Akpɔ nuan jasin fɛ’n bolɛ m’ɔ ba nvlɛ’n

1. ?Zezi i ajalɛ benin yɛ e kwla nian su ɔ?

¹ I nun mɔ Zezi o asiɛ’n su wa’n, sran ng’ɔ nin be yia akpɔ nuan annzɛ lika uflɛ wie’n, w’a sisimɛn i bo naan w’a bo jasin fɛ’n w’a kle be. (Lik 9:57-61; Zan 4:7) Ɔ kunndɛli kɛ ɔ́ bó jasin fɛ’n klé sran sunman lika. Andɛ’n, akpɔ nuan jasin fɛ’n bolɛ’n kwla uka sran mun naan b’a si ngwlɛlɛ m’ɔ fin Ɲanmiɛn’n. (Nya. 1:20) Sɛ ngwlɛlɛ su e fa ajalɛ e ko to sran mun’n, e junman’n bá nvlɛ.

2. ?Kɛ é bó jasin fɛ’n akpɔ nuan’n, wafa sɛ yɛ ajalɛ falɛ’n ti cinnjin ɔn?

² Amun fa ajalɛ: Sɛ e fa ajalɛ e ko to sran mun’n, ɔ flunman kɛ e tran lika kun e minndɛ naan be nga be su sin’n be wa to e. Maan e ko fua sran mun amanniɛn su. Sɛ amun nga amun bo jasin’n amun sɔnnin’n, amun kwla kpacikpaci ko to sran mun. Ɔ nin i fata kusu kɛ amun fa ajalɛ naan amun a ko nian sran nga be sieli be su’n, be osu ekun. Sɛ ɔ nin i fata’n, kɛ amun wie yalɛ koko’n, amun kwla usa sran’n i nimielo’n. Jasin bofuɛ wie’m be bo akpɔ nuan jasin’n lika kunngba’n nun titi. I liɛ’n, be nin sran nga be wun be titi’n be kwla ijɔ naan i sin’n b’a kwla sɔ Ɲanmiɛn ndɛ’n nun.

3. ?Wafa sɛ yɛ e kwla fa ngwlɛlɛ e bo akpɔ nuan jasin fɛ’n niɔn?

³ Amun fa ngwlɛlɛ: Maan e fa ngwlɛlɛ naan y’a wun lika nga é jrán’n ɔ nin sran nga é kókó yalɛ é klé be’n. Ɔ nin i fataman kɛ sran kwlaa ng’ɔ́ sín’n yɛ e bo jasin’n e kle i ɔ. Maan e si e sa nzɔliɛ. Sɛ é nían naan sran kun i wun di kpa naan ɔ su kɔ ndɛndɛ’n, e yaci i nun maan ɔ wɔ. Sɛ é bó jasin’n aata diwlɛ kun ɲrun lɛ’n, maan e yo i ngwlɛlɛ su naan y’a fɔkɔman sran nga ɔ le lika’n i awlɛn. Blɛ sunman’n, kɛ sran’n w’a wie i ninnge’m be to m’ɔ su fite kɔ’n, yɛ ɔ flunman kɛ e bo jasin’n e kle i ɔ. Nán blɛ nga ɔ su wlu lɔ ko toto i ninnge mun’n niɔn. Wafa nga é fúa sran mun’n, nán maan ɔ wlanwlan be, annzɛ nán maan ɔ man be akluntitiɛ. Asa ekun, maan e fa ngwlɛlɛ naan y’a wun blɛ nga ɔ fata kɛ e man be Biblu’n i akua’n. Sɛ sran’n kle kaan sa kɛ Ɲanmiɛn ndɛ’n lo i’n, maan e mɛn i fluwa nɲa kun, nán e fa periodiki e mɛn i.

4. ?Ngue ti yɛ akpɔ nuan jasin fɛ’n bolɛ’n ti jasin fɛ’n bolɛ wafa kun m’ɔ ti kpa m’ɔ man aklunjuɛ ɔ?

⁴ Akpɔ nuan jasin fɛ’n bolɛ’n uka e naan blɛ kpe kan nun’n, y’a kan nanwlɛ ndɛ’n y’a kle sran kpanngban. (Aku. 11:6) Atrɛkpa’n, sran nga e nin be yia’n yɛle be nga kɛ e bo jasin fɛ’n awloawlo’m be nun’n e toman be’n. ?Ngue ti yɛ amun siesieman amun wun, naan amun a fa amun wun b’a wlɛ i akpɔ nuan jasin fɛ’n bolɛ’n, m’ɔ ti jasin fɛ’n bolɛ wafa kun m’ɔ ba nvlɛ’n, i nun wie ɔ?