É wá súan fluwa Wafa nga awlobo tranlɛ’n kwla yo fɛ’n i nun like
1. ?Kɛ ɔ́ fɛ́ i le mɔcuɛ ng’ɔ́ bó i bo Marsi anglo’n i le 14 su’n, fluwa benin yɛ é súan nun like Asɔnun i Biblu’n nun like suanlɛ aɲia’n bo ɔ?
1 Kɛ ɔ́ fɛ́ i le mɔcuɛ ng’ɔ́ bó i bo Marsi anglo’n i le 14 su’n, fluwa Wafa nga awlobo tranlɛ’n kwla yo fɛ’n, yɛ é wá súan nun like Asɔnun i Bible nun like suanlɛ’n aɲia’n i bo lɔ ɔ. Fluwa sɔ’n i nun like suanlɛ’n wá klé ajalɛ nga e kwla fa naan e awlobo tranlɛ’n w’a yo fɛ’n. Ɔ maan e kwlakwla e kunndɛ kɛ é trán aɲia sɔ’n i bo.
2. (a) ?Ngue yɛ ɔ kwla uka awlobo mun ɔn? (b) ?Sɛ awlobofuɛ’m be fa Biblu’n nun mmla’m be su’n, i bo’n gúa sɛ mán be?
2 Biblu’n nun mmla’m be sasa e: Be nga be fa Biblu’n nun mmla’m be su’n yɛ be awlobo tranlɛ’n kwla yo fɛ ɔ. Biblu’n nun ndɛ nanwlɛ cinnjin sɔ’m be kwla uka awlobofuɛ’m be tinuntinun blɛ kwlaa nun. Ɔ maan, sɛ awlobofuɛ’m be ngba be fa su’n, be wla gúa ase yɛ bé dí aklunjuɛ ng’ɔ fin Ɲanmiɛn’n.—An nian Ezai 32:17, 18 nun.
3. ?Wafa sɛ yɛ fluwa Awlobo kwla uka awlobofuɛ mun ɔn?
3 Mmla nga sɛ e awlobofuɛ’m be fa be su ɔ, ɔ kwla yo be ye’n, yɛle nga be klɛli be fluwa Awlobo, i nun’n. Ndɛ tre kwlakwla i awieliɛ lɔ’n, kuku kun o lɛ. Mmla ng’ɔ fata kɛ ɔ tran awlobofuɛ’m be klun’n, yɛ be o kuku sɔ’m be nun ɔn. Kuku sɔ’m be pɛ lika nun’n, be klɛli kosan ng’ɔ o yɛ’n: “?Wafa sɛ yɛ Biblu’n nun mmla nga be kwla uka ...?” Ndɛ nga e suan’n, i su akunndan nga Ɲanmiɛn bu’n, i su yɛ kosan sɔ’n ɔ fa e ɲin sie ɔ.—Eza. 48:17.
4. ?Ndɛ benin yɛ fluwa Awlobo, ɔ yiyi nun ɔn?
4 An suan fluwa sɔ’n i silɛ kpa. Kɛ sa kekle’m be tɔ’n, ndɛ nga be kwla uka amun’n, maan amun sie be nzɔliɛ. Ndɛ nga be yiyili nun fluwa nga nun’n, be nun wie mun yɛ: sran ng’ɔ kunndɛ kɛ ɔ́ já bian annzɛ bla’n, like nga ɔ fata kɛ ɔ fɛ i ɲin sie su’n (ndɛ tre 2), like ng’ɔ fata kɛ yasua’n nin i yi’n, be yo naan be aja’n w’a cɛ’n (ndɛ tre 3), kɛ ba’m be su ɲin gbanflɛn annzɛ talua’n, wafa nga be si nin be nin’m be kwla uka be naan b’a yo sran mɔ be ɲin yi Ɲanmiɛn’n (ndɛ tre 6), like nga e kwla yo naan aeliɛ tɛtɛ wie’m b’a saciman e awlobo tranlɛ’n (ndɛ tre 8), ndɛ nga be kwla uka be nga be ngunmin yɛ be ta be mma mun’n naan be liɛ w’a yo ye’n (ndɛ tre 9), sɛ yasua’n annzɛ bla’n yɛ ɔ ti nzan nɔnfuɛ’n, annzɛ sɛ awlobofuɛ’m be yo be wiengu kpokokpoko’n, wafa nga Ɲanmiɛn Ndɛ’n kwla uka be’n (ndɛ tre 12), sɛ yasua kun nin i yi’n be aja’n w’a wie saci’n, like nga ɔ fata kɛ be yo’n (ndɛ tre 13), e si nin e nin’m be oke blɛ’n nun’n, maan e bu be sran (ndɛ tre 15), yɛ like nga sran kun kwla yo naan i awlobofuɛ’m b’a di alaje tititi’n (ndɛ tre 16).
5. ?Kɛ awlobofuɛ’m be nin Ɲanmiɛn be afiɛn’n mantan’n, i su mmlusuɛ benin yɛ bé ɲɛ́n i ɔ?
5 Awlobofuɛ nga be nin Ɲanmiɛn be afiɛn’n mantan kpa’n, be su kpɔnzɔman kpɛkun be bo’n sɛ́ kpa. Asa ekun’n, sɛ Satan tanndan be ɲrun’n, be si wafa nga be kwla jrɛn i ɲrun kekle’n. (1 Tim. 4:7, 8; 1 Piɛ. 5:8, 9) Sran nga ɔ kpɛli awlobo tranlɛ’n i ba’n, yɛ ɔ kle e like ɔ! I sɔ’n ti e cenjele like!