Maan e buabua e wun ikisa naan y’a kwla tran mɛn uflɛ’n nun lɔ wie
“Se be kɛ be yo sa ng’ɔ ti kpa’n, [...] yɛ bé nyán nguan sakpa.”—1 TIM. 6:18, 19.
JUE: 125, 40
?WAFA SƐ YƐ AMÚN TƐ́ SU Ɔ?
?Mɛn uflɛ’n nun lɔ’n, ngue yɛ i yolɛ’n wá yó e fɛ kpa trá su ɔ?
?Wafa nga é búabúa e wun ikisa naan y’a kwla tran mɛn uflɛ’n nun lɔ’n, i wie yɛle benin?
?Ninnge benin yɛ e kwla sunnzun kɛ é yó be ikisa naan y’a kwla tran mɛn uflɛ’n nun ɔn?
1, 2. (a) ?Ngue yɛ ɔ ɲin wo i sin kɛ á yó i mɛn uflɛ’n nun lɔ ɔ? (An nian desɛn ng’ɔ o kan like suanlɛ’n bo i bo lɛ’n.) (b) ?Ngue yɛ mɛn uflɛ’n nun lɔ’n, i yolɛ’n wá yó e fɛ kpa trá su ɔ?
E KWLAKWLA e kunndɛ kpa kɛ é ɲán “anannganman nguan.” Pɔlu flɛli anannganman nguan mɔ é wá ɲɛ́n i’n kɛ “nguan sakpa.” (An kanngan 1 Timote 6:12, 19 nun.) Asiɛ’n su wa yɛ e nun sunman é ɲán nguan sɔ’n niɔn. I blɛ sɔ’n nun’n, sran fi su tɔman tukpacɛ kun. Cɛn kwlakwla é jáso juejue, yɛ e klun jɔ́. (Eza. 35:5, 6) E nin e osufuɛ nin e janvuɛ mun, ɔ nin be nga Ɲanmiɛn wá cɛ́n be mun é trán aklunjuɛ. É ɲán e ti é súan ninnge’m be yolɛ. Yɛ ninnge nga e si be yo’n, é sí be yó kpa trá laa’n. Atrɛkpa’n, e nun wie mun é wá sí balo ninnge’m be bo. Annzɛ kusu’n, é sí sua nglanman kpa’m be kplan.
2 É wá yó ninnge kpakpa kpanngban, yɛ e klun jɔ́. Sanngɛ, like nga i yolɛ’n wá yó e fɛ trá su’n, yɛle Zoova sulɛ’n. Afin, sran’m be kwlakwla bé sí Zoova. Kpɛkun, bé kplín su kɛ ɔ sie be. (Mat. 6:9, 10) Asiɛ wunmuan’n su’n, é wún sran kpa mun ngunmin kɛ mɛn’n i bo bolɛ’n nun’n sa. Kɛ é fá e wun mántan Ɲanmiɛn’n, like fi su tanndanman e ɲrun. Kpɛkun, blɛblɛblɛ fɔ’n su tranman e nun kun.—Jue. 73:28; Zak 4:8.
3. ?Ngue yɛ ɔ fata kɛ e yo i dɔ nga su ɔ?
3 E lafi su kɛ Ɲanmiɛn wá mán e ninnge kpakpa mun. Afin “Nyanmiɛn kwla sa’n kwlaa yo.” (Mat. 19:25, 26) Sanngɛ, lafilɛ mɔ e lafi su kɛ é trán mɛn uflɛ’n nun wie’n, ɔ fata kɛ e “trɛ i kekle” kpa dɔ nga su. Ɔ ka kan’n mɛn wíe. Yɛ ɔ kwla fu e nun. I sɔ’n ti’n, maan e nian e wun su. Maan dɔ nga su’n, e mian e ɲin e yo ninnge nga be kle kɛ e ɲin o mɛn klanman’n i sin’n. ?Ninnge sɔ mun yɛle benin?
MAAN E BUABUA E WUN
4. ?Wafa sɛ yɛ e kwla buabua e wun ikisa naan y’a kwla tran mɛn uflɛ’n nun lɔ wie ɔ? An fa sunnzun ase kun be yiyi nun.
