Nán maan be tian e asɔnun sua’n nun lɔ

Biblu’n i akua mɔ be o lɛ w’a cɛ kpa’n, be tian asɔnun sua sunman nun. ?Sɛ amun leman be nun wie naan amun fa wie sie amun awlo lɔ fluwa siewlɛ nun’n, ɔ timan kpa? Nanwlɛ, kɛ fluwa’n bɔbɔ ba’n o e sa nun’n, ɔ uka e dan. Kusu’n, sran nga amun su kle i Biblu’n nun like’n, atrɛkpa’n, ɔ su kɔ i ɲrun. Sɛ ɔ ti sɔ’n, amun se i kɛ ɔ fa wie sie. Naan ɔ kpɛ i fluwa siewlɛ liɛ’n ba. Asɔnun sua’n nun lɔ fluwa siewlɛ nga be siesie Biblu’n i akua fanunfanun be nun mɔ sɛ be mian wie wun’n, b’a kwla fa b’a kunndɛ be nun like’n, maan Ɲanmiɛn junman dilɛ suklu sunianfuɛ’n niannian nun. Sɛ fluwa nga be yili be w’a cɛ mɔ i wie o asɔnun’n nun’n i wie nunman lɔ’n, maan ɔ fa wie sie i lɔ. Biblu’n i akua sɔ’m be nun ndɛ’n be te kwla te yo sran ye. I sɔ’n ti’n, nán maan e yaci be lɛ naan be tian e asɔnun sua nun.