Ɲanmiɛn Ndɛ’n maan sran’m be kaci
1. ?Cɛn ngunmin kun aɲia nga é yó i Ɲanmiɛn junman dilɛ afuɛ 2014 nun’n i flɛlɛ’n yɛle benin?
1 Biblu’n finman klɔ sran mɔ fɔ o be nun’n. I ti’n, ɔ kwla kaci e mɛn dilɛ wafa’n, ɔ kwla yo naan e akunndan’n nin ajalɛ nga e fa be’n be nin Zoova klun sa’n b’a wɔ likawlɛ. ?Wafa sɛ yɛ Ɲanmiɛn’n Ndɛ’n le tinmin ɔn? ?Wafa sɛ yɛ Ɲanmiɛn Ndɛ’n kwla ɲan ta e mɛn dilɛ’n su ɔ? ?Yɛ wafa sɛ yɛ e kwla fa uka sran uflɛ ɔ? E lafi su kɛ cɛn ngunmin kun aɲia nga é yó i Ɲanmiɛn junman dilɛ afuɛ 2014 nun’n i bo’n, kosan sɔ’m be nun yiyilɛ’n wá wlá e kwlaa e fanngan kpa. Aɲia sɔ’n i flɛlɛ’n yɛ: “Ɲanmiɛn Ndɛ’n maan sran’m be kaci.” Ɔ taka Ebre Mun 4:12 su.
2. ?Kosan benin mun yɛ ɔ fata kɛ e sie e su e tie be su tɛlɛ’n niɔn?
2 An kunndɛ kosan nga’m be su tɛlɛ mun: Kɛ amún tíe ijɔlɛ mun’n, amun klɛ kosan nga be lɔngɔ su yɛ’m be su tɛlɛ mun sie.
• ?Ngue ti yɛ ɔ fata kɛ e lafi Zoova Ndɛ’n su ɔ? (Jue. 29:4)
• ?Wafa sɛ yɛ e kwla yo naan Ɲanmiɛn Ndɛ’n w’a ɲan ta e su ɔ? (Jue. 34:9)
• ?Ngue yɛ e kwla yo naan Ɲanmiɛn Ndɛ’n w’a ɲan ta jasin bolɛ’n nun ɔn? (2 Tim. 3:16, 17)
• ?Ngue yɛ e kwla yo naan Satan i mɛn’n w’a bubuman e sa sin ɔn? (1 Zan 5:19)
• ?Gbanflɛn nin talua mun, ngue yɛ amun kwla yo naan Ɲanmiɛn w’a yra amun su ɔ? (Zer. 17:7)
• ?Kannzɛ e leman wunmiɛn bɔbɔ’n, wafa sɛ yɛ e kwla yo yakpafuɛ ɔ? (2 Kor. 12:10)
• ?Kannzɛ bɔbɔ nzuɛn tɛ wie kle e yalɛ w’a cɛ’n, ngue ti yɛ ɔ fata kɛ e mian e ɲin titi naan e wlɛ i ase ɔ? (Efɛ. 4:23)
3. E si kɛ e cɛn ngunmin kun aɲia’n i bo ijɔlɛ’m bé wá wlá e fanngan. ?Sanngɛ ngue yɛ ɔ kwla wla e fanngan ekun ɔn?
3 Nanwlɛ, ndɛ sɔ’m bé wá wlá e fanngan kpa! E akpasua kun aɲia nin e nvle kun aɲia’m be bo’n, e kle kɛ e wiengu’m be ndɛ lo e. Kpɛkun e nin e niaan Klistfuɛ mɔ be fin asɔnun uflɛ nun’n, e tran aniaan tranlɛ. I kunngba’n yɛ é wá yó i e cɛn ngunmin kun aɲia’n i bo wie ɔ. (Jue. 133:1-3; 2 Kor. 6:11-13) I sɔ’n ti’n, maan e nin be nga e si be laa’n e bo nzɛmunlɛ, kpɛkun maan e tra sran uflɛ janvuɛ. Sɛ ijɔfuɛ aofuɛ’n wie fin Betɛli annzɛ ɔ ti nvle sunianfuɛ’n, e kwla sɔ i nun klanman. Nanwlɛ, e su minndɛ kɛ e cɛn ngunmin kun aɲia’n ɔ ju ndɛndɛ kpa!