4 ?Wafa sɛ yɛ dɔ nga su’n, e kwla kle kɛ e kunndɛ kɛ é trán mɛn uflɛ’n nun lɔ ɔ? Titi’n, sran kwlaa ng’ɔ kunndɛ kɛ ɔ́ kó trán nvle uflɛ nun’n, ɔ buɛbuɛ i wun kpa. I wie yɛle kɛ, ɔ suan aniɛn nga be kɛn i nvle sɔ’n nun lɔ’n. Kpɛkun, ɔ suan lɔfuɛ’m be ninnge yolɛ’n wie. Aliɛ nga be di i lɔ bɔbɔ’n, ɔ di wie nian. I wafa kunngba’n, maan e buabua e wun ikisa naan y’a kwla tran mɛn uflɛ’n nun lɔ. ?Wafa sɛ yɛ é búabúa e wun ɔn?
5, 6. ?Wafa sɛ yɛ e kwla kle kɛ e su buabua e wun naan é trán mɛn uflɛ’n nun lɔ wie ɔ?
5 Andɛ mɛn’n nga nun’n, Satan wlawla sran mun naan be yo like kwlaa nga be klo’n. Ɔ maan, sran sunman be ɲin yiman Ɲanmiɛn. Be kunndɛ kɛ bé síe be bɔbɔ be wun. Wafa nga i bo’n gua man be’n, ɔ ti afɛ’n nin ɲrɛnnɛn’n, ɔ nin sa yalɛ’n ngunmin. (Zer. 10:23) Sanngɛ Zoova liɛ’n, ɔ ti Siefuɛ kpa. Mɛn uflɛ’n nun lɔ’n, sran kwlakwla be liɛ yó ye dan. Afin, Zoova yɛ ɔ́ wá síe be ɔ.
6 Mɛn uflɛ’n nun lɔ’n, like nga é wá yó naan asiɛ wunmuan’n w’a kaci lika klanman’n, ɔ nin like nga é wá klé be nga Zoova wá cɛ́n be’n, Zoova i anuannzɛ’n fá síe e ɲrun. Kpɛkun, é fá be su aklunjuɛ su. Nanwlɛ, Zoova maan i anuannzɛ’n wá mán e junman kpanngban kɛ e di. ?Sɛ i blɛ sɔ’n nun be man e junman m’ɔ timan e klun su’n kɛ e di’n, ngue yɛ é yó ɔ? ?É kpɛ́ atinsrɛ, annzɛ kusu é tú e klun é dí junman sɔ’n? Nanwlɛ, e kwlakwla é tɛ́ su kɛ é dí junman sɔ’n. I sɔ’n ti, maan dɔ nga su’n, e yo like nga Zoova i anuannzɛ’n se kɛ e yo’n. I liɛ’n, é klé kɛ e su buabua e wun naan é trán mɛn uflɛ’n nun lɔ wie.
7, 8. (a) ?Ngue ti yɛ ɔ fata kɛ e yo aɲinyiɛfuɛ ɔ? (b) ?Junman uflɛ benin yɛ be fa mannin aniaan wie mun kɛ be di ɔ? (c) ?Mɛn uflɛ’n nun lɔ’n, e liɛ’n yó sɛ?
7 Sɛ dɔ nga su e yo like nga Zoova i anuannzɛ’n kle e’n, ɔ ti kpa. Sanngɛ, ɔ fata kɛ e yo ninnge wie mun ekun naan y’a kwla tran mɛn uflɛ’n nun lɔ wie. Dɔ nga su’n, maan e kle kɛ e ɲin yi like nga e le i’n. Yɛ maan e yo aɲinyiɛfuɛ. I wie yɛle kɛ sɛ asɔnun kpɛnngbɛn’m be man e junman’n, maan e di i aklunjuɛ su. Sɛ e yo sɔ’n, é fá nzuɛn kunngba’n é trán mɛn uflɛ’n nun lɔ. (An kanngan Ebre Mun 13:17 nun.) Maan e fa Izraɛlifuɛ’m be sunnzun ase. Kɛ be juli mɛn mɔ Ɲanmiɛn seli kɛ ɔ́ fá mán be’n i nun lɔ’n, be ɲannin be tranwlɛ mun sɛsɛsɛ. (Kal. 26:52-56; Zoz. 14:1, 2) Mɛn uflɛ nun lɔ’n, e siman lika nga e tinuntinun é trán’n. Sanngɛ i kwlaa m’ɔ yoli ɔ, maan ikisa e klun jɔ like nga e le i’n su. I liɛ’n, asiɛ’n i lika kwlaa nga Zoova wá fá mán e kɛ e tran lɛ’n, é klun jɔ́ su.
