‘Aliɛ mɔ be fa man e’n blɛ ng’ɔ ti i nuan su’n, i su’n’
1. ?Wafa sɛ yɛ afuɛ’n cɛn ngunmin kun aɲia’n yoli amun bɔbɔ nin aniaan wie’m be ye ɔ?
1 Blɛ sunman nun’n, kɛ e cɛn ngunmin kun aɲia’n wie’n, ndɛ nga e tili i lɔ’n ti’n, e se kɛ: “Nanwlɛ’n, aɲia nga yoli e liɛ’n su.” Kɛ be wieli afuɛ’n aɲia liɛ’n yo’n, akpasua sunianfuɛ kun klɛli fluwa seli kɛ, i akpasua nun’n, aniaan wie’m be seli kɛ bé úka be jasin fɛ’n bolɛ’n su. Kun ekun seli kɛ: “Ndɛ nga e tili’n man e akunndan. I sɔ’n ukali e naan y’a wun kan mɛn’n su kɔ’n, naan kusu y’a bu e nantilɛ wafa’n i akunndan uflɛ.” Yɛ kun ekun waan: “Jasin bofuɛ kpanngban be seli kɛ aɲia’n tinngeli be. Yɛle kɛ, ɔ ukali be naan be nian nun kpa naan jasin fɛ’n m’ɔ ti junman nanndoliɛ kpafuɛ’n, be ɲin w’a kpaman su.” ?Yɛ amun li, wafa sɛ yɛ e cɛn ngunmin kun aɲia’n yoli amun ye ɔ?
2. ?Ngue yɛ bé kɛ́n i ndɛ afuɛ ba lɔ’n cɛn ngunmin kun aɲia’n i bo ɔ?
2 Afuɛ ba lɔ aɲia liɛ’n, ɔ́ yó e liɛ’n su ekun. I flɛlɛ’n yɛle: Maan e “talo” Zoova. Ɔ taka Jue Mun 118:8, 9 su. Ndɛ nga bé wá yíyí be nun’n, be nun wie’m be flɛlɛ’n yɛ: “Wafa nga Zoova sasa e ɲrɛnnɛn blɛ nun’n,” “Maan e uka e wiengu mun naan be kunndɛ fiawlɛ Zoova i ndɛwa’n bo,” “Sran fɔnvɔlɛ nun’n, maan e sɔnnzɔn Zoova,” “Gbanflɛn nin talua mun, maan amun fa amun wla gua Zoova su!” ɔ nin “Sasalɛ nga Zoova sasa e’n mɛn nunfuɛ’m be lika’n.”
3. ?Ngue yɛ é yó naan ndɛ nga é tí i aɲia’n i bo lɔ’n, w’a yo e ye ɔ?
3 Wafa nga e kwla siesie e wun’n: Kɛ be ko bo cɛn nga é yó aɲia’n su ko kle e’n, maan e fa ajalɛ nga e ko fa naan y’a tran aɲia’n bo’n. E yia be nga e kle be Biblu’n nun like’n wie. Kɛ ɔ ko yo naan ndɛ nga bé kán’n, y’a “fa su kpa’n,” ɔ fata kɛ ɔ ka e klun. (Lik 8:15) I sɔ’n ti’n, aɲia’n i bo lɔ’n, maan e sie e su kpa. Ndɛ nga be ti cinnjin kpa’n, ɔ nin nga e kunndɛ kɛ é nían su nánti’n, annzɛ é fá su bó jasin fɛ’n, maan e klɛ be sie. Kɛ aɲia’n wíe’n, maan e nin e awlofuɛ mun e fa blɛ e koko ndɛ nga be yiyili be nun’n, be su yalɛ. Kusu’n maan e kle wafa trele nga e bɔbɔ yɛ e awlofuɛ’m e kwla fa su’n.
4. ?Ngue ti yɛ ɔ fata kɛ e ɲin tran cɛn ngunmin kun aɲia’n i sin kpa ɔ?
4 Ndɛ nga bé kɛ́n i cɛn ngunmin aɲia’n bo lɔ’n, ɔ ti kɛ aliɛ fɛfɛ kpa kun mɔ be bo be ɲin ase be tɔn i klolɛ su’n sa. Ɔ ti ‘aliɛ mɔ bé fá mán e blɛ ng’ɔ ti i nuan su’n i su.’ Ɔ́ wá mán Klistfuɛ mɔ be di Ɲanmiɛn junman’n be fanngan. I sɔ’n ti’n, amun ɲin nga amún mían naan amun a kwla trɛn i bo’n, maan Zoova ra su.—Mat. 24:45.