Kosan’m be su tɛlɛ
◼ ?Kɛ é yó aɲia mun annzɛ kɛ é bó jasin fɛ’n, ɔ fata kɛ e nuan e selilɛli mun? ?Yɛ Biblu’n nun mmla benin mun yɛ ɔ fata kɛ e bu be akunndan ɔn?
“Like kwlakwla lɛ i yolɛ blɛ.” (Aku. 3:1): Selilɛli’m be yo maan sran’m be klɛ ndɛ ko man be wiengu, annzɛ be kan ndɛ kle be wiengu blɛ kwlaa nun kɛ be o likawlɛ sa. Sanngɛ blɛ wie’m be nun’n, ɔ fataman kɛ selilɛli’m be ti’n, Klistfuɛ’m be fa be ɲin sie i like uflɛ su. I wie yɛle e aɲia mun. Blɛ sɔ’m be nun’n e su Zoova, yɛ ɔ man e afɔtuɛ, kpɛkun e nin e niaan Klistfuɛ mun e wla e wiengu fanngan. (Mml. 31:12; Jue. 22:23; Rɔm. 1:11, 12) Ɔ maan kɛ e kɔ e aɲia’m be bo’n, sɛ e nuan e selilɛli’n, ɔ ti kpa. Sɛ aɲia’n wie’n, e kwla sɔ i nuan e nian ndɛ nga be klɛ blɛli e’n. Sɛ kusu sa cinnjin wie ti’n ɔ fata kɛ ɔ ka su’n, maan e to i amunle naan w’a kleman e wiengu’m be yalɛ.
‘An yo i kwlaa sɔ’n jasin fɛ’n ti.’ (1 Kor. 9:23): Ɔ ju wie’n, kɛ é bó jasin fɛ’n ɔ fata kɛ e fa e selilɛli’n. I wie yɛle kɛ aniaan ng’ɔ tinngɛ jasin bolɛ junman’n kwla fɛ i selilɛli’n di junman. I liɛ’n, ɔ kwla ti be ng’ɔ siesieli be jasin bowlɛ’n nun’n, be su ndɛ. Asa’n, jasin bofuɛ wie’m be fa be selilɛli’n be flɛ sran wie mɔ Ɲanmiɛn ndɛ’n loli i’n. Annzɛ be fa flɛ Biblu’n nun like suanfuɛ kun ka naan b’a ko niɛn i osu. I li sɛ sran sɔ’n i tranwlɛ’n o mmua’n, yɛ be yo i sɔ bɔbɔ’n niɔn. Sɛ kusu e selilɛli’n o e sa nun’n, maan e to i amunle naan kɛ é bó jasin’n é klé sran kun’n, w’a kpɛman e nuan ndɛ. (2 Kor. 6:3) Sɛ e su minndɛ e niaan’m be kɛ be bla naan e ko bo jasin fɛ’n, maan e ɲin tran jasin bolɛ’n ɔ nin e niaan nga be o lɛ’n be su. Sɛ e fa blɛ sɔ’n e flɛ sran uflɛ annzɛ e klɛ ndɛ e ko man be’n, ɔ timan klanman.
An bu amun wiengu’m be akunndan. (1 Kor. 10:24; Fil. 2:4): Nán maan e se kɛ sɛ e ka siɛn’n, e kwla flɛ aniaan mun annzɛ e kwla klɛ ndɛ ko man be ti naan é fá jasin bolɛ aɲia’n i bo kɔlɛ dɔ su’n é kánkán ngowa. Afin sɛ e ka siɛn’n, ɔ fata kɛ be siesie aniaan’m be uflɛ. Ɔ ti su kɛ like wie kwla tanndan e ɲrun. Ɔ maan cɛn kunngun e kwla ka siɛn. Sanngɛ sɛ dɔ su kɔlɛ’n yo e nzuɛn’n, é klé kɛ e ɲin yi ninnge nga Zoova siesieli’n naan e bu aniaan ng’ɔ tinngɛ jasin bolɛ junman’n, ɔ nin e niaan’m be kwlaa be sran.