8 Mɛn uflɛ’n nun’n, Ɲanmiɛn i famiɛn’n yɛ ɔ́ wá síe sran mun ɔn. Ɔ maan, Ɲanmiɛn i sulɛ’n wá yó fɛ dan. I sɔ’n ti, ajalɛ nga Zoova i anuannzɛ’n fa be dɔ nga su’n, e nanti be su aklunjuɛ su. Kpɛkun, e di junman kwlaa ng’ɔ fa man e’n. Kɛ blɛ’n fa ti’n, wie liɛ’n, ɔ nian su fa ajalɛ mun. I wie yɛle aniaan nga be di junman Betɛli ng’ɔ o Etazini lɔ’n be liɛ’n. Koko nun wa’n, be seli be nun wie mun kɛ be yo atin bofuɛ. Akpasua sunianfuɛ mun kusu’n, be nga b’a yo oke’n, annzɛ sa uflɛ wie’m be ti’n, be nun wie’m be kacili ngunmin atin bofuɛ. Be kwlaa be di junman uflɛ mɔ be fa mannin be’n i aklunjuɛ su. Yɛ Zoova yra be su. E kusu’n, junman kwlaa nga be man e’n, maan e klun jɔ su. Maan e srɛ Zoova kɛ ɔ suan e bo naan e tu e klun e di. Sɛ e yo sɔ’n, Zoova yrá e su dan yɛ e klun jɔ́. (An kanngan Nyanndra Mun 10:22 nun.) ?Sɛ mɛn uflɛ’n nun lɔ’n e klo kɛ é trán lika kun, naan be se e kɛ e ko tran lika uflɛ’n, ngue yɛ é yó ɔ? Nanwlɛ, nán lika nga é trán’n, annzɛ like nga é yó’n yɛ ɔ́ yó e cinnjin ɔn. Afin i kwlaa m’ɔ yoli o, e o mɛn uflɛ’n nun. Ɔ maan, e klun jɔ́ dan.—Nee. 8:10
9, 10. (a) ?Ngue ti yɛ mɛn uflɛ’n nun lɔ’n, e su yaciman e awlɛn tralɛ ɔ? (b) ?Wafa sɛ yɛ dɔ nga su’n, e kwla kle kɛ e tra e awlɛn ɔn?
9 Mɛn uflɛ’n nun lɔ’n, e su yaciman e awlɛn tralɛ. Afin wienun ɔn, y’a wun kɛ Ɲanmiɛn w’a cɛn sran wie mun. Yɛ be nin be osufuɛ’m be su bo sro. Sanngɛ, Ɲanmiɛn nin a cɛnman e sran liɛ’n mun wie. ?Sɛ i sɔ sa ju’n, é trá e awlɛn yɛ e nin e niaan sɔ mun é bó sró, annzɛ ngue yɛ é yó ɔ? (Rɔm. 12:15) Sɛ dɔ nga su e tra e awlɛn e minndɛ kɛ Zoova i klun sa’n kpɛn su’n, like kunngba’n yɛ é yó i mɛn uflɛ’n nun lɔ ɔ.—Aku. 7:8.
10 Ɔ ju wie’n, anuannzɛ’n yiyi ndɛ nanwlɛ’n i nun uflɛ. ?Kɛ ɔ yo sɔ’n, ngue yɛ e yo ɔ? Maan e tra e awlɛn e suan ndɛ’n i nun yiyilɛ uflɛ sɔ’n i blɛblɛ lele naan e wun i wlɛ. I liɛ’n, kɛ mɛn uflɛ’n nun lɔ’n, Zoova wá klé ninnge uflɛ’n, é kwlá trá e awlɛn titi é nánti be su.—Nya. 4:18; Zan 16:12.
11. (a) ?Ngue yɛ ɔ fata kɛ e yo i dɔ nga su ɔ? (b) ?Sɛ e yo sɔ’n, wafa sɛ yɛ i bo’n gúa mán e mɛn uflɛ’n nun lɔ ɔ?
11 Like kun ekun m’ɔ fata kɛ e yo naan y’a kwla tran mɛn uflɛ’n nun lɔ’n, yɛle kɛ maan e yaci sa cɛ. Afuɛ akpi nga Klist wá fá dí famiɛn’n, blɛblɛblɛ yɛ sran’m bé wlá be nzuɛn tɛ’n i ase ɔ. (Yol. 24:15) Ɔ maan, cɛn kunngun é yó e wiengu i sa. Sɛ dɔ nga su e yaci sa cɛ, naan e nin e wiengu mun e tran klanman’n, mɛn uflɛ’n i nun lɔ tranlɛ’n su yoman kekle.—An kanngan Kolɔsfuɛ Mun 3:12-14 nun.
