“An yo kɛ kannin sa”
1. ?Ngue yɛ ɔ ti e cenjele like andɛ ɔ?
1 Kɛ wia’n tú i bo lele m’ɔ́ fá tɔ́’n, lika’n i kpajalɛ m’ɔ kpaja’n, ɔ manman Ɲanmiɛn Zoova. Sanngɛ, kpajalɛ’n i wafa uflɛ i ndɛ yɛ Zezi kan ɔn. kpajalɛ sɔ’n m’ɔ seli i sɔnnzɔnfuɛ’m be kɛ be kpaja’n yɛle ‘kpajalɛ m’ɔ man nguan’n.’ (Zan 8:12) Kpajalɛ mɔ e kpaja Ɲanmiɛn ninnge’m be nun sɔ’n, ɔ ti e cenjele like dan. Sanngɛ, ɔ ti e sa nun junman dan kpa wie. Zezi seli kɛ: “An yo kɛ kannin sa sran’m be nyrun,” naan ɔ yo be ye. (Mat. 5:16) Ɲanmiɛn ninnge’m be nun’n, mɛn nga e o nun yɛ’n, ɔ o aosin tuun’n kpa nun. I sɔ’n ti’n, ɔ fata kɛ kannin sɔ’n kpaja be bo naan be wun ase. Awlanmannun’n, sran’m be nin a ɲanman kpajalɛ sɔ’n i awuliɛ le! ?Kɛ Klist sa’n, wafa sɛ yɛ e kwla yo kɛ kannin sa ɔ?
2. ?Wafa sɛ yɛ Zezi yili i nglo kɛ Ɲanmiɛn ninnge’m be nun’n, ɔ ti cinnjin kɛ e yo kɛ kannin sa ɔ?
2 Jasin fɛ’n i bolɛ nun: Zezi fali i blɛ’n nin i wunmiɛn’n kwlaa, ɔ nin i sa nun like kwlaa’n, ɔ boli jasin fɛ’n kleli sran mun awlo’m be nun, nzra nun, ɔ nin oka’m be su. Kan kwlaa nga ɔ kwla to sran lɛ’n, ɔ boli jasin fɛ’n. Ɔ wunnin i wlɛ kɛ Ɲanmiɛn ninnge’m be nun’n, kpajalɛ m’ɔ kpaja lika’n nun’n, ɔ kwla yo sran’m be ye. (Zan 12:46) Kɛ ɔ ko yo naan w’a kwla uka sran’m be dan lika’n ti’n, ɔ kleli wafa nga i sɔnnzɔnfuɛ’m be kwla yo ‘kɛ kannin sa’n.’ (Mat. 5:14) Sɛ be yo be wiengu’m be kpa naan be kan Ɲanmiɛn ndɛ nanwlɛ’n kle be’n, yɛ bé kwlá kpája kpa kɛ kannin sa ɔ.
3. ?Wafa sɛ yɛ e kwla kle kɛ e bu ndɛ nanwlɛ’n m’ɔ ti kɛ kannin sa’n, i like dan ɔn?
3 Ɲanmiɛn se i sufuɛ’m be kɛ be ‘yo sa ng’ɔ kle kɛ be wo wia klengle kpa’n nun’n.’ Junman sɔ’n mɔ Ɲanmiɛn fa mannin be’n, be nian nun kpa be di. Ɔ maan kan kwlaa nga be to sran mun’n, be bo jasin fɛ’n kle be. (Efɛ. 5:8) Sɛ e kanngan Biblu’n ɔ nin Biblu’n i akua mun be nun kan kwlaa nga sran’m be kwla wun e lɛ’n, e kwla ɲan Ɲanmiɛn ndɛ’n i kanlɛ’n i wun atin. E niaan bla kan kun yoli sɔ, ɔ maan ɔ boli sran kun i Biblu’n nun like klelɛ bo. Yɛ ɔ fali Biblu’n i akua 12 fa mannin i wiengu suklu ba mun!
4. ?Ngue ti yɛ kɛ ‘e yo kɛ kannin sa’n,’ i sɔ’n kan e aeliɛ kpa’n niɔn?
4 E nzuɛn kpa’n nun: Wafa kun ekun mɔ e kwla yo kɛ kannin sa’n, yɛle e mɛn dilɛ’n nun. (Efɛ. 5:9) E junman’n su lɔ o, annzɛ suklu lɔ o, annzɛ lika kwlaa nga e wo’n nin o, sran’m be fa be ɲin sie i e aeliɛ’n su. Ɔ maan, e kwla ɲan Ɲanmiɛn ndɛ kanlɛ’n i wun atin. (1 Piɛ. 2:12) Sa kun m’ɔ juli’n yɛ: Suklu klefuɛ kun sieli i nzɔliɛ kɛ i suklu ba kun m’ɔ le afuɛ 5 i aeliɛ’n ti kpa. Ɔ maan ɔ flɛli ba’n i si’n nin i nin’n. Ɔ seli be kɛ: “N nin a wunman ba kaan kun m’ɔ si sa tɛ’n nin sa kpa’n be ngbaciɛ’n kɛ amun wa’n sa le!” Nanwlɛ, Ɲanmiɛn junman’n mɔ e di’n, ɔ nin e nzuɛn kpa’n, ɔ su sran’m be bo kɛ be kunndɛ ‘kpajalɛ m’ɔ man nguan’n’. Yɛ be manman e Ɲanmiɛn’n.