Maan e yi e ye silɛ’n i nglo: Avrili i le 17 su yɛ é yó E wla kpɛnlɛ cɛn aɲia’n niɔn
1. ?Kɛ jue tofuɛ sa’n, ngue yɛ e kunndɛ kɛ é yó i E wla kpɛnlɛ cɛn’n i blɛ nun ɔn?
1 Zoova i aunnvuɛ silɛ’n nin i sran delɛ’n ti’n, jue tofuɛ’n kunndɛli kɛ ɔ́ yí i ye silɛ’n i nglo. I ti ɔ usali kɛ: “?Naan nɛnnɛn kpli nga Anannganman w’a di min yɛ’n, nguɛ cɛ yɛ ń nyɛ́n i ń fá lɛ́ i ase ɔ?” (Jue. 116:12) Andɛ’n, ɔ o nun kɛ Ɲanmiɛn i sufuɛ’m be yi be ye silɛ’n i nglo kpa. Kɛ jue tofuɛ’n klɛli ndɛ ng’ɔ o yɛ’n, mɔ i osu cɛli kpa’n, Zoova yoli like kpafuɛ’n mannin klɔ sran mun. Like sɔ’n yɛle e ti kpɔlɛ tɛ’n. Avrili i le 17 su yɛ é yó aɲia kun m’ɔ kle kɛ e wla kpɛn Klist i wie’n su ɔ. Lele naan cɛn sɔ’n w’a ju’n, ɔ fata kɛ e la Ɲanmiɛn i ase.—Kol. 3:15.
2. ?Ninnge benin wie’m be ti yɛ e si e ti kpɔlɛ tɛ’n i su ye ɔ?
2 Ye nga e ti kpɔlɛ tɛ’n yo e’n: E ti kpɔlɛ tɛ’n ti’n, Ɲanmiɛn kwla ‘yaci sa nga e yoli i’n cɛ ye.’ (Kol. 1:13, 14) Ɔ maan, kɛ e su Zoova’n, e klun titiman e. (Ebr. 9:13, 14) Asa , e kwla fa e wla gua Zoova su e srɛ i. (Ebr. 4:14-16) Kusu’n, sran kwlaa ng’ɔ fɛ i wla’n gua e ti kpɔlɛ tɛ’n su’n, ɔ kwla lafi su kɛ ɔ́ ɲán anannganman nguan!—Zan 3:16.
3. ?Wafa sɛ yɛ e kwla kle Zoova kɛ e si e ti kpɔlɛ tɛ ng’ɔ yili’n, i su ye ɔ?
3 E ye silɛ’n: E wla kpɛnlɛ cɛn’n i blɛ nun’n, like kun mɔ e kwla yo e kle kɛ e si ye kpa’n, yɛle kɛ blɛ sɔ nun Biblu’n i akpasua nga be siesieli’n, maan cɛn kwlaa e kanngan naan e bu su akunndan. Ndɛ akpasua nga be flɛ i “ Êtes-vous prêt pour le jour le plus important de l’année ? ” m’ɔ o afuɛ 2011 Sasafuɛ Tranwlɛ’n, Fevrie 1 nun’n (blɔfuɛ nun), ɔ́ wá úka e naan y’a kwlɛ i sɔ yo. Asa, wafa nga e ti kpɔlɛ tɛ’n ti cinnjin kpa man e’n, e kwla tu e klun e srɛ Zoova e kan kle i. (1 Tɛs. 5:17, 18) Kusu’n, kɛ e fa mmla nga Zezi mannin e’n su mɔ e tran E wla kpɛnlɛ cɛn aɲia’n i bo’n, ɔ kle kɛ e si like nga be yoli mannin e’n i su ye. (1 Kor. 11:24, 25) I wie ekun yɛle kɛ e kwla yo kɛ Zoova m’ɔ klo sran ngba’n sa. Yɛlɛ kɛ e yia sran kaka naan e ngba’n e tran aɲia’n i bo.—Eza. 55:1-3.
4. ?Ngue yɛ ɔ fata kɛ e fua kɛ é yó ɔ?
4 Zoova i sufuɛ nga be si ye’n, be bumɛn i kɛ E wla kpɛnlɛ cɛn aɲia’n ti kɛ aɲia kun nga mun sa. Afin afuɛ nuan kun nun sa’n, aɲia’m be nun cinnjin kpafuɛ’n yɛle ngalɛ’n! Fualɛ nga jue tofuɛ’n fuali’n, kɛ E wla kpɛnlɛ i cɛn’n mántan bá’n, maan e fua sɔ wie. Jue tofuɛ’n klɛli i kɛ: “Ń lá Anannganman i ase, n wla su fiman like ng’ɔ yo mannin min’n i wie fi su.”—Jue. 103:2.