LIKE NGA KLISTFUƐ’M BE YO’N

**Wafa nga e kwla fa JW Library e di junman’n**

BIBLU’N NUN LIKE SUANLƐ’N NUN:

E kwla kanngan Biblu’n ɔ nin fluwa Maan e nian Ɲanmiɛn Ndɛ’n nun cɛn kwlaa be nun JW Library su.
E kwla kanngan fluwa Annuaire nin periodiki mun ɔ nin fluwa uflɛ wie’m be nun JW Library su. Kɛ e kanngan be nun’n, lika nga e jrannin lɛ’n e kwla sie i nzɔliɛ.
Ka naan y’a wɔ aɲia’m be bo’n, e kwla siesie e wun JW Library su, kpɛkun e kwla sie kosan’m be su tɛlɛ’m be nzɔliɛ.
E kwla nian video mun JW Library su.

Kɛ sran ng’ɔ ijɔ nzra nun’n ɔ bo Biblu’n nun ndɛ mma kun su’n, e kwla kanngan nun JW Library su. Asa ekun, Biblu’n nun ndɛ mma nga e kanngannin be nun laa’n, e kwla tin i lika kun su kpɛkun e wun ndɛ mma sɔ mun ekun.
Sɛ e le JW Library e telefɔnu nun’n, e su faman fluwa kpanngban e kɔman aɲia’m be bo. Afin e kwla to jue mun annzɛ e nian fluwa’m be nun e telefɔnu nun. Jue uflɛuflɛ nga be nunman e jue tolɛ fluwa nun bɔbɔ’n, e kwla ɲan be JW Library su.

Ninnge nga e fa sieli i JW Library su’n, e kwla fa be nun kun e kle sran ng’ɔ kle kɛ Ɲanmiɛn Ndɛ’n ti i cinnjin’n. Kpɛkun e kwla ukɛ i naan w’a fa JW Library w’a sie i i telefɔnu’n nun. I liɛ’n, ɔ kwla fa e fluwa wie mun sie su.
E kwla tin nzɔliɛ nga be tin su be kunndɛ ninnge mun’n i su naan y’a fa kunndɛ Biblu’n nun ndɛ mma mun.
E kwla bo video e kle sran kun. Sɛ ɔ le ba’n, e kwla bo video akpasua ng’ɔ suan Kaci Zoova i janvuɛ i nun video kun. Annzɛ e kwla bo video ?Ngue ti yɛ Biblu’n nun like suanlɛ’n ti cinnjin ɔn? e kle sran’n naan i konvi sɔ Biblu’n nun like suanlɛ’n. Sɛ sran’n kanman e aniɛn’n wie’n, e kwla bo video kun i aniɛn liɛ’n nun e kle i.
E kwla fa Biblu’n nun ndɛ mma kun aniɛn uflɛ nun JW Library su e kle sran kun. I sɔ yolɛ nun’n, maan e dun mmua tin Biblu’n su, kpɛkun e klɛ Biblu’n nun ndɛ mma nga e kunndɛ kɛ é fá klé sran’n. I sin’n, maan e tin nzɔliɛ nga kɛ be tin su’n be kwla wun Biblu’n nun ndɛ mma kunngba sɔ’n aniɛn uflɛ nun’n.