Nán maan e se e wun kɛ e ɲanman e ti
1. ?Ngue ti yɛ kɛ ɔ yo naan aniaan wie’m be kle sran’m be Biblu’n nun like’n, be sisi be bo ɔ?
1 Kɛ ɔ yo naan aniaan wie’m be kle be wiengu’m be Biblu’n nun like’n, be sisi be bo. Afin be waan be ɲanman be ti. I yo, e si kɛ sran Biblu’n nun like klelɛ’n leman ba. Afin, ɔ fata kɛ e siesie e wun naan y’a kle sran’n i like, naan like ng’ɔ wunmɛn i wlɛ’n, y’a ukɛ i. Ninnge kwlaa sɔ’m be yolɛ’n fa blɛ. Akoto Pɔlu seli kɛ ɔ tuli i klun ukali be nga Tɛsaloniki lɔ’n, be bali Zoova sulɛ uflɛuflɛ’n. (1 Tɛs. 2:7, 8) ?Ɔ maan kannzɛ e ɲanman e ti’n, ngue yɛ e kwla yo naan y’a kle sran’m be Biblu’n nun like ɔ?
2. ?Sɛ e klo Zoova’n, ngue yɛ e su sisiman e bo naan y’a yo ɔ?
2 Zoova sulɛ’n leman ba: Ɲanmiɛn sulɛ bɔbɔ sa’n, ɔ fa blɛ. Maan e nian: Ɔ fata kɛ e tran aɲia’m be kwlaa be bo titi, e bo jasin fɛ’n, e kanngan Biblu’n nun cɛn kwlaa, kpɛkun e srɛ Ɲanmiɛn. Be nga b’a ja bla nin bian’n, ɔ fata kɛ be nian be wiengu lika. Kɛ mɔ e klo Zoova ti’n, ɔ fataman kɛ e ‘tran lɛ ngbɛn,’ sanngɛ maan e yo ninnge kwlaa ngalɛ mun aklunjuɛ su. (Efɛ. 5:15-17; 1 Zan 5:3) Kɛ nga Zezi fa kannin’n sa kusu’n, like klelɛ’n ti Ɲanmiɛn sulɛ’n i nun like cinnjin kpa kun. Afin, i li ti yɛ maan sran’m be kwla kaci i sɔnnzɔnfuɛ ɔ. (Mat. 28:19, 20) Sɛ e bu i kwlaa sɔ’n i akunndan’n, e su sisiman e bo naan y’a kle sran’m be Biblu’n nun like.
3. ?Sɛ e ɲanman e ti’n, ngue yɛ e kwla yo naan like suanfuɛ’m b’a kwla suan like ɔ?
3 Wienun ɔn, e bɔbɔ e junman wie o lɛ m’ɔ fata kɛ e di ɔ. Wie liɛ kusu ɔ, e ti tukpacifuɛ, annzɛ kusu asɔnun lɔ junman wie o e su. ?I lɛ nun’n, é yó i sɛ? Jasin bofuɛ nga be ɲɛn i wun alaje’n, be kle sran’m be like telefɔnu nun, annzɛ be fa ɔrdinatɛli nga kɛ sran nɲɔn bé íjɔ’n be wun be wiengu’n. Be nga be ti tukpacifuɛ’n, be nun wie’m be siesie be wun naan like suanfuɛ’n w’a ko to be awlo lɔ naan b’a kle i like. Wie’m be liɛ kusu’n, be fa like suanfuɛ’n wlɛ i jasin bofuɛ uflɛ sa nun naan ɔ niɛn i lika.
4. ?Sɛ e mian e ɲin e kle sran’m be Biblu’n nun like’n, mmlusuɛ benin yɛ é ɲɛ́n i ɔ?
4 Pɔlu yoli like kwlaa ng’ɔ kwla yo naan i wiengu’m b’a si ndɛ nanwlɛ’n. Ɔ dili i sɔ yolɛ’n i su aklunjuɛ dan. (Yol. 20:35) Kɛ ɔ buli Tɛsaloniki lɔfuɛ kwlaa ng’ɔ ukali be’n be akunndan’n, ɔ lali Zoova ase. (1 Tɛs. 1:2) E kusu kannzɛ e ɲanman e ti’n, sanngɛ maan e mian e ɲin e di like klelɛ junman’n wie. Sɛ e yo sɔ’n, nanwlɛ, é dí aklunjuɛ dan.