Awlo nun ndɛ’n i ti kokolɛ’n

Zanɛti seli kɛ: “Kɛ min si sacili’n w’a cɛman, min wun’n seli min kɛ w’a wun bla uflɛ. Kɛ ɔ seli min sɔ’n, w’a diman le nɲɔn. Ɔ isɛli i ninnge mun. Kpɛkun, ɔ tuli awlo’n nun. Ɔ yacili min nin e wa nɲɔn’n.” Kɛ ɔ́ kɔ́ i ɲrun’n, Zanɛti wa ɲannin junman. Ɔ nin i sɔ’n ngba’n, sika ng’ɔ ɲɛn i’n w’a sɔnman naan w’a kwla tua be sua’n i ti kalɛ’n. Sanngɛ, nán sika mɔ Zanɛti lemɛn i’n i ngunmin ti yɛ ɔ kokoli ɔ. I waan: “Siɛn’n, min kunngba yɛ n nian awlo’n i lika ɔ. I sɔ trɔ’n tin min su. Ɔ maan, min wla’n bo min wun dan. Ninnge nga awlo uflɛ nunfuɛ’m be to be man be mma mun’n, n kwlá toman naan min mma’m b’a ɲan wie. I sɔ’n yoli min ya dan. Lele nin andɛ’n, wafa nga sran’m be kwla bu m bɔbɔ nin min mma mun’n ti’n, n koko cɛn kwlakwla. N se min klun lɔ kɛ atrɛkpa’n, be se kɛ n siman bian ja ti yɛ min wun’n yacili min ɔn.”

Zanɛti srɛli Ɲanmiɛn titi kɛ ɔ suɛn i bo naan i wla’n gua ase, naan ɔ nin i be afiɛn’n mantan. I waan: “Kɛ kɔnguɛ afiɛn lika’n ko tɔ srololo’n, yɛ n koko dan ɔn. Kɛ ɔ yo sɔ’n, n srɛ Ɲanmiɛn. Yɛ n kanngan Biblu’n nun. Kpɛkun, m’an kwla lafi. Ndɛ nga n klo i kannganlɛ kpa’n yɛle ng’ɔ o Filipfuɛ Mun 4:6, 7 nun’n. Ɔ se kɛ: ‘Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase. Yɛ ɔ maan amun wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su bo-man, yɛ amun akunndan su sanngan-man.’ N srɛli Zoova kɔnguɛ sunman. Yɛ n wunnin kɛ ɔ fɔnvɔli min.”

Kɛ Zezi kán Ɲanmiɛn ndɛ oka’n su’n, Ɲanmiɛn srɛlɛ’n i su ndɛ ng’ɔ kannin’n, ɔ cici sran wla dan. Ɔ seli kɛ: “Amun Si si like nga amun sa miɛn i wun’n i sin naan amu’an se i.” (Matie 6:8) Sanngɛ, ɔ fata kɛ e srɛ Ɲanmiɛn. I yɛ ɔ ti like klikli’n ng’ɔ fata kɛ e yo naan y’a fa e wun y’a “mantan Nyanmiɛn” ɔn. Sɛ e srɛ Ɲanmiɛn’n, ɔ́ “fɛ́ i wun mántan” e.​—Zak 4:8.

Kɛ e srɛ Ɲanmiɛn’n, e wla gua ase. Sanngɛ, nɛ́n i ngba ɔ. Be nga be lafi Ɲanmiɛn su’n, Ɲanmiɛn “ti” be srɛlɛ’n. Kpɛkun, ɔ yo be ye. (Jue Mun 65:3) I sɔ’n ti, Zezi seli i sɔnnzɔnfuɛ mun kɛ be “srɛ Nyanmiɛn titi.” (Lik 18:1) Maan e srɛ Ɲanmiɛn titi kɛ ɔ suan e bo, yɛ ɔ fa e sie i atin’n su. Kɛ e srɛ sɔ’n, maan e lafi su kɛ Ɲanmiɛn yó sɔ sakpa. Ɔ fataman kɛ e bu e klun lɔ kaan sa kɛ Ɲanmiɛn su yoman e ye. Nanwlɛ, maan e “koko yalɛ kle Nyanmiɛn titi.” Sɛ e yo sɔ’n, é klé kɛ e lafi i su sakpa.​—1 Tɛsalonikfuɛ Mun 5:17.

?ƝANMIƐN SULAFILƐ’N I BO’N YƐLE BENIN?

