Sɛ ɔ wun annzɛ ɔ yi nin sran uflɛ be la’n

Be flɛ bla kun kɛ Maria. Ɔ fin Ɛspaɲin. Ɔ seli kɛ: “Kɛ min wun seli min kɛ ɔ su ko fa bla uflɛ m’ɔ te yo talua’n, min ɲin tuli nguan’n su. Kɛ n bu ninnge kwlaa nga n yo mɛnnin i’n i akunndan’n, n wun kɛ ɔ buli min lufle dan.”

Be flɛ bian kun kɛ Bili. I kusu fin Ɛspaɲin wie. Ɔ seli kɛ: “Cɛn kun’n, kɛ min yi seli min kɛ ɔ su yaci min’n, ɔ yoli min kɛ min wunnɛn’n i lika kun w’a wu sa. Ninnge kwlaa nga e siesieli kɛ é yó be’n, be kwlaa be ka lɛ tɔli nzue nun. Ɔ ju wie’n, ɔ yoli min kɛ n kokoman kun sa. Sanngɛ i sin’n min wla m’ɔ bo min wun’n, be kanman.”

Nanwlɛ, kɛ yasua kun kunndɛ bla i yi bo annzɛ kɛ bla kun kunndɛ bian i wun bo’n, ɔ yo ya dan. Ɔ ju wie’n, sran nga be yoli i sa’n ɔ yaci sa sɔ’n cɛ. Kpɛkun, ɔ miɛn i ɲin lele maan be afiɛn mantan ekun.a Kannzɛ be afiɛn sɛ ekun o, annzɛ be afiɛn saci mlɔnmlɔn o, sanngɛ ɔ wun i ɲrun dan. ?Ngue yɛ ɔ fata kɛ sran sɔ’n yo naan i wla w’a gua ase-ɔ?

BIBLU’N NUN NDƐ MMA WIE MƆ BE KWLA UKA Ɔ’N

Be nga be wun annzɛ be yi nin sran uflɛ be lali’n, kannzɛ be wla boli be wun’n, sanngɛ Ɲanmiɛn Ndɛ’n fɔnvɔli be nun kpanngban. Be wunnin i wlɛ kɛ Ɲanmiɛn wun be su afɛ’n naan ɔ si be aunnvɔɛ.—Malasi 2:13-16.

Jue Mun 94:19: “Kɛ ngokɔɛ’n tinnin min su’n, a fɔnvɔli min, yɛ a yoli maan min wla guali ase.”

Bili seli kɛ: “Kɛ n kanngannin ndɛ mma sɔ’n nun’n, ɔ yoli min kɛ Zoova su fɔnvɔ min kɛ siɛ kpa kun fa yo’n sa.”

Jue Mun 18:25: “Sran ng’ɔ nin wɔ be nanti klanman’n, a nin i be nanti klanman.”

Kaamɛnin i wun’n kunndɛli bla i bo. Ɔ yoli sɔ dili anglo kpanngban. Kaamɛnin seli kɛ: “Min wun nin min w’a nantiman klanman. Sanngɛ Zoova liɛ’n, n si kɛ n kwla lafi i su. Afin ɔ su yaciman min le.”

Filipufuɛ Mun 4:6, 7: “Nán an koko like fi ti. Sanngɛ sa kwlaa ng’ɔ o amun su’n, an koko kle Ɲanmiɛn. An tu amun klun be srɛ i. [...] Yɛ aunjɔɛ nga Ɲanmiɛn man mɔ sran fi kwlá simɛn i bo’n, ɔ́ yó maan [...] amun wla guá ase, yɛ amun akunndan’n su sannganman.”

Sasa seli kɛ: “N kanngannin ndɛ mma sɔ’n nun kpɛ sunman. Kpɛkun, kɛ n srɛli Ɲanmiɛn lelele’n, ɔ yoli maan min wun jɔli min fɔuun.”

Be kwlaa nga e kannin be ndɛ lɛ’n, blɛ wie nun’n be ɲin tuli nguan’n su. Sanngɛ be fali be wla guali Zoova su, be suannin Ɲanmiɛn Ndɛ’n i nun like yɛ i sɔ’n wlali be fanngan. Bili seli kɛ: “Kɛ ɔ yoli min kɛ min liɛ w’a wie mlɔnmlɔn’n, Ɲanmiɛn su mɔ n lafi’n ti’n, min wla guali ase. Blɛ wie nun’n, ɔ yoli min kɛ ‘n su nanti kongo tuun kpa kun nun’ sa. Sanngɛ n wunnin kɛ Ɲanmiɛn w’a yaciman min.”—Jue Mun 23:4.

a Sɛ ɔ waan á wún i wlɛ sɛ ɔ fata kɛ a yaci cɛ, annzɛ nán a yaci cɛ’n, nian afuɛ 1999, Avrili 22 An tinnge! blɔfuɛ nun liɛ’n i bue 3-12 nun.

Like ng’ɔ ukali sran wie mun’n

Kanngan Biblu’n nun yɛ bu su akunndan.

Bili seli kɛ: “N kanngannin Zɔbu fluwa’n nun. I sin’n, n kanngannin Jue Mun fluwa’n nun. Kɛ n wun ndɛ mma nga be nin min su sa’n be kɔ likawlɛ’n, n jaja be bo. N wunnin kɛ, ɔ ju wie’n Zɔbu nin be nga be klɛli Jue Mun fluwa’n be nun wie’m be wla boli be wun yɛ be kokoli kɛ min sa.”

Tie miziki.

Kaamɛnin seli kɛ: “Kɔnguɛ’n kɛ lafilɛ kunman min’n, n tie miziki kan. Kɛ n yo sɔ’n, min wla gua ase.” Daniɛli kusu seli kɛ: “N ma suannin gitaa bolɛ. Kɛ n bo’n, min wun jɔ min fɔuun.”

Kan wafa nga ɔ wun yo wɔ’n, i ndɛ kle sran.

Daniɛli seli kɛ: “Kɛ sa o min su’n wafa nga min wun yo min’n n klomɛn i ndɛ kanlɛ sa. Sanngɛ, n le janvuɛ wie mɔ cɛn kwlakwla n kwla kannin min klun ndɛ n kleli be-ɔ. Wie liɛ’n e nin be e koko yalɛ. Wie liɛ kusu’n, n klɛ be fluwa. I sɔ’n ukali min kpa.” Sasa kusu seli kɛ: “Min osufuɛ’m be ukali min kpa. Min manmin w’a yiman min ase le. Sɛ min waan ń kán n klun ndɛ ń klé i’n, ɔ sie i su kpa. Min baba kusu kleli kɛ min ndɛ lo i wie, yɛ ɔ ukali min naan min wla w’a gua ase blɛblɛblɛ.”

Srɛ Ɲanmiɛn titi.

Kaamɛnin seli kɛ: “N srɛli Ɲanmiɛn titi. Kɛ n yo sɔ’n, n wun i wlɛ kɛ Ɲanmiɛn nin min o nun naan ɔ tie min srɛlɛ’n, kpɛkun ɔ uka min. Ɔ maan blɛ kekle sɔ nun’n, n fali min wun mantannin Ɲanmiɛn kpa.”