Fa yɛ Ɲanmiɛn fa yili sran ɔn.—An kanngan Bo Bolɛ 1:24; 2:7 nun.
Sran nin nnɛn’m be timan kun. Sran’m be si sa. Be kwla klo be wiengu, yɛ be kwla fa be wun be mantan Ɲanmiɛn. Asa ekun’n, Ɲanmiɛn yili sran mun naan be tran nguan nun tititi. W’a yiman nnɛn’m be sɔ wie. Sɛ sran’m be wu’n, i sɔ’n fin sran klikli nga Ɲanmiɛn yili i’n. Yɛle kɛ, i ɲin w’a yiman Ɲanmiɛn.—An kanngan Bo Bolɛ 1:27; 2:15-17 nun.