Maan e wun junman kpa mɔ e di’n i nuan like
1. ?Jasin fɛ’n i bolɛ nun’n, ngue yɛ ɔ kwla bubu e sa sin ɔn?
1 Ɲanmiɛn boli sran mun naan be wun ‘junman mɔ be di’n i nuan like.’ (Aku. 2:24) Sɛ e wunman i sɔ liɛ’n e jasin fɛ’n i bolɛ’n nun’n, e wla kwla bo e wun, kpɛkun e sa sin kwla bubu e. ?Ngue yɛ é yó naan i sɔ’n w’a tɔman e su ɔ?
2. ?Ngue ti yɛ ɔ fata kɛ e klun jɔ like kan nga e yo’n su ɔ?
2 Maan e klun jɔ like kan nga e yo’n su: Maan e wun i wlɛ kɛ, kɛ Zezi bó jasin fɛ’n, sran ngba b’a sɔmɛn i nun. Sanngɛ, i junman’n bali nvlɛ. (Zan 17:4) Ɔ fali awie guafuɛ’n i su sunnzun ase kun. Ɔ seli kɛ sɛ sran’m be ti kɛ asiɛ sa’n, nán be ngba be su yɛ Ɲanmiɛn Sielɛ’n i ndɛ’n m’ɔ ti kɛ awie sa’n, ɔ́ yó kpa ɔ. (Mat. 13:3-8, 18-22) Sanngɛ, nɛ́n i sɔ m’ɔ kannin’n ti yɛ e bubu e sa nin e ja e tran su ɔ.
3. ?Kannzɛ bɔbɔ sran’m be sɔman e jasin fɛ’n nun’n, ngue yɛ ɔ kle kɛ e junman’n ‘yo ye’ ɔ?
3 Wafa nga e junman’n kwla yo ye’n: Sunnzun ase nga Zezi fali’n i nun’n, ɔ kleli kɛ be nga be sɔ jasin fɛ’n nun’n, be ti kɛ awie m’ɔ “yo ye’n sa.” (Mat. 13:23) Kɛ awie’n ko ɲin’n, i ja kun su mma kpanngban. I kunngba’n, mma kpa nga Klistfuɛ kun su’n, nɛ́n i ngunmin yɛle sran uflɛ mɔ be kaci Klist i sɔnnzɔnfuɛ m’ɔ ɲan be’n. Sanngɛ i wie ekun yɛle Ɲanmiɛn Sielɛ’n i ndɛ mɔ sɛ é kwlá sé’n, ɔ ti kɛ awie sa mɔ e sanndi i lika nun’n. Kɛ e bu wafa nga i bo gua “kpa” sɔ’n i akunndan’n, sɛ sran’m bé sɔ́ e nun annzɛ be sɔman e nun o, e klun jɔ. Jasin fɛ m’ɔ e bo’n ti’n, sran’m be wun i wlɛ kɛ Zoova ngunmin yɛ ɔ ti Ɲanmiɛn’n niɔn. (Eza. 43:10-12; Mat. 6:9) Asa ekun’n, like ng’ɔ ti e cenjele’n, yɛle kɛ e nin Ɲanmiɛn yɛ e di junman’n niɔn. (1 Kor. 3:9) Junman sɔ m’ɔ ti kɛ “asenna like” sa yɛ e man’n, ɔ jɔ Zoova klun.—Ebr. 13:15, 16.
4. ?Wafa sɛ yɛ e junman’n yo ye, mɔ sanngɛ i sɔ’n yoman e ɲrun ɔn?
4 Junman mɔ e mian e ɲin e di’n, wie liɛ’n e kaman lɛ e timɛn i su mma’n. I wie yɛle Zezi i liɛ’n. Kɛ ɔ wuli’n, i sin yɛ sran ng’ɔ boli jasin kleli be’n, be nun wie’m be wa kacili i sɔnnzɔnfuɛ ɔ. Ɲanmiɛn Sielɛ’n i ndɛ m’ɔ ti kɛ awie sa mɔ e sanndi’n kusu’n, kɛ ɔ ti sɔ wie ɔ. Ɔ kaman lɛ fifiman naan w’a tra ndin sran’m be awlɛn’n m’ɔ ti kɛ asiɛ sa’n i nun e ɲrun lɛ. Kɛ ɔ́ kɔ́ i ɲrun’n yɛ wie liɛ’n, ɔ yo ye ɔ. Nanwlɛ, junman mɔ e di’n, ɔ yo sran’m be ye dan. I sɔ’n ti’n, maan e yo kɛ “waka sama b’ɔ su kpanngban” sa naan be wun kɛ e ti Zezi i sɔnnzɔnfuɛ.—Zan 15:8.