“An yo kɛ kannin sa”
1 Sran’m be ayeliɛ’n nin be Ɲanmiɛn sulɛ wafa’n kle kɛ be o aosin nun. Nanwlɛ mɔ e si i’n ti’n, e wun aosin’n nun “sa b’ɔ yoman sa fi ye’n” be wlɛ. Ɔ maan e yoman sa sɔ’m be wie. I sɔ’n ti’n, akoto Pɔlu seli Klistfuɛ’m be kɛ: “An yo sa ng’ɔ kle kɛ an wo wia klengle kpa’n nun’n.”—Efɛ. 5:8, 11.
2 “Be nga be o wia’n nun’n” be ayeliɛ’n nin be nga be o aosin’n nun’n be liɛ’n, ɔ timan kun. (Efɛ. 5:9) Sɛ e kunndɛ kɛ e ayeliɛ’n yo kpa’n, ɔ fata kɛ e nanti kɛ Klistfuɛ kun fa nanti’n sa. Yɛle kɛ e yo like ng’ɔ jɔ Zezi klun’n. Maan e tu e klun e su Zoova, yɛ e klo ndɛ nanwlɛ’n. Asa ekun’n, sɛ é bó jasin fɛ o, annzɛ é yó like uflɛ o, maan e nzuɛn’n yo kpa titi.
3 Maan e yo kɛ kannin sa titi: Zezi seli i akoto’m be kɛ: “An yo kɛ kannin sa sran’m be ɲrun.” (Mat. 5:16) Zezi bɔbɔ yoli kɛ kannin sa. Yɛle kɛ ɔ boli Ɲanmiɛn Sielɛ’n i jasin fɛ’n kleli sran mun. E kusu’n, kɛ e bo jasin fɛ’n, i sɔ’n kle kɛ e yo kɛ kannin sa sran’m be ɲrun. I sɔ’n ti’n, e bo jasin fɛ’n awlo’m be nun, yɛ e bo e kle sran kwlakwla. I wie yɛle kɛ, e bo jasin fɛ’n e kle e wiengu junman difuɛ mun, nin e wiengu suklu ba mun, nin e mantanfuɛ mun. Kɛ e yo sɔ’n, e kle kɛ e ti kɛ kannin sa sran’m be ɲrun.—Fil. 2:15.
4 Zezi seli kɛ sran wie’m be kloman wia’n. Yɛle kɛ be kloman ndɛ nanwlɛ’n. (Zan 3:20) I sɔ’n ti’n, sɛ sran kpanngban be faman “Krist [...] i jasin fɛ’n” mɔ e bo e kle be’n su’n, nán maan e sa sin bubu e. (2 Kor. 4:4) Zoova si like ng’ɔ o sran kun i awlɛn’n nun’n. Ɔ maan sɛ sran kun kloman ndɛ nanwlɛ’n, Zoova kunndɛman kɛ sran sɔ’n su i.
5 Sɛ e tu e klun e yo Zoova klun sa’n, sɛ é kwlá sé’n, é kpája kɛ kannin sa sran’m be ɲrun. Yɛ bé wún kɛ e nzuɛn’n ti kpa naan ‘kpajalɛ [...] m’ɔ man nguan’n, ɔ maan e wun ase.’ Atrɛkpa’n, be kusu bé kwlá kúnndɛ kɛ bé káci be nzuɛn’n naan bé kpája kɛ kannin sa wie.—Zan 8:12.
6 Kɛ e yo kɛ kannin sa titi’n, i sɔ’n manman Zoova. Kpɛkun, e uka e wiengu mun naan b’a si ndɛ nanwlɛ’n. Ɔ maan, be wla o su kɛ bé ɲán anannganman nguan’n. (1 Piɛ. 2:12) Kɛ mɔ e ti kɛ kannin sa’n ti’n, maan e uka sran mun naan be jaso aosin’n nun. I liɛ’n, bé yó sa ng’ɔ ti kpa’n.