Ɔ ti jasin bofuɛ’m be ukalɛ liɛ
1. ?Afuɛ nga be flɛ i 1938 nun’n, ajalɛ nga be fali mɔ e te di su’n, yɛle benin? ?Yɛ, ngue ti yɛ be fɛli i sɔ ajalɛ’n niɔn?
1 Afuɛ nga be flɛ i 1938 nun’n, Zoova i anuannzɛ’n fali ajalɛ kun mɔ e te di su ɔ. Ɔ to asɔnun akpasuaakpasua’m be ngaliɛ kɛ be tinuntinun be yia. Aɲia sɔ’n, laa’n, be flɛ i assemblée de zone. Siɛn’n, i yɛ e flɛ i akpasua kun aɲia’n niɔn. ?Ngue ti yɛ be fɛli i sɔ ajalɛ’n niɔn? Fluwa ng’ɔ suan l’Informateur nga be yili i Angle nun’n (mɔ siɛn’n, e flɛ i Ɲanmiɛn Sielɛ Blɛ junman fluwa) afuɛ nga be flɛ i 1939 Zanvie anglo’n liɛ’n, tɛli kosan sɔ’n su. Ɔ seli kɛ: “Ajalɛ nga Zoova sin i anuannzɛ’n i sin fa’n, naan b’a di i Sielɛ’n i junman’n, aɲia sɔ’m be o be nun wie. Afɔtuɛ nga be mɛn i lɔ’n ti cinnjin man sran kwlaa, kɛ ɔ ko yo naan w’a kwla di junman nga be fa mannin’n, i kpa’n ti.” Afuɛ nga be flɛ i 1938 nun’n, jasin bofuɛ’m be ti sran 58.000 cɛ. Sanngɛ, afuɛ nga be flɛ i 2009 nun’n, be yoli sran 7.000.000 tra su. Kɛ e nian wafa nga be fa ukali su’n, ɔ ti weiin kɛ akpasua kun aɲia’m be uka jasin bofuɛ mun naan b’a yo like nga ti yɛ be kpɛli be ba’n. Yɛle kɛ, be “di junman nga be fa mannin’n”!
2. ?Ɲanmiɛn junman dilɛ afuɛ ng’ɔ́ wá bó i bo lɛ nun’n, akpasua kun aɲia’n bo’n, ndɛ benin yɛ é wá tíe ɔ?
2 Afuɛ ba lɔ liɛ’n, i flɛlɛ’n: Sɛptamblu nun yɛ Ɲanmiɛn junman dilɛ afuɛ’n bó i bo ɔ. Ɔ ka e ngunmin’n, e akpasua kun aɲia’n nga é yó i afuɛ sɔ’n nun’n, i cɛn’n w’a ju naan w’a wla e fanngan. I flɛlɛ’n fin Zan 15:19 nun. I yɛ: “N yili amun mɛn nunfuɛ’m be nun.” ?Ijɔlɛ nga bé yó jasin bofuɛ’m be ye’n, be nun wie mun yɛle benin? Fue’n, é tíe ijɔlɛ nga i flɛlɛ’n yɛle “?Wafa sɛ yɛ atin bolɛ junman’n sasa e ɔ?” Asa ekun’n, é wá tíe ijɔlɛ nga be kpɛkpɛli nun akpasua nsan’n: (1) “Nán maan ‘nnɛn’n’ saci e ti nun”, (2) “Nán maan “tekle bla dan’n” saci e ti nun”, yɛ (3) “Nán maan ‘aata difuɛ mun’ be saci e ti nun.” Mɔnnɛn’n, é tíe ijɔlɛ nga be kpɛkpɛli nun mɔ i flɛlɛ’n yɛle “Maan e klo Zoova nán e klo mɛn’n.” Ijɔlɛ uflɛ wie’m be flɛlɛ’n yɛ: “E ‘ti aofuɛ nin wlan-wlanfuɛ asiɛ’n su,’ nán e kaci” ɔ nin “An tra amun awlɛn! An kwla mɛn’n nun ninnge mun ɔ yo ye.”
3. ?Sɛ e tran akpasua kun aɲia’n i bo’n, ye benin yɛ e kwla di ɔ?
3 Aniaan bla kun mɔ i sa w’a kan ase jasin fɛ’n i bolɛ nun’n, ɔ trannin akpasua kun aɲia nga be yoli i koko nun wa’n, be nun kun bo. I sin’n, ɔ klɛli fluwa seli kɛ ndɛ nga be yiyili nun aɲia’n bo lɔ’n maan ɔ wa buli like ng’ɔ kwlɛ i yo’n, i akunndan ekun niannin. Kpɛkun ɔ fuali kɛ “i bɔbɔ wun gblɛ mɔ kpɛ mɔ maan ɔ boman jasin fɛ’n i kpa’n, ɔ́ yáci i sɔ’n. Yɛ, ɔ́ fɛ́ i wun wlá junman’n nun kpa!” Nga liɛ’n, ɔ ti weiin. Akpasua kun aɲia ng’ɔ́ bá lɛ’n, wá yó maan nán mɛn’n yɛ é klo i ɔ, sanngɛ Zoova yɛ é kló i ɔ. (1 Zan 2:15-17) Kɛ ɔ ko yo naan aɲia sɔ’n m’ɔ ti jasin bofuɛ’m be ukalɛ liɛ’n, w’a yo e ye dan’n, maan e trɛn i bo, yɛ e sie e su kpa!