Maan e nian e akunndan’n su
1. ?E akpasua kun aɲia nga é yó i afuɛ 2013 nun’n, i flɛlɛ’n yɛle benin? ?Yɛ ngue ti yɛ be siesieli aɲia sɔ’n niɔn?
1 Zezi seli i sɔnnzɔnfuɛ’m be kɛ ɔ fata kɛ be klo Zoova kpa, be fa be wla’n kwlaa guɛ i su, yɛ maan be akunndan’n kwlaa trɛn i su. (Mat. 22:37, 38) Aɲia dandan nga é yó be afuɛ nga nun’n, be siesieli be kɛ be uka e naan e nzuɛn’n w’a yo kpa w’a tra laa’n. E nvle kun aɲia’n mɔ e yoli’n, i flɛlɛ’n yɛle “Ɔ ti’n mɔ a fa bu akunndan’n sie i kpa.” E cɛn ngunmin kun aɲia’n i flɛlɛ liɛ’n yɛle “Maan e sasa e klun lɔ akunndan’n.” Kpɛkun e akpasua kun aɲia’n i flɛlɛ’n yɛle “Maan e nian e akunndan’n su.” Ɔ taka Matie 22:37 su. Be siesieli aɲia sɔ mun kɛ be uka e naan e nian e akunndan nga e bu’n be su naan b’a jɔ Zoova i klun.
2. ?Kosan benin mun yɛ ɔ fata kɛ e kunndɛ be su tɛlɛ’n aɲia’n i bo lɔ ɔ?
2 ?Ngue ndɛ yɛ bé wá kɛ́n i lɔ ɔ?: Kɛ é tíe afɔtuɛ nga bé mán e aɲia sɔ’n i bo lɔ’n ɔ fata kɛ e kunndɛ kosan cinnjin mɔ e su wa bo su yɛ’n be su tɛlɛ’n:
• ?É yó sɛ naan e akunndan’n w’a faman klɔ ‘sran liɛ’n’?
• ?É yó sɛ naan y’a yi tannin ng’ɔ o be nga be wunman sa wlɛ’n be ɲrun?
• ?Akunndan wafa benin yɛ e kunndɛ kɛ é bú ɔ?
• ?Sɛ e bu ninnge kpa’m be su akunndan’n, ye benin yɛ é ɲɛ́n i ɔ?
• ?Wafa sɛ yɛ e kwla man Zoova i atin kɛ ɔ sie e akunndan’n niɔn?
• ?Ngue yɛ yasua mun nin be yi mun, ɔ nin siɛ nin niɛn mun, yɛ ba’m be kwla yo naan be awlobo tranlɛ’n w’a yo fɛ ɔ?
• ?É yó sɛ naan Zoova i cɛn’n w’a fuman e nun?
• ?Wafa sɛ yɛ é klé kɛ e ɲin o Ɲanmiɛn junman dilɛ’n i sin ɔn?
• ?Be nga be nanti like nga be suan’n su’n, mmlusuɛ benin yɛ be ɲɛn i ɔ?
3. ?Ngue ti yɛ ɔ ti cinnjin kɛ e tran aɲia i cɛn nɲɔn’n be bo ɔ? ?Yɛ ngue ti yɛ ɔ ti cinnjin kɛ e sie e su kpa naan e nanti ndɛ nga é wá súan’n su ɔ?
3 Satan kunndɛ kɛ ɔ́ sáci e ti nun. (2 Kor. 11:3) Ɔ maan ɔ fata kɛ e nian ninnge nga e bu be su akunndan’n be su, naan b’a jɔ Zoova i klun titi. Ɔ ti cinnjin man e kɛ e bu akunndan kunngba nga Klist buli’n wie naan mɛn tɛ nga w’a sannganman e akunndan’n. (1 Kor. 2:16) I sɔ’n ti’n maan e yo like kwlaa nga e kwla yo naan e tran aɲia sɔ’n i cɛn nɲɔn’n be bo. Sɛ e nanti afɔtuɛ nga bé wá mán e aɲia sɔ’n i bo lɔ’n be su’n, i sɔ’n kwla uka e naan y’a tu e klun y’a bo Ɲanmiɛn Sielɛ’n i jasin fɛ’n.—1 Piɛ. 1:13.