12. ?Ngue yɛ ɔ fata kɛ e yo i dɔ nga su e fa kle kɛ e kunndɛ kɛ é trán mɛn uflɛ’n nun lɔ wie ɔ?
12 Mɛn uflɛ’n nun lɔ’n, nán like nga e kunndɛ’n i ngba yɛ é ká lɛ é ɲɛ́n i ɔ. Saan é trán é mínndɛ. Like kwlaa nga Zoova wá fá mán e blɛ sɔ’n nun’n, ɔ fata kɛ e klun jɔ su naan e lɛ i ase. Kɛ ɔ ko yo naan y’a kwla yo sɔ’n ti’n, Zoova kle e like naan e yi nzuɛn kpa sɔ’m be nglo ikisa. Sɛ e yo sɔ’n, é klé kɛ e kunndɛ kɛ é ɲán anannganman nguan naan é trán mɛn uflɛ’n nun lɔ wie. (Ebr. 2:5; 11:1) Nanwlɛ, mɛn m’ɔ́ wá yó sran kpa’m be liɛ’n, maan e kle titi kɛ e kunndɛ kɛ é trán nun wie.
MAAN E KUNNDƐ KƐ É SÚ ƝANMIƐN KPA TRÁ LAA’N
13. ?Mɛn uflɛ’n nun lɔ’n, junman benin yɛ be dilɛ’n wá yó e cinnjin kpa ɔ?
13 Mɛn uflɛ’n nun lɔ’n, é ɲán like kwlaa ng’ɔ ju e’n. Ɔ maan, e klun jɔ́. Sanngɛ, like ng’ɔ́ wá yó e fɛ dan’n yɛle kɛ e nin Ɲanmiɛn Zoova e afiɛn’n wá mántan kpa. (Mat. 5:3) Zoova i junman liɛ’m be dilɛ’n wá yó e cinnjin kpa. Afin i yɛ ɔ ti e awlɛn su like ɔ. (Jue. 37:4) I sɔ’n ti’n, maan dɔ nga su e dun mmua di Zoova i junman liɛ’n. Sɛ e yo sɔ’n, é klé kɛ e su buabua e wun naan é trán mɛn uflɛ’n nun wie.—An kanngan Matie 6:19-21 nun.
14. ?Junman benin yɛ gbanflɛn nin talua’m be kwla sunnzun kɛ bé dí ɔ?
14 ?Ngue yɛ é yó naan Zoova i junman liɛ’m be dilɛ’n w’a yo e fɛ kpa ɔ? Like nga e kwla yo’n yɛle kɛ maan e sunnzun kɛ é dí junman sɔ’m be nun kun. Gbanflɛn nin talua mun, amun bu wafa nga amun kwla di Zoova i junman’n i mlɔnmlɔn’n i akunndan. E fluwa’m be kan Zoova i junman fanunfanun be ndɛ. An nian fluwa sɔ’m be nun naan an fa amun ɲin sie i junman sɔ’m be nun kun su kɛ amún dí.a Be nga be ti blɛ kwlaa nun Ɲanmiɛn junman difuɛ w’a cɛ kpa’n, amun usa be ngwlɛlɛ afɛ. Sɛ amun fa jasin bolɛ’n yo amun junman mlɔnmlɔn’n, amún sí ninnge sunman yó. Ɔ maan mɛn uflɛ’n nun lɔ’n, Zoova sulɛ’n su yoman kekle amun sa nun.
15. ?Ninnge benin wie mun yɛ e kwla sunnzun kɛ é yó be ɔ?
15 Ninnge nga e kwla sunnzun kɛ é yó be’n, be sɔnnin. I wie yɛle kɛ jasin fɛ’n i bolɛ wafa wie o lɛ’n, e kwla sunnzun kɛ é súɛn i bolɛ naan e nuan tɔ i bolɛ’n nun. Annzɛ kusu’n, e kwla sunnzun kɛ é wún Ɲanmiɛn i mmla’m be wlɛ kpa naan é nánti be su. Wie liɛ ekun’n, e kwla mian e ɲin e suan kannganlɛ kpa. Annzɛ e suan nzra nun ijɔlɛ, annzɛ e tɛ kosan’m be su kpa aɲia’m be bo. I kwlaa m’ɔ yoli o, maan e sunnzun kɛ é dí Zoova i junman’n i kpa. Sɛ e sunnzun sɔ’n, é dí i juejue su. Yɛ é klé kɛ e su buabua e wun naan é trán mɛn uflɛ’n nun lɔ wie.
