Maan e sɔ be nun!
1. ?Blɛ cinnjin kpa benin yɛ e lɛ i e kle kɛ Ɲanmiɛn ti kpa ɔ? ?Yɛ ngue ti ɔ?
1 Blɛ nga e fa kan Ɲanmiɛn ndɛ’n, be nun kpafuɛ’n yɛle E wla kpɛnlɛ aɲia’n mɔ e yo i afuɛ kwlaa’n. Amun bɔbɔ be nian: Afuɛ’n, e lafi su kɛ sran miliɔn blu tra su bé trán E wla kpɛnlɛ aɲia’n i bo naan bé tíe sran klolɛ dan kpafuɛ mɔ sran nɲɔn be yili i nglo’n, i su ndɛ’n wie. Sran klolɛ sɔ’n i ɲin fite e ti kpɔlɛ tɛ’n i yilɛ’n nun. (Zan 3:16; 15:13) Like nga Zoova yoli’n, i su mmlusuɛ’n sran sɔ’m bé wá sí i wie. (Eza. 65:21-23) Sanngɛ, nán ijɔfuɛ’n i ngunmin yɛ ɔ́ klé kɛ Ɲanmiɛn ti kpa blɛ sɔ’n nun ɔn. Asɔnun’n nunfuɛ’m be ngba bé kwlá yó sɔ wie. Yɛle kɛ bé kwlá tú be klun bé sɔ́ sran’m be nun klanman.—Rɔm. 15:7.
2. ?Wafa sɛ yɛ e kwla sɔ sran’m be nun kpa ɔ?
2 Kɛ ɔ yo naan e tran lɛ sa ngbɛn’n, maan e fa e wun e mantan be nga be bali e aɲia’n i bo’n, naan e nin be e koko yalɛ. Kɛ mɔ be ti aofuɛ mɔ be siman like nga e su wa yo’n ti’n, atrɛkpa’n be wla guaman ase. Ɔ maan, kɛ é yó be like’n, sɛ srilɛ o e nuan’n, bé wún be wun fɛ. ?Sɛ e fluwa mɔ e fa yia sran mun’n i ti yɛ sran kun bali’n, é yó sɛ naan y’a wun i wlɛ? E kwla usɛ i sɛ w’a tran e aɲia wie bo le o, annzɛ sɛ ɔ si sran asɔnun’n nun o. Wie liɛ’n, e kwla se i kɛ ɔ tran e wun lɛ naan e nin i e nian Biblu’n nun likawlɛ naan e to jue likawlɛ. Sɛ Ɲanmiɛn Sielɛ Sua’n nun yɛ e yo aɲia’n, e kwla klekle i sua’n i likalika mun. Kɛ aɲia’n ko wie’n, maan e sie e su i nuan bo naan e tɛ i kosan’m be su. Sɛ kusu ɔ fata kɛ e sanndi ndɛndɛ naan asɔnun uflɛ sin e osu’n, e kwla se i kɛ: “N kunndɛ kɛ a kan wafa nga ɔ wun yoli wɔ aɲia’n i bo’n i su ndɛ kan kle min. ?Ɔ maan ń yó sɛ naan m’an wun ɔ wun cɛn ufIɛ?” I sin’n, maan e nuan sɛ su naan e ko niɛn i osu cɛn uflɛ. Jasin bofuɛ nga b’a jran jasin bolɛ’n mɔ be bali aɲia’n i bo’n, maan asɔnun kpɛnngbɛn’m be mian be ɲin wla be fanngan.
3. ?Ngue ti yɛ ɔ ti cinnjin kɛ e sɔ be nga bé bá E wla kpɛnlɛ aɲia’n i bo’n, be nun kpa ɔ?
3 Aklunjuɛ’n nin fɔundi mɔ e di’n, ɔ nin e bo m’ɔ ti kun’n, be nga bé bá aɲia’n i bo’n, be nun sunman nin a wunman wie le. (Jue. 29:11; Eza. 11:6-9; 65:13, 14) ?Ɔ maan kɛ bé sá be sin’n, ngue yɛ ɔ́ ká be klun ɔn? Ɔ fin wafa nga é sɔ́ be nun’n.