Sran’m be kloman junman kekle’m be dilɛ kun

Andɛ sran kpanngban be ti kɛ Alɛksi sa. Be kloman junman kekle dilɛ. Be flɛ bian kun kɛ Aarɔn. Ɔ ti mankanninsiɛn. Ɔ seli kɛ: “Junman nga sran’m be bumɛn i junman nanndoliɛ’n, sran sunman be klomɛn i dilɛ. Ɔ maan, kɛ bé dí i sɔ junman’n, be se be klun lɔ kɛ: ‘Mianlɛ ti yɛ n di junman nga ɔ. Sɛ n ɲan junman uflɛ’n, ń kɔ́ min ɲrun.’”

?Ngue ti yɛ sran sunman be kloman junman kekle’m be dilɛ ɔ? Wie liɛ’n, like nga be wun i’n ti ɔ. Televiziɔn nin ɛntɛnɛti, annzɛ fluwa’m be nun’n, be kle sran wie mɔ be diman junman kekle, sanngɛ be tran pɔɔ nun’n. Be kle be kɛ i sɔ’n yɛ ɔ ti mɛn dilɛ’n i “kpafuɛ’n” niɔn. Be flɛ bian kun kɛ Matie. Ɔ siesie sua’m be nun ninnge nga be saci’n, be ye. Ɔ seli kɛ: “Sran’m be bu i kɛ sran ng’ɔ di junman kekle’n, ɔ fɛ ngbɛn.” Be flɛ bian kun ekun Seni. Ɔ di junman kunngba sɔ’n wie. Ɔ seli kɛ: “Sran’m be kloman trekle junman dilɛ kun.”

Sran wie’m be liɛ’n, be klo junman kekle’m be dilɛ. Yɛ be liɛ yo ye. Be flɛ gbanflɛn kun kɛ Daniɛli. Ɔ le afuɛ 25, yɛ ɔ ti sua kplanfuɛ. Ɔ seli kɛ: “Junman kekle dilɛ’n i su mmlusuɛ nga be ɲɛn i’n ti dan. I li sɛ junman nga sran kun di’n ɔ yo sran uflɛ’m be ye’n, yɛ ɔ ti kpa dan ɔn.” Be flɛ gbanflɛn kun ekun kɛ Andre. Ɔ le afuɛ 23. Ɔ seli kɛ: “Junman dilɛ’n man aklunjuɛ. Junman nga i dilɛ’n timan kekle’n, kɛ ɔ́ cɛ́ kɔ́’n, sran’n i ɲrun yo i koun.”

?Ngue ti yɛ sran kɛ Daniɛli nin Andre sa’n, be bu junman kekle dilɛ’n i like kpa ɔ? Yɛle kɛ be nanti ndɛ nga Biblu’n kan’n su. Biblu’n kleman mlɔnmlɔn kɛ junman kekle dilɛ’n ti like tɛ. Sanngɛ, ɔ wla sran’m be fanngan kɛ be yo juejuefuɛ. I kpa bɔbɔ’n, ɔ kle e like ng’ɔ fata kɛ e yo naan y’a klo junman nga e di’n.

?Ndɛ benin yɛ Biblu’n kan mɔ sɛ e nanti su’n, é kló junman nga e di’n niɔn? Ndɛ akpasua ng’ɔ́ bá lɛ’n, ɔ́ wá klé e.