E kwla di aklunjuɛ dɔ nga su

CƐN kun’n, sran’m be su tɔman tukpacɛ kun, be su yoman kpɛnngbɛn kun kpɛkun be su wuman kun. Sanngɛ andɛ’n sa sunman o sran kwlaa su. ?Ngue yɛ ɔ kwla uka e naan y’a jran sa sɔ’m be ɲrun kekle-ɔ? Ɲanmiɛn nuan ndɛ’n mɔ yɛle Biblu’n ɔ kwla uka e naan y’a di aklunjuɛ. Maan e kan sa wie mɔ Biblu’n kwla uka e naan y’a jran be ɲrun kekle’n, be ndɛ.

MAAN LIKE NGA E LE I’N Ɔ JU E

Biblu’n nun ndɛ’n: “Nán amun klo sika. Maan like nga amun le i dɔ nga su’n, ɔ ju amun.”—Ebre Mun 13:5.

Andɛ’n, ninnge nga sran’m be wla be wiengu’m be fanngan kɛ be ɲɛn i’n, be diman be yalɛ. Kusu nn Biblu’n wla e fanngan kɛ ‘maan like nga e le i dɔ nga su’n, ɔ ju e.’ ?Wafa sɛ yɛ e kwla kle kɛ like nga e le i’n ɔ ju e-ɔ?

‘Nán amun klo sika.’ Sran wie’m be klo sika dan ti’n, be fa be wunmiɛn’n nin be blɛ kwlaa be fa kunndɛ. I sɔ’n ti’n, be tɔ su tukpacɛ, be nin be awlofuɛ nin be janvuɛ’m be afiɛn saci, be yo sa tɛtɛ mun, kpɛkun be yo be wun wannzo. (1 Timote 6:10) I sɔ’n ti be wun yalɛ kle ngbɛn. Afin i agualiɛ su’n, be ɲin su yiman nga be le i’n.—Akunndanfuɛ’n 5:9.

Maan e klo sran tra aɲanbeun ninnge mun. Ninnge wie’m be o lɛ’n, be ti kpa sɔ, sanngɛ ninnge sɔ’m be kwlá kloman e annzɛ be kwlá siman ye, saan sran yɛ ɔ kwla yo i sɔ-ɔ. Sɛ e le “janvuɛ kpa’n” ɔ kwla uka e naan like nga e le i’n w’a ju e.—Nyanndra Mun 17:17.

SƐ E NANTI ƝANMIƐN NDƐ’N SU’N, E KWLA DI AKLUNJUƐ DƆ NGA SU

KƐ TUKPACƐ WIE KLE E YALƐ’N

Biblu’n nun ndɛ’n: “Aklunjuɛ’n ti kɛ ayre sa.”—Nyanndra Mun 17:22.

Sɛ e tɔ tukpacɛ naan e ɲan ayre kpa’n, ɔ kwla yo e juejue. I wafa kunngba’n kɛ aklunjuɛ’n ti sɔ-ɔ. Sɛ tukpacɛ o e su naan e di aklunjuɛ’n, é ɲán wunmiɛn é jrán kekle. ?Sanngɛ sɛ tukpacɛ wie o e su’n, é yó sɛ naan y’a di aklunjuɛ?

Maan e si ye. Sɛ sa wie o e su naan e bu sa sɔ’n i akunndan sa trilili’n, é trán awlabɔɛ nun titi. (Nyanndra Mun 15:15) Sanngɛ like ng’ɔ fata kɛ e yo’n yɛle kɛ ‘maan e kle kɛ e si ye.’ (Kolɔsufuɛ Mun 3:15) Maan e fa e ɲin e sie i ninnge wie’m be su. Ɔ kwla yo wia m’ɔ su tɔ’n, nin aunmuan fɛfɛ wie m’ɔ su fita’n, ɔ nin e sran kpa wie m’ɔ nin e sri kan’n.

Maan e ti e wiengu’m be wun ɲanman nun. Kannzɛ e ti tukpacifuɛ’n sanngɛ ‘sɛ e cɛ sran like’n, e klun jɔ kpa tra kɛ be cɛ e like’n.’ (Sa Nga Be Yoli’n 20:35) Kɛ e yo like e man sran m’ɔ si su ye’n, e klun jɔ dan kpɛkun e buman e su sa’m be akunndan ngboko. I sɔ’n ti’n, sɛ e mian e ɲin e uka sran mun’n, e bɔbɔ é ɲán su ye wie.

