Jasin fɛ’n mɔ kɛ be ɲɛn i wun atin be bo’n, amun sa ju nun!
1. (a) ?Jasin fɛ’n mɔ kɛ be ɲɛn i wun atin be bo’n, yɛle benin? (b) ?Aɲia nga bo wa’n, e nun sran benin yɛ, kɛ jasin bofuɛ wie’m be ɲannin jasin fɛ’n bolɛ i wun atin’n, yɛ be boli kleli be ɔ?
1 ?Amun asɔnun nun’n, be nga be fali nanwlɛ atin’n su’n, afin kɛ jasin bofuɛ wie’m be ɲannin jasin fɛ’n bolɛ i wun atin’n, yɛ be boli kleli be’n, be ti nɲɛ? Sɛ be bo be nuan’n, atrɛkpa’n, ɔ́ bó amun nuan. Kɛ be se kɛ be ɲan jasin fɛ’n bolɛ i wun atin yɛ be bo’n, yɛle kɛ aliɛ ba kwlaa nun’n, sɛ e su tu ajalɛ o, sɛ e ɔli e osufuɛ annzɛ e mantanfuɛ i osu nianlɛ o, sɛ e o aata diwlɛ’m be nun o, sɛ e o suklu annzɛ junman su lɔ annzɛ lika uflɛ o, e bo jasin fɛ’n kle sran mun. Be fali aniaan 200 mɔ be yoli be batɛmu’n. Be wunnin i kɛ be nun 80 be fali nanwlɛ atin’n su’n, afin kɛ jasin bofuɛ wie’m be ɲannin jasin fɛ’n bolɛ i wun atin’n, yɛ be boli kleli be ɔ. Ɔ maan, jasin fɛ’n bolɛ wafa sɔ’n ba nvle kpa.
2. Sran wie mɔ Biblu’n kan be ndɛ mɔ kɛ be ɲannin jasin fɛ’n i bolɛ’n i wun atin be boli’n, an kan be ndɛ.
2 Klistfuɛ klikli’m be blɛ su’n, kɛ jasin bofuɛ’m bé kɔ́ lika annzɛ bé yó like wie mɔ be wun kɛ be le jasin bolɛ’n i wun atin’n, be bo. I wie yɛle kɛ, kɛ Zezi sín Samari lɛ m’ɔ wunnin bla kun m’ɔ bali nzue salɛ Zakɔbu i nzue gbo nun’n, ɔ boli jasin fɛ’n kleli i. (Zan 4:6-26) Etiopi bian kun ti Etiopi lɔ famiɛn bla’n i sran dan kun. Kɛ Filipu tó i nn ɔ su kanngan Ɲanmiɛn nuan ijɔfuɛ Ezai i fluwa’n nun. Filipu usɛli i kɛ: “?Ndɛ nga a kɛnngɛn i lɛ’n a si i bo?” Kɛ be yalɛ kokolɛ’n boli i bo kɛ ngalɛ sa. (Yol. 8:26-38) Kɛ be wlali akoto Pɔlu bisua klɔ ng’ɔ suan Filipu’n su lɔ’n, ɔ boli jasin’n kleli bisua su kpɛn kun. (Yol. 16:23-34) I sin’n, i nun nga be fɛli i sieli sua kun nun’n, mɔ sonja kun niɛn i su’n, “be kwlaa nga be bɛ i wun wunlɛ’n, ɔ sɔ be nun. Ɔ kan Nyanmiɛn sielɛ ndɛ’n kle be, yɛ ɔ kle e Min Jésus-Krist i ndɛ’n.” (Yol. 28:30, 31) E kusu, kannzɛ bɔbɔ e sa ɲan’n, jasin fɛ’n mɔ kɛ be ɲɛn i wun atin’n be bo’n, e kwla bo wie. ?Wafa sɛ?
3. ?Sɛ e sa ɲan’n, ngue yɛ ɔ kwla uka e ɔ?
