?Amun kwla bo jasin fɛ’n nnɔsua nun wie?
1. ?Kɛ nga fluwa kun fa kannin’n sa’n, dɔ benin su yɛ akoto Pɔlu ko bo jasin fɛ’n awloawlo’m be nun ɔn?
1 Fluwa kun se kɛ jasin fɛ’n i bolɛ’n awloawlo’m be nun’n, ɔ ti Pɔlu i junman. Ɔ bo i bo “nnɔsua nun dɔ 4 su lele saan lika’n w’a san,” yɛ ɔ́ yáci i bolɛ ɔ. (Daily Life in Bible Times) Nja, e su kwlá seman kɛ ɔ dili ajalɛ sɔ’n su cɛn kwlakwla, sanngɛ e si weiin kɛ ɔ miɛnnin i ɲin yoli ‘like kwlaa jasin fɛ’n ti.’ (1 Kor. 9:19-23) I sɔ yolɛ nun’n, ɔ siesieli i junman m’ɔ di’n, naan blɛ nga ɔ kwla to sran kpanngban awloawlo’m be nun’n, w’a bo jasin’n.
2. ?Ngue ti yɛ nnɔsua nun jasin bolɛ’n ti kpa ɔ?
2 Lika kpanngban nun’n, nglɛmun nun yɛ aniaan’m be ta jasin fɛ’n i bo awloawlo’m be nun ɔn. ?Amun lika liɛ’n nun lɔ’n, nglɛmun nun yɛ ɔ ti jasin bolɛ blɛ kpafuɛ’n niɔn? Atin bofuɛ kun kɛnnin i jasin bowlɛ’n i ndɛ seli kɛ: “Kɛ ɔ fɛ i nglɛmun lele nnɔsua’n, be toman sran awlo. Sanngɛ nnɔsua flɔlɔ nun’n, be nun sunman be o awlo.” Atrɛkpa’n, blɛ kpafuɛ nga e kwla to yasua mun awlo naan y’a bo jasin fɛ’n y’a kle be’n, yɛ ɔ o lɛ ɔ. Blɛ sɔ nun’n, awlobofuɛ’m be ɲin nunman nglonglo, ɔ maan yalɛ kokolɛ yó be fɛ. Sɛ ɔ nin i fata’n, maan asɔnun kpɛnngbɛn’m be fa ajalɛ naan be siesie jasin fɛ’n bolɛ aɲia mun blɛ sɔ’n nun.
3. ?Wafa sɛ yɛ e kwla fa ngwlɛlɛ e bo jasin fɛ’n nnɔsua nun ɔn?
3 Maan e yo i ngwlɛlɛ su: I sɔ’n ti cinnjin kpa. Sɛ e to sran’n naan ɔ su di like’n, maan e se i kɛ blɛ uflɛ e ko ba. Sɛ lika’n ti tuun’n, maan e jran kan awlobofuɛ’n kwla wun e’n, kpɛkun nán maan e sisi e bo naan y’a bo e dunman’n. I sin’n, maan e kan like nga ti yɛ e ɔli i wun wunlɛ’n i ndɛ. Asa’n, ɔ fata kɛ e di junman likawlɛ. Kan nga kannin’n kpaja kpa’n mɔ sran’m be o’n, lɛ yɛ ɔ fata kɛ e ka ɔ. Asa kusu’n, nán maan e cɛ awlo kun nun ngboko naan awlobofuɛ’n w’a kwlá cuɛnmɛn i wun w’a ko laman ndɛ nun. (2 Kor. 6:3) Sɛ kɔnguɛ’n e jasin bowlɛ’n i nun timan kpa’n, maan nnɔsua flɔlɔ yɛ e ko bo jasin’n lɔ ɔ.—Nya. 22:3
4. ?Kɛ e bo jasin fɛ’n nnɔsua nun’n, mmlusuɛ benin yɛ e ɲɛn i ɔ?
4 I su mmlusuɛ mun: Nanwlɛ, kɛ e to sran mun mɔ e bo jasin fɛ’n e kle be’n, yɛ e klun jɔ dan kpa ɔ. Asa’n, kɛ e yo i sɔ’n, e ɲan atin e uka be naan Ɲanmiɛn w’a ‘de be kwlaa naan b’a wun sa ng’ɔ ti nanwlɛ’n i wlɛ kpa.’ (1 Tim. 2:3, 4) Ɔ maan amun siesie amun wun naan amun bo jasin fɛ’n nnɔsua nun wie.