An nian Ɲanmiɛn nuan ijɔfuɛ’m be liɛ’n su: Mise
1. ?Atrɛkpa’n kosan benin yɛ Mise fa usɛli i wun ɔn? ?Yɛ ngue ti yɛ e kwla se kɛ ndɛ ng’ɔ kannin’n w’a kaman ngbɛn ɔn?
1 ‘?Cɛn benin li yɛ mɛn tɛ nga wíe ɔ?’ I nun mɔ Zoova seli i nuan ijɔfuɛ Mise kɛ ɔ bo Izraɛli nvle’n nin Zida nvle’n be jɔlɛ dilɛ’n i jɔ’n, atrɛkpa ɔ fali kosan kɛ ngalɛ’n sa’n fa usɛli i wun. Ndɛ nga Mise kɛnnin i nvle sɔ’m be su’n w’a kaman ngbɛn. Afuɛ 740 ka naan b’a wu Zezi’n, Ɲanmiɛn dili Samali klɔ’n i jɔlɛ kɛ nga ɔ fa kannin’n sa. Blɛ sɔ’n nun’n, nn Mise te o nguan nun. (Mis. 1:6, 7) Afuɛ 607 ka naan b’a wu Zezi’n, minniɛn wie’m be wa sacili Zerizalɛmu klɔ’n. (Mis. 3:12) ?Kɛ é mínndɛ kɛ Zoova di mɛn tɛ nga e o nun yɛ’n i jɔlɛ’n, wafa sɛ yɛ e kwla nian Mise i ajalɛ’n su ɔ?
2. ?Kɛ é mínndɛ Zoova i cɛn’n, wafa sɛ yɛ e kwla kle kɛ e tra e awlɛn ɔn? ?Yɛ ngue ti yɛ e tra e awlɛn ɔn?
2 Maan e tra e awlɛn: Mise klɛli i kɛ: “Min liɛ’n, Anannganman nyrun yɛ min nyin ta-a. Nyanmiɛn b’ɔ de min’n i su yɛ n lafi-ɔ. Min Nyanmiɛn’n ɔ́ tí min aniɛn.” (Mis. 7:7) Ndɛ sɔ mɔ Mise kannin’n kleman kɛ ɔ bubuli i sa nin i ja mun trannin su lele naan jɔlɛ dilɛ cɛn’n w’a ju. Ɔ ti Ɲanmiɛn nuan ijɔfuɛ. Ɔ maan ɔ fɛli i wun wlɛli i junman sɔ’n nun kpa. E kusu’n, kɛ é mínndɛ Zoova i cɛn’n, maan e ‘nzuɛn’n yo kpa, yɛ maan e fa e wun mantan Ɲanmiɛn.’ (2 Piɛ. 3:11, 12) Zoova i awlɛn m’ɔ tra’n ti’n, sran wie’m be kwla ɲan blɛ be kaci be nzuɛn’n. (2 Piɛ. 3:9) I sɔ’n ti’n, maan e nian Ɲanmiɛn nuan ijɔfuɛ’n i liɛ’n su. Yɛle kɛ maan e kusu e tra e awlɛn.—Zak 5:10.
3. ?Ngue ti yɛ ɔ fata kɛ e srɛ Zoova kɛ ɔ fɛ i wawɛ’n man e ɔ?
3 Maan e lafi Zoova i tinmin’n su: Mise lafili Zoova su naan w’a kwla di junman dan nga ɔ fa wlɛli i sa nun’n. (Mis. 3:8) Nán ngbɛn ti yɛ Zoova i Ndɛ’n se e kɛ e lafi Ɲanmiɛn su naan ɔ man e wunmiɛn’n niɔn. Be nga be leman wunmiɛn’n, Zoova man be wie naan b’a kwla di i junman’n. (Jue. 84:6, 8; Eza. 40:28-31) ?Ɲanmiɛn junman’n i dilɛ nun’n, amun wla kpɛn blɛ wie mɔ Ɲanmiɛn mannin amun wunmiɛn’n su? ?Yɛ amun srɛ Zoova titi kɛ ɔ fɛ i wawɛ’n uka amun?—Lik 11:13.
4. ?Ajalɛ benin yɛ Mise kle e ɔ?
4 I nun mɔ Mise te o nguan nun’n, ɔ fali Ɲanmiɛn i klun sa yolɛ’n sieli i like kwlaa ɲrun. Kannzɛ bɔbɔ i mantanfuɛ’m be yo sa tɛ’n, sanngɛ ɔ fuali kpa kɛ ɔ́ yó Ɲanmiɛn i klun sa’n. E blɛ liɛ nga nun’n, cɛn kwlaa Satan nin i mɛn’n nunfuɛ mun be kle e yalɛ. I sɔ’n ti’n, maan e fua kɛ ‘e liɛ nga e ko yo naan w’a jɔ Anannganman e Ɲanmiɛn’n i klun titi’n yɛ é yó ɔ.’—Mis. 4:5.