Sran ng’ɔ lafi Ɲanmiɛn su’n, ɔ wun i wlɛ kɛ Ɲanmiɛn o lɛ sakpa. Ɔ maan, ɔ kunndɛ kɛ ɔ́ “sí” i. (Zan 17:3) Kɛ e suan Biblu’n nun like’n, yɛ e suan Ɲanmiɛn i silɛ ɔ. E wun i wlɛ kɛ Ɲanmiɛn si e tinuntinun naan ɔ kunndɛ kɛ ɔ́ súan e bo. Sanngɛ, Ɲanmiɛn silɛ’n, ɔ timɛn i su lafilɛ. Sran ng’ɔ lafi Ɲanmiɛn su’n, ɔ fɛ i wun mantan Ɲanmiɛn kpa yɛ i ɲin yi i. Titi’n, sran nga e si i kpa’n yɛ e fa e wun e mɛntɛn i ɔ. Nán cɛn kunngba kusu yɛ e kwla si sran kun ɔn. I kunngba’n yɛle Ɲanmiɛn liɛ’n. I sɔ’n ti’n, maan e suan Ɲanmiɛn silɛ titi. Yɛ maan e yo i “klun sa cɛn kwlaa.” Sɛ e yo sɔ’n, é wún kɛ ɔ suan e bo. Ɔ maan, é láfi ‘Ɲanmiɛn su kpa’ titi. (2 Korɛntfuɛ Mun 10:15; Zan 8:29) I sɔ yɛ Zanɛti yoli naan w’a kwla jran kekle ɔ.

Zanɛti waan: “Kɛ n wun wafa nga Zoova suan min bo’n, n lafili i su kpa ekun. Sa nga blɛ sunman be juli e su’n, be tinnin e su dan. E srɛli Zoova titi, yɛ ɔ suannin e bo cɛn kwlakwla. Sɛ Zoova w’a yoman sɔ’n, nn y’a kwlá jranman kekle. Kɛ min wla kpɛn wafa nga Zoova niannin min lika’n i su titi’n, n lɛ i ase. Ɔ suannin e bo titi blɛ ng’ɔ ti su’n i su. I dunman nun ti’n, e le janvuɛ kpa mun. Be yɛle e niaan Klistfuɛ mun. Be suannin min bo titi, yɛ be kleli min mma’m be ajalɛ kpa.”a

“Like nga ti yɛ Zoova kɛn i Malasi 2:16 nun kɛ ɔ “klo-man bla yralɛ’n,” m’an wun i wlɛ. Kɛ yasua annzɛ bla kun w’a yoman like fi mɔ be yrɛ i’n, i sɔ’n yo i ya dan. Min wun’n yacili min w’a di afuɛ kpanngban. Sanngɛ kɛ blɛ wie ju mɔ n wun kɛ ɔ nunman min wun lɛ’n, min wla bo min wun. Kɛ ɔ yo sɔ’n, n yo like ng’ɔ kwla ti sran wie i wun ɲanman nun’n. I sɔ yolɛ’n yoli min ye wie kpa titi.” Kɛ Ɲanmiɛn Ndɛ’n se kɛ maan e fa e wun mantan sran’n, i sɔ yɛ Zanɛti yoli ɔ. Ɔ maan, ɔ kwla jrannin kekle.b​—Nyanndra Mun 18:1.

Zanɛti waan: “Kɛ n si kɛ Ɲanmiɛn ‘ti aika’m be si, ɔ ti angboti bla’m be sin jranfuɛ’n,’ i sɔ’n fɔnvɔ min dan. Ɔ su yaciman e le kɛ min wun’n yoli’n sa.” (Jue Mun 68:6) Zanɛti si kɛ Ɲanmiɛn “laka-man sran fi.” Sanngɛ, ‘ɔ fa like man sran’m be kwlaa ɔ ijɔ-mɛn i sin.’ Yɛ ɔ suan e bo naan awlaboɛ’n w’a kunman e mlɔnmlɔn. Ɔ maan, “Nyanmiɛn b’ɔ kwla like kwlaa yo’n yɛ ɔ yo sa-a.”​—Zak 1:5, 13; 2 Korɛntfuɛ Mun 4:7.

Sa wie m’ɔ kwla ɲan e’n ti, wie liɛ’n, e koko. ?I lɛ’n nun’n, ngue yɛ é yó ɔ?