Les Témoins de Jéhovah : organisés pour proclamer la bonne nouvelle
I afuɛ 100 tra su yɛ, Zoova i Lalofuɛ’m be siesie be wun naan b’a bo jasin fɛ’n. Kɛ é bó jasin fɛ’n sɔ mɔ be nin a wunmɛn i wunsu le asiɛ wunmuan’n su’n, e kɛn i aniɛn kpanngban kpa nun. E bo i nvlenvle 230 tra su be nun. (Mat. 24:14) ?Sanngɛ ngue ti yɛ junman sɔ’n ti cinnjin ɔn? ?Kpɛkun wafa sɛ yɛ be su di i asiɛ wunmuan’n su ɔ? Video nga be flɛ i kɛ Les Témoins de Jéhovah : organisés pour proclamer la bonne nouvelle ɔ tɛ kosan sɔ’m be su. Ɔ kan e junman sɔ mɔ e di i asiɛ wunmuan’n su’n, i wafawafa’m be ndɛ. Kɛ é nían video sɔ’n, maan e bu kosan nga be lɔngɔ su yɛ’n, be su akunndan.
?E mɔ e ti Zoova i Lalofuɛ’n, wafa sɛ yɛ flimu sɔ’n yo maan ninnge nga be lɔngɔ su yɛ’n, e wun be wlɛ tra laa’n niɔn? ?Annzɛ kusu e si su ye ɔ? (1) Zoova i anuannzɛ’n i nunfuɛ’m be ɲin mɔ be su mian bo jasin fɛ’n. (2 Tim. 4:2) (2) Be nga be di junman asiɛ wunmuan’n su Betɛli’m be nun’n. (3) Ninnge nga be kle akpasua nin nvle sunianfuɛ mun nin ngaliɛ difuɛ mun’n. (2 Tim. 2:2) (4) Nglɛmun kwlaa Biblu’n nun ndɛ mma kun su akunndan bulɛ’n, ɔ nin le mɔcuɛ kwlaa nun asɔnun aɲia’m be siesielɛ’n be cinnjin mɔ be ti’n. (Yol. 17:11) (5) Kɛ e kɔ e asɔnun aɲia’m be bo’n, mmlusuɛ nga e ɲan be’n. (Ebr. 10:24, 25) (6) Wafa nga mɛn’n wá yó klanman asiɛ’n su wa’n. (Eza. 11:9) (7) Jasin fɛ’n bolɛ junman m’ɔ fata kɛ e tinuntinun e di’n.—Zan 4:35.
Video nun flimu sɔ’n ti like kpa kun m’ɔ kwla fa sran’m be ɲin sie i asiɛ’n wunmuan’n su junman dan nga Zoova Lalofuɛ’m be su di’n su ɔ. (8) ?Blɛ benin nun yɛ ɔ ti kpa kɛ e fa flimu sɔ’n e kle be nga e kle be Biblu’n nun like mun, nin e osufuɛ mun, ɔ nin sran uflɛ wie mun ekun ɔn? (9) ?Kɛ amun fali video sɔ’n kleli sran mun’n, wafa sɛ yɛ be kleli kɛ ɔ yoli be fɛ ɔ?
Kɛ e bu ninnge nga Zoova su yo be’n be su akunndan’n, e wun kɛ Jue tofuɛ’n i ndɛ yɛ’n ti nanwlɛ. Ɔ seli kɛ: “Anannganman min Nyanmiɛn, abonuan sa nga a yoli’n, be sɔnnin. Yɛ akunndan kpakpa nga a bu i e wun’n, be sɔnnin. Like fi nin wɔ sɛ-man.” (Jue. 40:5) Maan e fa video nun flimu sɔ’n e di junman kpa naan e uka sran mun naan be klo Zoova nin i anuannzɛ’n kpa be wɔ be ɲrun!