E YO NAAN E NIN E WUN ANNZƐ E YI E AFIƐN MANTAN KPA

Biblu’n nun ndɛ’n: “Amun wun ninnge nga be ti cinnjin kpa’n be wlɛ.”—Filipufuɛ Mun 1:10.

Sɛ yasua kun nin i yi’n be yoman ninnge mun likawlɛ’n, ɔ cɛman naan be afiɛn w’a ti nun. Ɔ fata kɛ yasua kun nin i yi’n be wun i wlɛ kɛ like ng’ɔ fata kɛ ɔ yo be cinnjin kpa’n yɛle be aja’n.

E nin e wun annzɛ e yi’n e yo ninnge mun likawlɛ. Ɔ fataman kɛ be nga be le bla annzɛ bian’n be bu be ninnge liɛ’m be ngunmin i akunndan. Ɔ fata kɛ be nin be yi annzɛ be wun’n be yo ninnge mun likawlɛ. Biblu’n se kɛ: “Sɛ sran nnyɔn be bo yo kun’n, ɔ ti kpa tra sran kunngba bɔ i ngunmin wo’n.” (Akunndanfuɛ’n 4:9) I wie yɛle kɛ be kwla tɔn like likawlɛ, annzɛ be kwla yiyi be ɲin su likawlɛ annzɛ ninnge uflɛ.

Maan e yi i nglo kɛ e klo e yi annzɛ e wun’n. Ɲanmiɛn Ndɛ’n wla yasua’n nin i yi’n be fanngan kɛ be klo be wun yɛ be bu be wiengu sran. (Efɛzifuɛ Mun 5:28, 33) I sɔ yolɛ nun’n, be kwla nian be wiengu be sri puɛɛ, annzɛ be kwla yi be wiengu ayɛ, annzɛ be kwla cɛ be wiengu like kan. Sɛ be yo sɔ’n, be afiɛn’n mántan kpa. Kusu ɔ fataman kɛ be nga be le bla annzɛ bian’n, be nin sran uflɛ be si sua.—Ebre Mun 13:4.

“N MA WUNNIN SA NGA TI YƐ N O MƐN’N NUN’N I WLƐ”

—Sran ng’ɔ kan ndɛ’n: Rioko Miyamoto. Ɔ fin Zapɔn.

Nanwlɛ’n n fɛli laa. Min wun’n nɔn nzan’n dan. I sɔ’n ti’n kɛ ɔ ɲan junman andɛ’n, kɛ aliɛ cɛ́n’n b’a tu i. Ɔ maan, ɔ nianman min nin e mma nnan’n e lika mlɔnmlɔn. N miannin min ɲin kpa ukali min wun naan ɔ yaci nzan nɔnlɛ, sanngɛ ngbɛn-ɔn. I sɔ’n ti’n blɛ wie nun’n, n usali min wun kɛ: ‘?Like nga Ɲanmiɛn Kpli siesieli kɛ ɔ́ fá mán min’n yɛle nga? ?Annzɛ sa tɛ wie mɔ n dun mmua yoli ka naan b’a wu min’n, i su afɛ yɛ n su wun i-ɔ?’

Cɛn kun’n, Zoova i Lalofuɛ kun bali e awlo lɔ. Kɛ ɔ wunnin min’n, ɔ srili puɛɛ kpɛkun ɔ kannin Ɲanmiɛn i Famiɛn dilɛ’n, ɔ nin nguan m’ɔ leman awieliɛ’n, be ndɛ kleli min. I sin’n, ɔ seli min kɛ ɔ kunndɛ kɛ ɔ́ klé min Biblu’n nun like. Biblu’n nun like suanlɛ’n ti’n, n ma wunnin i wlɛ kɛ Ɲanmiɛn o lɛ sakpasakpa naan i ngwlɛlɛ’n leman wunsu, ɔ yo sa’n i nuan su sɛsɛsɛ naan ɔ klo sran. Asa ekun’n, n sili be nga be wuli’n be su ndɛ nanwlɛ’n, kpɛkun n wunnin i wlɛ kɛ Ɲanmiɛn w’a jajaman sa ng’ɔ o min su’n w’a sieman.

Asa ekun, n wunnin i wlɛ kɛ sɛ sran kun kunndɛ kɛ ɔ́ dí aklunjuɛ sakpa’n, ɔ fata kɛ ɔ fɛ i wun mantan Ɲanmiɛn. I kwlaa sɔ’n wlali min fanngan, ɔ guali min awlɛn su nzue yɛ ɔ yoli maan n dili aklunjuɛ. Ɲanmiɛn Ndɛ’n ti’n, siɛn’n n si like nga ti yɛ n o mɛn nun’n.