?Á yó sɛ naan w’a suan Biblu’n nun like lemɔcuɛ kwlaa?
?KƐ Ɔ ko yo naan lemɔcuɛ kwlakwla’n ɔ ngunmin w’a suan Biblu’n nun like naan w’a ɲan su ye’n, ɔ ti kekle man wɔ? Ɔ yo e kwlakwla e sɔ cɛn kunngun. Sanngɛ maan e bu ninnge nga e yo be titi’n be akunndan kan e nian. I wie yɛle wunnzinlɛ’n. Wunnzinlɛ’n fa blɛ yɛ ɔ fata kɛ e mian e ɲin naan y’a yo sɔ. Sanngɛ kɛ e ko wie wunnzin’n e wun kpaja e. I wafa kunngba’n, kɛ e suan Biblu’n nun like’n, e wun kwla kpaja e kpa kɛ ‘y’a fa nzue y’a wunnzin sa.’ (Efɛ. 5:26) Maan e fa e ɲin e sie i afɔtuɛ wie mɔ be kwla uka e’n be su:
Sie blɛ kun kɛ á fá súan like. “Ninnge nga be ti cinnjin kpa’n” m’ɔ fataman kɛ Klisifuɛ kun i ɲin kpa be su’n be nun kun yɛle Biblu’n nun like suanlɛ’n. (Fip. 1:10) Kɛ ɔ ko yo naan ɔ wla w’a fiman blɛ nga a sieli i kɛ á fá súan Biblu’n nun like’n su’n, klɛ i fluwa kun su, kpɛkun fa sie i lika kun mɔ a kwla wun i titi’n. Annzɛ kusu sie ɔ pɔɔtablu’n dɔ kun su naan kɛ dɔ sɔ’n ju’n ɔ kpɛn ɔ wla.
Bu like nga á yó naan ɔ ɲin w’a tran like nga a suan’n su’n i akunndan. Sran wie’m be kwla fa blɛ lɔun kpa be suan like. Sanngɛ wie’m be liɛ’n, andɛ’n be suan kan, i lika’n cɛn’n be suan kan ekun. ?Kɛ a niɛn i sa’n, oninfuɛ’n yɛ a kwla yo-ɔ? Kɛ á síe blɛ mɔ á fá súan like’n, bu i sɔ liɛ’n i akunndan. Sɛ blɛ nga a sieli i kɛ á fá súan like’n ju naan like suanlɛ yoman ɔ fɛ’n, a kwla fa miniti blu suan kan. Sɛ a yo sɔ’n, ɔ flunman tra kɛ w’a suanman like mlɔnmlɔn’n. Atrɛkpa’n, kɛ á wá bó i bo’n i fɛ m’ɔ́ yó wɔ’n ti’n, á kúnndɛ kɛ á súan like kɔ́ ɔ ɲrun kan ekun.—Fip. 2:13.
Dun mmua bu like nga á súan’n i akunndan sie. Sɛ blɛ nga á trán ase súan like’n, i nun yɛ a kunndɛ like nga á súan’n, a su kwlá faman ɔ blɛ’n yoman “ninnge nga be ti cinnjin’n.” (Efɛ. 5:16) Ninnge nga a kunndɛ kɛ á súan be su like’n, a kwla klɛ be fluwa kun su. Sɛ kosan wie o lɛ mɔ a kunndɛ kɛ á sí i su tɛlɛ’n, a kwla klɛ i fluwa su wie. Kɛ a ko wie like suan’n, a kwla klɛ ndɛ uflɛ wie mun sie. I liɛ’n cɛn uflɛ’n a kwla suan be su like.
Sɛ ɔ fata kɛ a kaci wafa nga a suan like’n, nán sisi ɔ bo. Cɛn’n nin dɔ nga a sieli i kɛ á fá suan like’n, ɔ nin ndɛ nga ɔ waan á súan su like’n be su ajalɛ nga a fali’n, sɛ ɔ fata kɛ a kaci be kan’n, nán sisi ɔ bo naan w’a yo sɔ. Afin like ng’ɔ ti cinnjin dan’n yɛle kɛ a suan like lemɔcuɛ kwlaa.
Sɛ a suan Biblu’n nun like lemɔcuɛ kwlaa’n, á ɲán su ye dan. Yɛle kɛ a nin Zoova amun afiɛn mántan kpa, á fá ajalɛ kpa, kpɛkun á ɲán wunmiɛn sú Ɲanmiɛn.—Zoz. 1:8.