3 I su fitilɛ: E nun kaka, kɛ e siman sran kun’n, kɛ ɔ́ yó naan e nin i e bo yalɛ kokolɛ bo’n, ɔ ti kekle. Be nga be timan Zoova i Lalofuɛ mɔ e si be bɔbɔ’n, jasin fɛ’n be kan klelɛ’n kwla yo tankantankan kan e sa nun. Zoova yoli i sufuɛ’m be klun ufue. Yɛ, ndɛ nanwlɛ m’ɔ lemɛn i wunsu’n, ɔ fa wlali be nuan. Sɛ e bu i sɔ’n, ɔ nin ɲrɛnnɛn m’ɔ o mɛn’n nunfuɛ’m be su’n, be su akunndan’n, i sɔ’n sú e bo maan é íjɔ. (Zon. 4:11; Jue. 40:6; Mat. 13:52) Asa kusu, e kwla srɛ Zoova kɛ ɔ uka e naan e ‘tra e anwlɛn e kɛn i jasin fɛ’n.’ (1 Tɛs. 2:2) Gileadi suklu ba kun seli kɛ: “Kɛ ɔ ti kekle man min kɛ e nin sran mun e koko yalɛ’n, blɛ sunman nun’n, n wunnin kɛ Ɲanmiɛn srɛlɛ’n tili min wun ɲanman nun kpa.” Sɛ e wun kɛ e su sisi e bo naan y’a ijɔ’n, maan e klun lɔ’n, e srɛ Ɲanmiɛn kpe kan.— Nee. 2:4.
4. ?Kɛ e wun sran kun’n, ngue yɛ e kwla se e wun kɛ é yó ɔ? ?Yɛ ngue ti ɔ?
4 Jasin fɛ’n mɔ kɛ e ɲɛn i wun atin’n e bo’n, i ndɛ yɛ e su kan ɔn. I lɛ’n kle kɛ e ndɛ’n i su fitilɛ’n annzɛ Biblu’n nun ndɛ nga é kánngan nun’n, be timan siesiewa sɛsɛsɛ. Sɛ e wun sran kun naan e seman e wun kɛ saan é bó jasin klé i kekle nun’n, sanngɛ yalɛ ngbɛn yɛ e nin i é kókó’n, i sɔ’n kwla uka e. Jasin fɛ’n bofuɛ sunman be waan kɛ be yo sɔ’n mɔ be nin sran’n bé kókó yalɛ kɔ́’n, be klun titiman be kun. Ɔ maan, be bo jasin fɛ’n kle i siɛn’n. Sɛ e wun kɛ yalɛ kokolɛ’n yoman sran’n i fɛ’n, nán e yo i kekle nun. E nin sran’n e titi nun amanniɛn su.
5. ?Ajalɛ benin yɛ aniaan bla kun fa naan w’a kpɛ jasin fɛ’n bolɛ’n i wun atin ɔn?
5 Aniaan bla kun sa ɲan. Kɛ ɔ kɔ gua dilɛ’n, i ɲin ta sran’m be ɲrun. Kɛ ɔ yo sɔ’n nn srilɛ o i nuan. Sɛ ɔ wun kɛ sran’n kusu sri’n, ɔ kan ndɛ wie kle i. Sɛ sran’n tɛ i su klanman’n, ɔ se i wun kɛ, ɔ nin i koko yalɛ kɔ i ɲrun ɔn, ɔ yo ye. Kɛ sran’n íjɔ’n, ɔ sie i su kpa kɛ ɔ ko yo naan w’a wun Ɲanmiɛn ndɛ ng’ɔ ko kan ko kle i naan w’a yo i fɛ’n. Aniaan bla’n i ajalɛ sɔ’n ti’n, ɔ fali e fluwa kpanngban mannin. Yɛ, ɔ boli sran kun i Biblu’n nun like klelɛ bo.
6. ?Sɛ e o lika wie’n, wafa sɛ yɛ e kwla kpɛ jasin fɛ’n i bolɛ’n i wun atin ɔn?
