NDƐ NG’Ɔ KLƐ FLUWA’N SU’N | ?NGUE YƐ É YÓ NAAN Y’A YACI KOKOLƐ Ɔ?
Sran kwlakwla koko!
“N ɔli gua dilɛ. Sanngɛ, bɔnbɔn ngunmin yɛ n wunnin i ɔ. Be guali be gua’n su dan kpa! Kɛ aliɛ’n cɛnnin’n, like nga be kwla to naan b’a di’n i kwlakwla wieli.”—Pɔlu, ɔ fin Zimbabue.
“Min wun’n trannin min ase. Kpɛkun, ɔ seli min kɛ ɔ jaman min kun. ?Yɛ ngue yɛ ń yó ɔ? ?Min mma’m bé yó be liɛ sɛ?”—Zanɛti, ɔ fin Etazini.
“Kɛ sirɛni’n tɛli’n, n wanndili ndɛndɛ n ko fiali, yɛ bɔmbu’n tɛli ɔ. Min wun usuli min lelee.”—Alona, ɔ fin Izraɛli.
Sran kwlakwla be koko. Afin, lika’n w’a yo “kekle.” (2 Timote 3:1) Sran kpanngban be di sika yalɛ, yasua wie’m be nin be yi’m be yra, alɛ tɔ lika’m be nun, tukpacɛ tɛtɛ’m be tru cɛn kwlakwla, yɛ ninnge kɛ asiɛ’n i kejelɛ’n sa’n, annzɛ nzue’n m’ɔ tɔ dan’n sa’n, be saci ninnge kpanngban. Sanngɛ nɛ́n i ngba ɔ. Sran wie’m be koko kɛ: ‘?Cɛn wie lele tukpacɛ nga be flɛ i kɛ kansɛli’n i wie su yoman min?’ Wie mun ekun be se kɛ: ‘?Min anunman’m be blɛ su’n, wafa sɛ yɛ mɛn’n yó ɔ?’
Suklu lɔ annzɛ junman’n su lɔ’n, wie liɛ’n, be bo e ta be nian. Blɛ sɔ’n nun’n, e koko. Wie liɛ ekun’n, e koko kɛ nán sa tɛ wie ɲan e. I sɔ’n ti, e sasa e wun. Sanngɛ kokolɛ dan ngboko’n, ɔ timan kpa. Koko nun wa’n, dɔɔtrɔ’m be fali be ɲin be sieli i sran kpɛnngbɛn 68.000 tra su be su. Be sieli i nzɔliɛ kɛ ngokɔɛ’n ti’n, be nun wie’m be kwla kpɛ kpo be wu. I sɔ sa’n m’ɔ kwla ju’n ti’n, Zezi seli kɛ: “?Amun nun onin yɛ i kokolɛ nun ɔ kwla guɛ i afuɛ’n su bɔ kan-an?” Kannzɛ e koko’n, e su kwlá guaman e afuɛ’n su bɔ kaan sa. I sɔ’n ti’n, Zezi seli ekun kɛ: “Nán an koko ninnge bɔ an lɛ-mɛn’n ti.” (Matie 6:25, 27) ?Ngue yɛ é yó naan y’a yaci kokolɛ ɔ?
Like nga é yó’n yɛle kɛ maan e fa ngwlɛlɛ e nanti, e lafi Ɲanmiɛn su, yɛ maan e lafi su kɛ cɛn wie lele e liɛ’n yó ye. Kannzɛ lika’n timan kekle e su dɔ nga su’n, sanngɛ sran fi simɛn i ɲrun lɔ sa. I sɔ’n ti’n, é wá kán Pɔlu nin Zanɛti, nin Alona mɔ lika’n yoli kekle be su’n, be ndɛ. Kpɛkun, é wún like nga be yoli naan b’a kokoman dan’n.