E LIƐ’N SU TI YE
16. ?Ngue ti Zoova i sulɛ’n yɛ ɔ ti like kpafuɛ’n niɔn?
16 Kɛ dɔ nga su e di Ɲanmiɛn junman i mlɔnmlɔn’n, ɔ timan e blɛ’n i sacilɛ. Zoova i sulɛ’n yɛ ɔ ti like kpafuɛ’n niɔn. Nán sran yɛ ɔ mian e kɛ e su i ɔ. Kusu’n, nán ɲrɛnnɛn dan’n mɔ e kunndɛ kɛ é fíte nun’n i ti yɛ e su i ɔ. Sanngɛ, kɛ e su Ɲanmiɛn’n, e nin i e afiɛn’n mantan kpa. E liɛ’n yo ye, yɛ e klun jɔ. I sɔ bɔbɔ ti yɛ Ɲanmiɛn yili e ɔ. Kɛ e si kɛ Ɲanmiɛn klo e’n, mɔ e wun kɛ ɔ bo e ɲrun atin’n, ɔ ti kpa tra like’n kwlakwla. (An kanngan Jue Mun 63:2-4 nun.) Nanwlɛ, Ɲanmiɛn sulɛ’n man aklunjuɛ dan. E kwlakwla e kwla di aklunjuɛ sɔ’n wie. Be nga be su Ɲanmiɛn w’a cɛ kpa’n, amun usa be nian. Bé tɛ́ amun su kɛ i yɛ ɔ ti like kpafuɛ’n niɔn.—Jue. 1:1-3; Eza. 58:13, 14.
17. ?Mɛn uflɛ’n nun lɔ’n, blɛ benin yɛ é yíyí e ɲin su ɔ?
17 Kɛ é wá trán mɛn uflɛ’n nun’n, é ɲán e ti é yó e bɔbɔ e ninnge mun, yɛ é kwlá yíyí e ɲin su. Ɲanmiɛn yili e naan e di junman naan e di i su aklunjuɛ. (Aku. 2:24) I bɔbɔ kusu’n, ɔ seli kɛ ɔ́ mán “ninnge nga nguan o be nun’n be kwlaa be like ng’ɔ ju be’n.” (Jue. 145:16) Be ɲin su yiyilɛ’n nin wunmiɛn delɛ’n ti kpa. Sanngɛ, sɛ e di Ɲanmiɛn junman’n naan i sin’n, e lo wunmiɛn annzɛ e yiyi e ɲin su’n, ɔ yo e fɛ dan. Like kunngba’n yɛ é wá yó i mɛn uflɛ’n nun lɔ ɔ. I sɔ’n ti, maan e “dun mmua fa [e] wun man Nyanmiɛn maan ɔ sie” e ikisa. Yɛ maan e akunndan’n tran mmlusuɛ nga andɛ e ɲɛn i’n be su.—Mat. 6:33.
18. ?Wafa sɛ yɛ e kwla kle kɛ e kunndɛ kɛ é trán mɛn uflɛ’n nun wie ɔ?
18 Wafa nga Zoova wá yrá e su mɛn uflɛ’n nun lɔ’n, ɔ́ bó e nuan. I sɔ’n ti, maan ikisa e kle kpa kɛ e kunndɛ kɛ é ɲán nguan sakpa’n. Maan e yi nzuɛn kpa nga Zoova kle e’n be nglo titi. Yɛ maan e bo jasin fɛ’n i kpa juejue su. Nanwlɛ, maan e fa Zoova junman’n i dilɛ’n yo e awlɛn su like. E lafi su kɛ mɛn uflɛ’n nun lɔ’n, Zoova mán e like kwlaa ng’ɔ seli kɛ ɔ́ fá mán e’n. I sɔ’n ti’n, maan e buabua e wun ikisa naan y’a kwla tran mɛn uflɛ’n nun lɔ wie.
[Ja ngua lɛ ndɛ’n]
a An nian fluwa nga be flɛ i blɔfuɛ’n nun kɛ « Les jeunes s’interrogent — Réponses pratiques, vol. 2 ». i bue 311-318 nun.
[Kosan mun]