6 Yalɛ kokolɛ’n i bo bolɛ: ?Wafa sɛ yɛ e kwla bo yalɛ kokolɛ’n i bo ɔ? Kɛ Zezi wunnin bla m’ɔ bali nzue salɛ nzue gbo nun’n, ɔ fali Ɲanmiɛn ndɛ kanlɛ fa sinnin nzue srɛlɛ nun. (Zan 4:7) E kusu’n, i bo bolɛ nun’n, e kwla yo sran’n like annzɛ e usɛ i kosan kun aklunjuɛ su. Kɛ é kókó yalɛ kɔ́’n, atrɛkpa’n, e kwla wun Biblu’n nun ndɛ kun mɔ é fá wlá e ijɔlɛ’n nun ɔn. Ɔ maan, é kwlá yó naan siɛn’n, Ɲanmiɛn ndɛ’n w’a lo sran’n. (Aku. 11:6) Aniaan wie’m be liɛ’n, kɛ be nin sran kun bé bó yalɛ kokolɛ bo’n, be kan ndɛ wie m’ɔ bo i nuan ɔn. Kɛ ɔ ko yo sɔ’n, sran’n ka lɛ usa nun. I ajalɛ kun yɛ: sɛ amun wo dɔɔtrɔ sua kun nun naan an su minndɛ dɔɔtrɔ’n, an kwla se sran’n kɛ: “N liɛ’n, cɛn nga n su tɔman tukpacɛ kun’n yɛ min ɲin wo i sin ɔn.”
7. ?Sɛ e si ninnge’m be nzɔliɛ sie’n, wafa sɛ yɛ ɔ kwla uka e naan y’a kpɛ jasin fɛ’n bolɛ’n i wun atin ɔn?
7 Sɛ e sie ninnge’m be nzɔliɛ kusu’n, ɔ kwla uka e naan e nin sran mun y’a bo yalɛ kokolɛ bo. E kwla wun siɛ annzɛ niɛn kun nin i mma mun mɔ be ɲin timan kekle ɔ. Ɔ maan, e kwla usɛ i kɛ: “?Wafa sɛ yɛ a tali ɔ mma mun m’ɔ maan be aeliɛ’n ti klanman sɔ ɔ?” Aniaan bla kun liɛ’n, kɛ i wiengu junman difuɛ’m be koko yalɛ’n, ɔ sie ndɛ ng’ɔ ti be cinnjin’n i nzɔliɛ. Kpɛkun i sin, ɔ jran su yɛ ɔ nin be koko su yalɛ. Cɛn kun’n, ɔ tili i kɛ be junman su lɔ bla kun su wa ja bian. Ɔ maan, ɔ fali Réveillez-vous ! kun m’ɔ kan wafa nga be nga be kunndɛ kɛ bé já bian annzɛ bla’n be kwla siesie be wun’n, mɛnnin i. I sɔ’n yoli maan i sin, be kokoli Biblu’n i nun ndɛ wie mun ekun be su yalɛ.
8. ?Wafa sɛ yɛ e fluwa’m be kwla uka e naan e nin sran mun y’a bo yalɛ kokolɛ bo ɔ?
8 Ajalɛ kun ekun mɔ e kwla fa’n, yɛle kɛ maan e kanngan e fluwa’m be nun’n, lika nga sran’m be kwla wun e lɛ’n. Wafa nga aniaan bian kun yo’n yɛ: ɔ fa Sasafuɛ Tranwlɛ’n annzɛ Réveillez-vous ! kun. Ɔ tike i ndɛ akpasua nga i flɛlɛ’n kwla yo sran’m be fɛ’n su. Yɛ ɔ kanngan nun i klun lɔ. Sɛ ɔ wun kɛ sran kun o i wun lɛ naan i ɲin ta fluwa’n nun’n, ɔ usɛ i kosan kun annzɛ kusu ɔ yiyi ndɛ ng’ɔ su kanngan nun’n, i nun kpe kan kle i. Blɛ sunman’n, i sɔ’n yo maan ɔ nin sran’n be koko yalɛ klanman yɛ ɔ bo jasin fɛ’n kle i. E junman su lɔ annzɛ suklu lɔ’n, e kwla sie e fluwa mun kan sran’m be kwla wun i lɛ’n. Ɔ kwla yo maan be konvi sɔ i nun kannganlɛ yɛ be usa be su kosan wie mun.
