Maan e bo jasin fɛ’n i kpa tra laa: E man sran’m be ijɔlɛ naan sɛ e ɲɛn i wun atin’n, e bo jasin fɛ’n e kle be

?Ngue ti yɛ ɔ ti cinnjin ɔn? Kɛ é bó jasin fɛ’n awloawlo’m be nun, wie liɛ’n e toman sran kpanngban awlo. Sanngɛ, atrɛkpa’n e nin be e fu loto kunngba’n nun, annzɛ e kɔ e wun ayre yolɛ dɔɔtrɔ kunngba’n nun, annzɛ suklu lɔ nin e junman diwlɛ lɔ’n, kɛ é dí like amidi su’n, be ti e wun lɛ. Like nga Zoova kunndɛ’n yɛle kɛ maan sran kwlaa tie Ɲanmiɛn Sielɛ’n i jasin fɛ’n. (1 Tim. 2:3, 4) Ɔ maan, kɛ ɔ ko yo naan i sɔ liɛ’n w’a yo ye’n, ɔ fata kɛ e mian e ɲin naan e man be ijɔlɛ.

?Wafa sɛ yɛ é yó i sɔ ɔ?:

E kpa sran’m be nun. ?Kɛ e nian siin’n, ɔ ti sran kun mɔ sɛ e mɛn i ijɔlɛ’n ɔ́ tɛ́ e su ɔ? ?E kwla ɲan atin e koko yalɛ wɛtɛɛ su? Jasin bofuɛ wie’m be nian sran i ɲrun kpɛkun be sri puɛɛ. Sɛ sran’n sri puɛɛ wie’n, be mɛn i ijɔlɛ.
Sɛ srɛ kun e kusu’n, maan e srɛ Ɲanmiɛn e klun lɔ naan ɔ wla e yakpa.—Nee. 2:4; Yol. 4:29.
I bo bolɛ nun’n, maan e yo i like. Kɛ Zezi nin Samari bla’n bé kókó yalɛ’n, nán Ɲanmiɛn Sielɛ’n i ndɛ yɛ ɔ dun mma kannin ɔn. (Zan 4:7) E kusu, i bo bolɛ’n nun’n, wie liɛ’n, e kwla se sran’n kɛ: “Ɔ mma’m be ɲin yi sran o! Mo nin be yolɛ!” Sɛ e klo kusu’n, e kwla usa sran’n i kosan kɛ: “A tili ndɛ nga be kɛnnin i anunman kɔnguɛ’n wie.”
Kɛ e bo yalɛ kokolɛ’n i bo’n, maan e nian, kpɛkun sɛ e ɲɛn i wun atin’n, maan e bo jasin fɛ’n. Sanngɛ i sɔ yolɛ’n nun’n, nán maan e kpli. E minndɛ naan blɛ ng’ɔ nin i fata’n ɔ ju ka. Kpɛkun e kwla kan ndɛ kun m’ɔ kwla su sran’n i bo kɛ ɔ usa e kosan’n. I wie yɛle kɛ sɛ awlobo tranlɛ’n i ndɛ yɛ e su kan’n, e kwla se i kɛ: “Ba talɛ i su afɔtuɛ nga n wunnin be’n, nanwlɛ, be ti kpa o!” Sɛ kusu sa tɛtɛ nga be juli e tranwlɛ nun lɔ’n i su yalɛ yɛ e su koko’n, e kwla se kɛ: “Koko nun wa’n, n kanngannin fluwa kun nun. Fluwa sɔ’n nun’n be klɛli i kɛ sa tɛtɛ sɔ’m bé wíe.” Sanngɛ sɛ e koko yalɛ lele naan y’a kwlá boman jasin fɛ’n, nán maan e sa sin bubu e.
Maan e fluwa nɲa mun annzɛ e fluwa uflɛ wie’m be tran e bo. I liɛ’n, sɛ Ɲanmiɛn ndɛ’n lo sran kun’n, e kwla mɛn i kun.

Anglo nga nun’n, maan e yo nga e nian:

Le mɔcuɛ kwlaa nun’n, maan e mian e ɲin naan e man sran kun annzɛ sran kun tra su be ijɔlɛ. Kpɛkun sɛ e ɲɛn i wun atin’n, maan e bo jasin fɛ’n e kle be.