?Ɔktɔblu nun’n, amún bó sran kun i Biblu’n nun like klelɛ bo?
1. ?Ɔktɔblu anglo nun’n, fluwa benin yɛ é fá mán sran mun ɔn?
1 Ɔktɔblu anglo nun’n, Sasafuɛ Tranwlɛ’n nin Réveillez-vous ! yɛ é fá mán sran mun ɔn. Sɛ Ɲanmiɛn ndɛ’n lo be naan e sa e sin e ko nian be osu’n, maan e fa fluwa nɲa ?Amun kunndɛ kɛ amún sí ndɛ ng’ɔ ti nanwlɛ’n? e man be naan e mian e ɲin e bo be Biblu’n nun like klelɛ bo. ?Wafa sɛ yɛ e kwla yo i sɔ ɔ?
2. ?Kɛ é kó nian be nga be sɔli periodiki’m be nun klanman be osu’n, wafa sɛ yɛ e kwla sin fluwa nɲa Si ndɛ nanwlɛ’n i lika e bo be Biblu’n nun like klelɛ bo ɔ?
2 Wafa nga e kwla fa fluwa nɲa’n e di junman’n: E kwla se sran’n kɛ: “Fluwa nga acɛnnin sin n fa mannin wɔ’n, kannzɛ sran’m be Ɲanmiɛn sulɛ wafa nin be finwlɛ’n ti sɛ ti sɛ’n, ɔ wla be kwlaa be fanngan kɛ nian Biblu’n nun. [Fa fluwa nɲa Si ndɛ nanwlɛ’n fa man sran’n kpɛkun fa i ɲin sie i kosan nga be o i bue klikli’n su, be su.] Kosan nga’m be ti cinnjin kpa yɛ Biblu’n tɛ be su klanman. ?W’a bu be nun wie’m be akunndan le?” Kɛ sran’n ko tɛ e su’n, maan amun nin be kanngan kosan sɔ’m be nun kun i su tɛlɛ ng’ɔ o fluwa nɲa nun’n, i nun. Kpɛkun amun kanngan Biblu’n nun ndɛ mma’m be nun kun nun. I sin’n, maan e yiyi nun kle i kɛ like nga Biblu’n kle’n, i bue kaan sa yɛ y’a yiyi nun y’a kle i lɛ. Kpɛkun e fa fluwa Biblu’n kle e mɛn i. E kwla fa i bue ng’ɔ kle like ng’ɔ klɛ fluwa’n nun naan ɔ kpa ndɛ tre kun naan e nin i e koko ndɛ tre sɔ’n i ndɛ kpɔlɛ klikli’m be su yalɛ. Annzɛ kusu, ndɛ nga e dun mmua fitili su fluwa nɲa nun’n, e kwla fa fluwa Biblu’n kle i bue ng’ɔ yiyi nun kpa ekun’n, naan e nin i e koko su yalɛ. I bue sɔ’m be nun wie mun yɛ:
● ?E wun sa lo Ɲanmiɛn sakpa? (bue 10-11 § 6-10)
● ?Cɛn wie lele’n, alɛ’n nin ɲrɛnnɛn’n bé wíe? (bue 12 § 12-13)
● ?Be wu be o lɔ? (bue 59-60 § 7-8)
● ?Be nga be wuli’n be liɛ w’a wie mlɔnmlɔn? (bue 71 § 13-15)
● ?Wafa sɛ yɛ ń srɛ́ Ɲanmiɛn naan w’a ti ɔ? (bue 166-167 § 5-8)
● ?Ń yó sɛ naan min liɛ w’a yo ye? (bue 9 § 4-5)
3. ?Sɛ y’a kwlá boman sran’n i Biblu’n nun like klelɛ bo cɛn nga e ko niɛn i osu’n, ajalɛ benin yɛ e kwla fa ɔ?
3 I yo, kpalɛ klikli nga é kó nián sran’n i osu’n, sɛ sa wie ti e su kwlá boman i like klelɛ bo fluwa Biblu’n kle’n i nun’n, maan e nin i ti e wun aniɛn naan cɛn uflɛ e sa e sin e yalɛ kokolɛ’n su. E kwla nian wafa nga ndɛ’n fa lo sran’n, kpɛkun e ko niɛn i osu kpɛ sunman e koko fluwa nɲa’n i nun kosan nɲɔn annzɛ nɲɔn tra su be su yalɛ. I sin naan y’a bo i like klelɛ bo fluwa Biblu’n kle’n nun. Maan e fa fluwa nɲa’n e di junman kpa Ɔktɔblu anglo’n nun. Afin, ɔ kwla uka e kpa naan y’a bo sran’m be Biblu’n nun like klelɛ bo. Naan kusu, sran nanwlɛfuɛ mun naan b’a ‘si ndɛ ng’ɔ ti nanwlɛ’n.’—Zan 8:31, 32.