9, 10. (a) ?Wafa sɛ yɛ e kwla kpɛ jasin fɛ’n bolɛ’n i wun atin ɔn? (b) Nga amun bɔbɔ be yo’n, amun bo su.
9 Maan e kpɛ i wun atin: E ɲrun w’a ka koko. Ɔ maan, jasin fɛ’n i bolɛ’n ti cinnjin kpa. I ti’n, e kwlá seman kɛ é ká lɛ sa ngbɛn naan é ɲán jasin fɛ’n bolɛ’n i wun atin. Ɔ fata kɛ, aliɛ ba kwlaa nun’n, kɛ é yó e ninnge mun annzɛ é kɔ́ lika’n, e kpɛ jasin fɛ’n i wun atin. Sran nga atrɛkpa’n, e nin be yía nun’n, maan e bu be akunndan. Yɛ, wafa nga e nin be kwla bo yalɛ kokolɛ bo kɛ sran kun nin i janvuɛ sa’n, maan e bu i akunndan wie. Kɛ é fíte’n, maan e fa Biblu’n kun ɔ nin fluwa nga e kwla fa man be nga Ɲanmiɛn ndɛ’n lo be’n.—1 Piɛ. 3:15.
10 Jasin bofuɛ kaka be ɲin ti klɛklɛ jasin fɛ’n i wun atin kpɛlɛ nun. Ɔ maan, be wun ajalɛ fanunfanun nga be kwla fa’n. I wie yɛle aniaan bla kun liɛ’n. Ɔ tran nglo sua kun mɔ be sɛsɛ i kpa’n, mɔ i nun sran’m be sɔnnin’n, i nun’n. Be ɲin su yiyiwlɛ lika kun o lɔ. Ɔ kɔ lɔ ko fa potomo losinlosin wie mun sasa be wiengu su fa yi ninnge nga Ɲanmiɛn yili be mun’n, be desɛn nglanmannglanman kpa. Be dun mmua yili desɛn sɔ mun potomo’m be su. Kɛ sran’m be ba mɔ bé yí i desɛn’m be ayɛ’n, ɔ fa blɛ sɔ’n kan “nyanmiɛn su lɔ uflɛ nin asiɛ uflɛ” nga Biblu’n waan Ɲanmiɛn wá fá mán e’n, i ndɛ. (Ngl. 21:1-4) ?E wun wafa uflɛ mɔ e bɔbɔ e kwla kpɛ jasin fɛ’n i bolɛ i wun atin ɔn?
11. ?Be nga e ɲan jasin fɛ’n bolɛ i wun atin mɔ e bo kle be’n, ngue yɛ e kwla yo naan y’a nian be lika ɔ?
11 Be nga ndɛ’n loli be’n, be lika nianlɛ: Sɛ ndɛ nga e kannin’n loli sran kun’n, nán maan ɔ ka ngalɛ’n su. Sɛ i sɔ yolɛ nin i fata’n, e kwla se i kɛ: “Yalɛ kan nga e kokoli i yɛ’n yoli min fɛ kpa. ?Nin yɛ e kwla wun e wun ekun naan y’a koko yalɛ kan ekun ɔn?” Jasin bofuɛ wie’m be fa be bɔbɔ be adrɛsi’n, ɔ nin be telefɔnu nimielo be man sran’n, kpɛkun be se i kɛ: “Yalɛ nga e kokoli’n yoli min fɛ kpa. Sɛ a kunndɛ kɛ n yiyi nun kpa ekun n kle wɔ’n, min adrɛsi nin min nimielo yɛ be o lɛ.” Sɛ e bɔbɔ e kwlá ko nianman sran’n i osu’n, maan ndɛndɛ kpa e fɛ i e wla asɔnun ng’ɔ kwla niɛn i lika’n, i sa nun. I lɛ nun’n, maan e klɛklɛ fluwa Veuillez suivre l’intérêt (S-43) su e man e asɔnun kpɛnngbɛn’n m’ɔ ti fluwa klɛfuɛ’n.
