BIBLU’N I SU KOSAN’M BE SU TƐLƐ
?Mɛn nga e ko di’n i ngba yɛle nga?
?Cɛn wie’n, ɔ yo wɔ kɛ e nguan ɲanman’n ti tika?
Titi’n, e wun kɛ sran’m be yiyi be ɲin su, be di junman, be ja bla annzɛ bian, be wu ba. Kɛ ɔ́ cɛ́ kɔ́’n, kpɛkun b’a yo oke. Ɔ maan, sran wie’m be usa be wun kɛ mɛn nga e ko di’n i ngba yɛle nga. Atrɛkpa’n, w’a usa ɔ wun sɔ wie le. (Zɔb 14:1, 2) Biblu’n kle kɛ akunndanfuɛ kun usɛli i wun sɔ wie.—An kanngan Akunndanfuɛ’n 2:11 nun.
?Ngue ti yɛ e o asiɛ’n su ɔ? Kɛ ɔ ko yo naan y’a tɛ su’n, ɔ fata kɛ e dun mmua e si e finwlɛ’n. Fluwa sifuɛ wie’m be suannin sran i wunnɛn’n ɔ nin i ti nun miɛn’n, be su like. Be wunnin kɛ Ɲanmiɛn mɔ i ngwlɛlɛ’n cɛnnin’n, yɛ ɔ yili sran ɔn. (An kanngan Jue Mun 139:15 nun.) Like kun ti yɛ Ɲanmiɛn yili sran ɔn. Sɛ e wun i sɔ liɛ’n i wlɛ’n, i sɔ’n yó e ye dan.
?Ngue ti yɛ Ɲanmiɛn yili sran ɔn?
Kɛ Ɲanmiɛn yili Adam nin Ɛvu’n, ɔ boli muae mannin be. Kpɛkun, ɔ mannin be junman cinnjin kun. Ɲanmiɛn kunndɛli kɛ be wu ba naan be sɔn, naan asiɛ’n kaci lika klanman, naan be tran su tititi.—An kanngan Bo Bolɛ 1:28, 31 nun.
Kɛ Adam nin Ɛvu be yoli ɲin kekle Ɲanmiɛn su’n, like nga Ɲanmiɛn sunnzunnin’n, w’a yoman ye. Sanngɛ, Ɲanmiɛn w’a kaciman ndɛ ng’ɔ kannin’n. Biblu’n kle e kɛ Ɲanmiɛn su sɛsɛ i sufuɛ nanwlɛfuɛ mun. Yɛ ɔ su fa ajalɛ wie mun naan cɛn wie lele’n, like nga ti yɛ ɔ yili asiɛ’n, ɔ kpɛn su. Ɲanmiɛn kunndɛ kɛ ɔ liɛ yo ye. (An kanngan Jue Mun 37:29 nun.) I sɔ’n ti, suan Biblu’n nun like. I liɛ’n, á sí like ng’ɔ fata kɛ a yo naan kɛ Ɲanmiɛn klun sa’n wá kpɛ́n su’n, ɔ liɛ w’a yo ye wie’n.