Kosan’m be su tɛlɛ

◼ ?Sɛ aniaan bla kun su kle sran kun i Biblu’n nun like sran’n i anuan’n nun lɛ naan aniaan bian kun o lɛ’n, ɔ fata kɛ aniaan bla’n kɛtɛ i ti?

Sɛ aniaan bla kun su kle sran kun i Biblu’n nun like naan aniaan bian kun o lɛ’n, ɔ fata kɛ aniaan bla’n kɛtɛ i ti. (1 Kor. 11:3-10) Blɔfuɛ Sasafuɛ Tranwlɛ’n, afuɛ 2002 Zuie i le 15, i bue 27 nun’n, be klɛli i kɛ: “Biblu’n nun like klelɛ’n ti junman kun m’ɔ ti siesiewa ɔ. Ɔ ti kɛ aɲia’m be tinngɛlɛ’n sa. Ɔ maan sɛ aniaan bla kun nin aniaan bian kun mɔ b’a yo be batɛmu be su kle sran kun i like’n naan aniaan bla’n yɛ ɔ tinngɛ like klelɛ sɔ’n, ɔ fata kɛ ɔ kɛtɛ i ti.” Sɛ awlo lɔ yɛ be kle sran’n i like o, sɛ anuan’n nun lɛ o, annzɛ lika uflɛ o, maan aniaan bla’n kɛtɛ i ti.

Sanngɛ sɛ aniaan bla kun kle sran kun i Biblu’n nun like sran’n i anuan’n nun lɛ naan aniaan bian kun o lɛ’n, sɛ like suanlɛ sɔ’n nin a takaman kpa’n, ɔ nunman nun kɛ san fii ɔ kɛtɛ i ti. Sɛ bɔbɔ wafa nga e nin sran mun e suan Biblu’n nun like’n yɛ ɔ su yiyi nun’n, annzɛ sɛ ɔ nin i be su nian e Biblu’n i akua nga e fa kle sran’m be like’n be nun kun nun’n, like fi mianman aniaan bla’n kɛ ɔ kɛtɛ i ti. Kɛ be kle sran kun i Biblu’n nun like i anuan’n nun lɛ’n, like suanlɛ sɔ’n kaman lɛ takaman kpɛ kunngba. Kɛ é nían sran sɔ’n i osu flán nun’n, yɛ like suanlɛ’n taka ɔ. I sɔ’n ti’n, ɔ fata kɛ jasin bofuɛ’m be bu akunndan kpa naan b’a wun blɛ ng’ɔ nin i fata kɛ aniaan bla’n kɛtɛ i ti’n.