12. (a) ?Sɛ e ɲan jasin fɛ’n bolɛ i wun atin naan e bo’n, ngue ti yɛ ɔ nin i fata kɛ e klɛ dɔ nga e dili’n niɔn? (b) ?Kɛ aniaan wie’m be ɲannin jasin fɛ’n i wun atin mɔ be boli’n, i bo’n guali sɛ? (An nian ndɛ ng’ɔ o kuku “Jasin fɛ’n mɔ kɛ be ɲɛn i wun atin be bo’n, ɔ ba nvlɛ!” i nun.)
12 Kɛ e ɲan jasin fɛ’n i wun atin mɔ e bo’n, blɛ nga e di’n, ɔ nin i fata kɛ e klɛ i e rapɔru’n su. I sɔ’n ti’n, i kan nga e yo i aliɛ ba kwlaa nun’n, nán e wla fi i klɛlɛ’n su. Amun nian: Sɛ anglo kwlaa jasin bofuɛ kun kpɛ jasin fɛ’n bolɛ i wun atin’n, naan ɔ fa miniti nnun bo’n, anglo kwlaa nun’n dɔ akpinngbin 17 úka nga kɛ é sé yɛ’n e di’n su!
13. ?Ngue yɛ ɔ fata kɛ ɔ su e bo naan kɛ e ɲan jasin fɛ’n bolɛ’n i wun atin’n, y’a bo ɔ?
13 Like ɲɛnmɛn kpafuɛ nga ti yɛ e kɛ e ɲan jasin fɛ’n i wun atin mɔ e bo’n, yɛle Ɲanmiɛn nin e wiengu mɔ e klo be’n. (Mat. 22:37-39) Zoova i nzuɛn’n ɔ nin i klun sa’n i su ye mɔ e si’n, ɔ su e bo maan e kan i ‘sielɛ’n m’ɔ yo nyɛnmɛn m’ɔ lɛ nyrun’n,’ i ndɛ. (Jue. 145:7, 10-12) Bikisa mɔ blɛ kan te o lɛ’n, e wiengu mun mɔ be ndɛ lo e kpa’n ti’n, kɛ e ɲan jasin’n bolɛ’n i wun atin kan cɛ, e ka lɛ e bo. (Rɔm. 10:13, 14) Sɛ e siesie e wun kan naan e fa akunndan kan e yiɛ i’n, é kwlá bó jasin fɛ’n, kɛ e ko ɲɛn i wun atin. Nja, sɛ e yo sɔ’n, atrɛkpa’n é kwlá úka sran kpa wie naan w’a si ndɛ nanwlɛ’n naan y’a di su aklunjuɛ.
[Ndɛ kwle, bue 4]
E kwla fa sie e ɲrun kɛ, é wúnnge sran kun wun naan e nin i é kókó yalɛ.
[Ndɛ kwle, bue 5]
Jasin bofuɛ kaka be ɲin ti klɛklɛ jasin fɛ’n i wun atin kpɛlɛ nun.
[Kuku, bue 5]
Wafa nga e kwla bo i bo’n
◼ Maan e dun mmua srɛ Ɲanmiɛn kɛ ɔ uka e.
◼ Maan e fa e ɲin sie i be nga be fa sran wɛtɛɛ ɔ nin be nga be ɲin kan ase’n, be su.
◼ Maan e ɲin ta sran’m be ɲrun. Maan srilɛ kan tran e nuan. Maan e bo ndɛ kun m’ɔ yo e fɛ mɔ e si kɛ ɔ́ yó sran’n i fɛ’n, i su.
◼ Maan e si e su sie.
[Kuku, bue 6]
Jasin fɛ’n mɔ kɛ be ɲɛn i wun atin be bo’n, ɔ ba nvlɛ!
