?Min li, n bo jasin fɛ’n i kpa li?
1. ?Sa benin ti yɛ Klistfuɛ kpa kun kwla koko ɔ?
1 ?Amun a usa amun wun sɔ le? Atrɛkpa, amun boman jasin fɛ’n i dan kɛ laa’n sa kun. Afin, kpɛnngbɛn i su afɛ’n wo amun su, annzɛ aunkpinndiɛ’n nunman amun sa nun, annzɛ kusu awlo’n nun junman w’a sɔn amun su. Ɔ maan, amun sa sin bubu amun. Aniaan bla kun mɔ ba nsan wo i sa nun’n, ɔ klɛli i kɛ wie liɛ’n, i akunndan’n bu i fɔ. Afin blɛ nin wunmiɛn ng’ɔ fa nian i awlofuɛ’m be lika’n ti’n, ɔ kwlá boman jasin fɛ’n i kpa. ?Ngue yɛ ɔ́ úka e naan e akunndan’n w’a yo sɛsɛ ɔ?
2. ?Ngue yɛ Zoova sunnzun kɛ e yo ɔ?
2 Like nga Zoova sunnzun kɛ e yo’n: Nga liɛ’n, akplowa nunman nun. E kwlaa e kunndɛ kɛ é úka e jasin fɛ’n bolɛ’n su. Sanngɛ ɔ le like nga e kunndɛ kɛ é yó’n ɔ nin nga e sa ju su’n. E jasin fɛ’n bolɛ’n i su ukalɛ mɔ e kunndɛ’n, ɔ kle kɛ e kunndɛman kɛ é trán lɛ, é búbú e sa nin e ja gúa su. Nán maan e wla fi kɛ Zoova si like nga e kwlɛ i yo’n, ɔ nin nga e kwlɛmɛn i yo’n, i kpa liɛ su. Nan kusu’n, ɔ seman e kɛ e yo like ng’ɔ tra e wunmiɛn’n su. (Jue. 103:13, 14) ?Ɔ maan, ngue yɛ Zoova sunnzun kɛ e yo ɔ? Ɔ kunndɛ kɛ e tu e klun e su i.—Kol. 3:23
3. ?Ngue yɛ e kwla yo naan y’a wun i wlɛ sɛ e wunmiɛn nga e fa wla jasin fɛ’n i bolɛ nun’n ti kaan annzɛ ɔ timan kaan ɔn?
3 ?Ngue yɛ ɔ́ úka e naan y’a si like nga e kwlɛ i yo’n ɔ nin nga e kwlɛmɛn i yo’n niɔn? I lɛ nun’n, e kwla srɛ Zoova kɛ ɔ tike e ɲin naan e wun i sɔ liɛ’n i wlɛ. (Jue. 26:2) Kusu, e janvuɛ Klistfuɛ kun mɔ e lafi i su kpa mɔ w’a tin Ɲanmiɛn i sulɛ nun’n, mɔ kusu ɔ sroman e ɲrun ndɛ kanlɛ’n, ɔ kwla uka e kpa wie. (Nya. 27:9) Asa, maan e wla kpɛn su ekun kɛ, kɛ mɔ e su sa’m be kacikaci’n, ɔ ti kpa kɛ e bu ninnge nga e kwla be yo’n ɔ nin nga e kwlaman be yo’n be akunndan tikatika.—Efɛ. 5:10.
4. ?Biblu’n nun ndɛ nga be fa kpɛn e wla jasin fɛ bolɛ’n su’n, wafa sɛ yɛ ɔ fata kɛ e bu i?
4 Wafa ng’ɔ fata kɛ e wla nga be kpɛn e’n, ɔ yo e’n: Kɛ be si wanndilɛ akplowa’n, be nga be nian’n, be kpan be wla wanndifuɛ’m be fanngan. Be waan bé yó naan wanndifuɛ’m be ɲan like nga be wla wo su’n. Nán kɛ be waan bé yó sɔ naan bé klé be kɛ nga b’a yo i lɛ’n, ɔ juman lika fi ti ɔ. I kunngba’n niɔn. Afɔtuɛ nga be taka Biblu’n su mɔ be fa man e aɲia’m be bo ɔ nin e fluwa’m be nun’n kɛ e ‘kan Nyanmiɛn ndɛ’n e jran su kpa’n,’ be ti e ye yolɛ. Nán kɛ be waan bé sé kɛ e kplinman e ɲin kpa e boman jasin fɛ’n ti ɔ. (2 Tim. 4:2) Maan e lafi su kɛ, sɛ e mian e ɲin e yo nga e kwlɛ i yo’n titi’n, Zoova i wla kpɛ́n ‘klolɛ nga e fa kloli i nin junman nga e dili’n’ su klanman.—Ebr. 6:10.