Bé wá wún i kɛ e ti Ɲanmiɛn sran sakpa
1. ?Sɛ e yi ijɔlɛ nga e tie i E wla kpɛnlɛ cɛn aɲia’n i bo lɔ e sie’n, ngue ekun yɛ ɔ kwla yo be nga be ba’n, be ɲɛnmɛn ɔn? An yiyi nun.
1 Nnɔsua nga é yó E wla kpɛnlɛ cɛn aɲia’n, yɛ sran’m bé wún i sɔ ɔ. E su yia sran kaka kɛ be nin e trɛn i bo. Titi kɛ sran’m be ba’n, nán ndɛ nga be ti i aɲia’n i bo’n, i ngunmin yɛ ɔ yo be ɲɛnmɛn ɔn. I sunnzun ase kun yɛle kɛ, kɛ E wla kpɛnlɛ cɛn aɲia kun wieli’n, bla kun kannin like ng’ɔ wunnin i’n i ndɛ. Ɔ sieli i nzɔliɛ kɛ aɲia’n i bo lɔfuɛ’m be tran klolɛ su. Aɲia sua’n ti klanman. Ɔ ti yɛiin. Yɛ be nga be kplannin ɔ nin be nga be niɛn i lika’n, be klunklo su yɛ be yo i sɔ ɔ. Be tuaman be kalɛ. Ɔ maan, afuɛ nuan kwlaa nun’n, aɲia cinnjin kpafuɛ sɔ’n i bo’n, nán sran nga ɔ kan Ɲanmiɛn ndɛ’n, i ngunmin yɛ ɔ yo naan b’a wun kɛ e ti Ɲanmiɛn sran ɔn. Sanngɛ e ngba ɔ.—Efɛ. 4:16.
2. ?Wafa sɛ yɛ e tinuntinun e kwla yo naan be nga bé bá’n, b’a wun kɛ e ti Ɲanmiɛn sran ɔn?
2 Maan e sɔ be nun klanman: Kɛ é yó sran’m be like mɔ srilɛ o e nuan’n, bé wún kɛ e ti Ɲanmiɛn sran. (Zan 13:35) Kannzɛ amun nin sran’m be kwlaa be kwlá kokoman yalɛ’n, sanngɛ be nga be tran mantan amun’n, amun kwla yo be like juejue su yɛ klolɛ su. Kpɛkun amun bo amun dunman’n kle be. (Ebr. 13:1, 2) Amun siesie amun ɲin be kunndɛ be nga atrɛkpa’n be siman sran aɲia’n i bo lɔ’n. Kɔlɛ i nun nga é yía sran mun’n, yɛ fluwa’n tɔli be sa nun ɔn. Amun wunnge be wun lɔ naan amun usa be kɛ: “?Andɛ yɛ ɔ ti ɔ wa balɛ klikli’n niɔn?” Amun yia be naan be nin amun tran likawlɛ. Kpɛkun amun se be naan be usa amun kosan kwlaa nga be klo’n. Kɛ amun wie amun aɲia’n liɛ yo’n, sɛ ɔ fata kɛ, amun wɔ ndɛndɛ naan asɔnun uflɛ yia’n, amun kwla se i kɛ: “N kunndɛ kɛ a kan wafa nga aɲia’n yoli wɔ’n i ndɛ kle min. ?Yɛ é yó sɛ naan y’a wun e wun ekun?”
3. ?Wafa sɛ yɛ e kwla sɔ jasin bofuɛ nga b’a jran jasin fɛ’n bolɛ junman’n i osu w’a cɛ’n, be nun ɔn?
3 Maan e sɔ be nga b’a jran jasin bolɛ’n be nun: E si kɛ be nga b’a jran jasin bolɛ’n, bé bá E wla kpɛnlɛ cɛn aɲia’n i bo. Yɛ be nga afuɛ nuan kun nun’n, E wla kpɛnlɛ cɛn aɲia’n ngunmin yɛ be trɛn i bo’n, bé bá wie. Maan amun sɔ be nun klanman. Yɛ amun kle be kɛ be balɛ’n yo amun fɛ dan. (Rɔm. 15:7) Asɔnun kpɛnngbɛn’m be kwla ko wun be wun. Be wla be fanngan naan be nin asɔnun’n b’a nanti kɛ laa’n sa ekun. Nán maan i osu la nun naan b’a yo i sɔ. É srɛ́ kɛ be nga bé bá aɲia’n i bo’n, be nun sunman be manman Ɲanmiɛn. Nán ndɛ nga be tili’n i ngunmin ti yɛ bé mɛ́nmɛ́n i ɔ. Sanngɛ ‘sa kpa nga e yoli be’n’ mɔ be wunnin i’n, be o nun wie.—1 Piɛ. 2:12.