• Aniaan kun ɔli loto nun mianmianwlɛ lika nun kɛ be mianmian i loto’n nun. Ɔ boli jasin fɛ’n kleli be nga be o i wun lɛ’n, yɛ ɔ fali sran’m be yialɛ fluwa nɲa’n yiali be nvle kun aɲia’n, i bo lɔ nzra nun ijɔlɛ’n bo. I afuɛ kun m’ɔ́ yía’n, aɲia dan kun bo’n, aniaan kun yoli i like juejue su. Ɔ siman aniaan sɔ’n. Kannzu, be ng’ɔ toli be loto mianmianwlɛ lika nun lɔ’n, m’ɔ fali sran’m be yialɛ fluwa’n yiali be’n, be nun kun ɔn! Sran sɔ’n ko tieli nzra nun ijɔlɛ’n, yɛ ɔ seli aniaan’m be kɛ be kle i Biblu’n nun like. I afuɛ kun m’ɔ́ yía lɛ’n, nn b’a yo ɔ nin i yi be batɛmu.
• Aniaan bla kun liɛ’n, kɛ jasin bofuɛ kun ɲannin jasin fɛ’n bolɛ i wun atin m’ɔ boli kleli i’n, yɛ maan ɔ fali nanwlɛ’n i atin su ɔ. Ɔ se i wun kɛ ɔ le i jasin bowlɛ m’ɔ ti i liɛ ngunmin kun ɔn. I nunfuɛ mun yɛle sran kwlaa nga i mma nsan’m be dunman nun ti ɔ nin be yia nun’n. Sran sɔ mun yɛle be ng’ɔ nin be tran mantan su’n, ɔ nin siɛ nin niɛn ng’ɔ nin be yia i mma’m be suklu lɔ’n. Annzɛ kusu ng’ɔ nin be yia kɛ bé yó ba’m be ti aɲia suklu lɔ’n. Kɛ ɔ yo be like m’ɔ bo i dunman kle be’n, ɔ tu i klun kan ndɛ kpe kaan kun kle be. Ɔ se be kɛ i mma’m be talɛ nun’n, wafa nga Biblu’n ukɛ i’n, be flɛman. Kpɛkun, ɔ nin be koko ndɛ uflɛ su yalɛ. Kɛ ɔ ko bo ndɛ’n i bo sɔ’n, ɔ wun kɛ sɛ i waan ɔ́ bó Biblu’n nun ndɛ wie su’n, i yolɛ yoman ya kun. Ajalɛ sɔ’n ti maan ɔ kwla ukali sran 12 naan b’a yo be batɛmu.
• Be nga bo yo asiransi’n, be nun kun bali aniaan bla kun i wun wlɛ. Aniaan bla’n fali blɛ sɔ’n boli jasin fɛ’n kleli i. Ɔ usali bian’n, sɛ ɔ kunndɛ kɛ i wun yo i juejue titi, naan alaje’n si i, naan kusu ɔ́ ɲán anannganman nguan. Ɔ kplinnin aniaan’n i su kɛ ɛɛn naan sanngɛ asiransi wafa benin yɛ aniaan’n su kɛn i ndɛ ɔ. Aniaan’n fali ninnge nga Ɲanmiɛn waan ɔ́ wá yó mɔ Biblu’n kan be ndɛ’n, kleli i. Kpɛkun ɔ fali e fluwa’m be nun kun mɛnnin i. Bian’n fali nnɔsua kunngba cɛ kanngannin fluwa wunmuan’n nun. Aniaan bla’n fali ajalɛ naan b’a bo bian’n i Biblu’n nun like klelɛ bo. Ɔ wa ɔli aɲia’m be bo yɛ i sin’n be yoli i batɛmu.
• Alapla kun nun’n, aniaan bla kun nin mannin bla ng’ɔ ti mɛntɛn i’n, be kokoli yalɛ ɔ maan ɔ kwla boli’n jasin fɛ’n kleli i. Kɛ be juli be juwlɛ’n, aniaan bla’n fali i adrɛsi’n nin i telefɔnu nimielo’n mannin bla’n. Yɛ, ɔ wlɛli i fanngan naan sɛ Zoova i Lalofuɛ’m be kɔ i awlo lɔ’n, ɔ se be naan be kle i Biblu’n nun like. I aliɛ m’ɔ́ cɛ́n ɔn, aniaan bla nɲɔn b’a bobo i anuan. Bla’n boli Biblu’n nun like suanlɛ bo. Ɔ wɔli i ɲrun ndɛndɛ yɛ be yoli i batɛmu. I sin m’ɔ́ lá nun kan ɔn, i bɔbɔ kle sran nsan be Biblu’n nun like.
