“An yo i kɛ nga ń yó i yɛ’n sa”: Avrili i le 5 su yɛ é yó E wla kpɛnlɛ cɛn aɲia’n niɔn
1. ?Ngue ti yɛ E wla kpɛnlɛ cɛn aɲia’n yɛ ɔ ti aɲia’m be nun cinnjin kpafuɛ’n niɔn?
1 Zezi seli i sɔnnzɔnfuɛ’m be kɛ: “An yo i kɛ nga ń yó i yɛ’n sa, maan amun wla kpɛn n su.” (Lik 22:19) Ɔ maan, ɔ su se be kɛ be yia naan be wla kpɛn i wun m’ɔ fa kpɔli sran’m be ti’n, i su. Zezi i wie’n ti’n, klɔ sran’m be kwla fite nun. I sɔ’n ti’n, aɲia nga e yo be afuɛ kwlaa nun’n, be nun cinnjin kpafuɛ’n yɛle E wla kpɛnlɛ cɛn aɲia’n. Afuɛ aɲia liɛ’n mɔ é yó i Avrili i le 5 su’n, w’a mantan koko. ?Sanngɛ lele nin kɛ cɛn sɔ’n ju’n, ngue yɛ é yó naan y’a kle kɛ e wla w’a fiman like nga Zoova yoli mannin e’n su ɔ?—Kol. 3:15.
2. ?Ngue yɛ e kwla suan su like mɔ e kwla bu i su akunndan naan y’a kle kɛ E wla kpɛnlɛ cɛn aɲia’n ti e cinnjin ɔn?
2 Maan e siesie e wun: Like nga mɔ sran kun si kɛ ɔ ti cinnjin’n, ɔ tɔman su yoman. Ɔ dun mmua siesie i wun naan w’a yo. I kunngba’n, maan e siesie e wun e minndɛ E wla kpɛnlɛ cɛn aɲia’n. Yɛle kɛ cɛn kasiɛn nga Zezi dili i asiɛ’n su’n kwlaa naan w’a ɔ ɲanmiɛn su’n, sa nga be juli’n, maan e nin e awlobofuɛ mun e suan be su like, naan e bu be su akunndan. (Ɛsd. 7:10) E kwla wun ndɛ sɔ’m be nun wie mun kananndrie nin e fluwa Maan e nian Ɲanmiɛn Ndɛ’n nun cɛn kwlaa be nun. Sanngɛ b’a klɛmɛn i ngba lɔ. Afuɛ 2011 nun Sasafuɛ Tranwlɛ’n Fevrie 1 blɔfuɛ nun liɛ’n, i bue 23-24 nun yɛ be klɛli i ngba ɔ. Fluwa Le plus grand homme de tous les temps i akpasua nga ɔ yiyi Biblu’n nun ndɛ sɔ’m be nun’n, be klɛli i lɔ wie.
3. ?Ngue ekun yɛ e kwla yo naan y’a kle kɛ E wla kpɛnlɛ cɛn aɲia’n ti e cinnjin ɔn?
3 Maan e bo jasin fɛ’n: Like nga e kwla yo i ekun naan y’a kle kɛ E wla kpɛnlɛ cɛn aɲia’n ti cinnjin’n, yɛle kɛ maan e bo jasin fɛ’n i kpa tra laa’n. (Lik 6:45) Kɛ ɔ́ fɛ́ i Fue m’ɔ ti Marsi i le 17 su’n, mɛn wunmuan nun’n, é bó sran’m be yialɛ bo naan be tran E wla kpɛnlɛ cɛn aɲia’n i bo. É wlá amun fanngan kɛ amun siesie amun wun naan amun a bo jasin fɛ’n i kpa. Amun kwla kaci cɛn kunngun atin bofuɛ bɔbɔ. Cɛn uflɛ nga amún sú Ɲanmiɛn awlo lɔ’n, amun koko su yalɛ.
4. ?Kɛ e tran E wla kpɛnlɛ cɛn aɲia’n i bo’n, mmlusuɛ benin yɛ e ɲɛn i ɔ?
4 Afuɛ kwlaa nun’n, kɛ e tran E wla kpɛnlɛ cɛn aɲia’n i bo’n, nanwlɛ e ɲɛn i su mmlusuɛ dan! I wie yɛle kɛ e klun jɔ dan, kpɛkun Ɲanmiɛn i klolɛ’n tra ndin kpa e awlɛn nun ekun. Afin ajalɛ nga Zoova fɛli i kɛ i Wa kunngba cɛ’n fɛ i wun yi e ti tɛ’n, kɛ e bu i akundan’n, e wun i kɛ Zoova i klun ufue’n ti dan. (Zan 3:16; 1 Zan 4:9, 10) I sɔ’n ti’n, olɛ nga e o lɛ’n, nán e bɔbɔ e olɛ yɛ e wo ɔ. (2 Kor. 5:14, 15) Asa ekun e wun blibli e kɛ é mánmán Zoova sran’m be ɲrun. (Jue. 102:20-22) Ye silɛ’n w’a yi Zoova i sufuɛ’m be klun. Ɔ maan, be su minndɛ kpa kɛ E wla kpɛnlɛ cɛn aɲia’n mɔ bé yó i Avrili i le 5 su’n, ɔ ju. Afin cɛn sɔ’n nun’n, bé ‘bó be Min’n i wie ndɛ’n su.’—1 Kor. 11:26.