• Aniaan bian kun wunman ase. Ɔ le afuɛ 100. Ɔ tran blɔfuɛ’m be lɔ’n sran oke’m be dɔɔtrɔ’m be nun kun nun. Blɛ sunman nun’n, ndɛ ng’ɔ kan yɛ: “E mian Ɲanmiɛn Sielɛ’n i wun o!” I sɔ’n maan dɔɔtrɔfuɛ nin i wiengu oke wie’m be usɛli i Ɲanmiɛn Sielɛ’n i su kosan. Ɔ maan, ɔ kleli be like nga be flɛ i Ɲanmiɛn Sielɛ’n. Dɔɔtrɔfuɛ’m be nun bla kun seli i kɛ ɔ kle i like nga sɛ ɔ ju mɛn klanman’n nun lɔ’n, ɔ́ yó’n. Ɔ tɛli i su kɛ: “Ń wá wún ase yɛ ń nánti ekun, kpɛkun, ń wɔ́ bubuwafuɛ’m be bia mɔ i nun yɛ n tran’n, i nun.” Kɛ m’ɔ wunman ase’n, ɔ srɛ bla’n kɛ ɔ kanngan periodiki’m be nun mɛn i. Kɛ aniaan’n i wa bla’n bali i osu nianlɛ’n, bla’n srɛli i kɛ ɔ́ fá fluwa sɔ mun kɔ́ awlo. Dɔɔtrɔ bla’m be nun kun seli aniaan bian’n i wa’n kɛ: “Ndɛ nga e kɛn i wa siɛn’n yɛ: ‘E mian Ɲanmiɛn Sielɛ’n i wun o!’”
• Aniaan bla kun ɔli aliɛ diwlɛ kun nun’n aliɛ tolɛ. Ɔ nin sran’m be lɔngɔli. Bian oke wie’m be ti lɛ bé kán politiki ndɛ yɛ be nɛn’n guɛli i su nun ɔn. Be nun kun seli kɛ be nvle’n i awa’n kwlá yoman naan be su sa’n w’a wie. Yɛ aniaan bla’n seli i wun kɛ: “Nga liɛ’n, muae’n w’a fua min.” Ɔ srɛli Ɲanmiɛn kpe kan. Yɛ ɔ wunngeli be wun lɔ ɔ. Kɛ ɔ yoli be like wieli m’ɔ boli i dunman’n, ɔ yiyili nun kleli be kɛ Ɲanmiɛn Sielɛ’n yɛ ɔ́ wá yó maan sran’m be su sa’n wíe ɔ. Kpɛkun, ɔ fali e fluwa pɛplɛpɛ kun m’ɔ o i sa nun’n mannin be. I ɲin m’ɔ́ tó i ɔ, aliɛ diwlɛ lika’n i su kpɛn’n yɛ ɔ́ bá yɛ. Ɔ buli i kɛ bian’n su wa kɛn i bo. Sanngɛ bian’n seli i kɛ ɔ tieli ndɛ ng’ɔ kannin’n naan ɔ kunndɛ kɛ aniaan’n mɛn i fluwa’n wie. Lika sɔ’n i nun junman difuɛ bla kun m’ɔ tieli ndɛ’n wie’n, ɔ́ wúnnge aniaan’n i wun lɔ ɔ, i ɲinmuɛn’n kloklo i ti nun. I waan ɔ́ yáci sunlɛ ɔ, ɔ yoman ye. Ɔ wa seli aniaan bla’n kɛ, ɔ yacili Biblu’n nun like suanlɛ naan siɛn’n ɔ kunndɛ kɛ be kle i Biblu’n nun like kɛ laa’n sa ekun.