Maan e nin be nga e man be periodiki titi’n e bo Biblu’n nun like suanlɛ bo
1. ?Ngue ti yɛ anuannzɛ’n wla e fanngan kɛ e fa ajalɛ naan e fa periodiki mun e man sran wie mun titi ɔ?
1 Sran wie’m be nin e suanman Biblu’n nun like, sanngɛ be klo e fluwa mun kpa. I sɔ’n ti’n, anuannzɛ’n wla e fanngan kɛ e fa periodiki mun e man be titi. Wie liɛ’n, kɛ sran wie’m be kanngan e periodiki’m be nun lele’n, i sin’n be kunndɛ kɛ bé sí Ɲanmiɛn Ndɛ’n i kpa ekun. (1 Piɛ. 2:2) Ɔ ju wie kusu’n, kɛ be ko kanngan ndɛ wie nun m’ɔ yo be fɛ kpa’n, be kwla kunndɛ kɛ bé súan Biblu’n nun like.
2. ?Ngue yɛ e kwla yo naan be nga e fa periodiki mun e man be titi’n, b’a kunndɛ kɛ bé súan Biblu’n nun like ɔ?
2 Maan e ‘gua ndɛ nanwlɛ’n m’ɔ ti kɛ like mɔ be luali’n sa’n i su nzue’: Nán maan e se kɛ é fá periodiki mun é mán sran’n i ndɛndɛ naan é yáci i é kɔ́. Sanngɛ maan e nin i e koko yalɛ naan e wun yo i fɛ. I sɔ’n yó maan é sí ninnge nga be ti i cinnjin’n, ɔ nin like ng’ɔ lafi su’n, ɔ nin sa nga be o i su’n. I liɛ’n, é wún ndɛ ng’ɔ fata kɛ e kan’n. (Nya. 16:23) Maan e siesie e wun ka naan y’a wɔ i osu nianlɛ. Sɛ e ɲɛn i wun atin’n, maan e bo periodiki’n i nun ndɛ kun nin Biblu’n nun ndɛ mma ng’ɔ taka su’n be su kpe kan. (1 Kor. 3:6) Maan e klɛ cɛn nga e ko niannin sran’n i osu’n, ɔ nin fluwa nga e fa mɛnnin i’n e sie. Asa ekun’n, ndɛ nga e kokoli be su yalɛ’n, yɛ Biblu’n nun ndɛ mma nga e boli be su’n, maan e klɛ be e sie.
3. ?Anglo kun nun’n, kpɛ nɲɛ yɛ ɔ fata kɛ e ko nian be nga e man be periodiki titi’n be osu ɔ?
3 ?Kpɛ nɲɛ yɛ ɔ fata kɛ e ko nian be osu ɔ? Titi’n, kɛ periodiki’m be fite uflɛuflɛ’n, e ko man be wie. Ɔ maan sɛ é kwlá sé’n, e ko nian be osu kpɛ kunngba anglo kun nun. Sanngɛ sɛ e le blɛ’n, yɛ sɛ ndɛ’n lo sran’n i kpa’n, e kwla sin lɔ kpɛ sunman anglo kun nun. I wie yɛle kɛ sɛ e fa periodiki mun e mɛn i naan le mɔcuɛ kun annzɛ nɲɔn sin’n, e kwla sa e sin lɔ ekun. E kwla se i kɛ: “N kunndɛ kpa kɛ ń fá ɔ ɲin ń síe i ndɛ fɛ wie su. Ndɛ sɔ’n o fluwa nga n yacili i ɔ sa nun’n i nun.” I sɔ’n wlɛ́ i fanngan naan w’a kanngan fluwa sɔ’n nun. Sɛ w’a dun mmua kanngan nun’n, e nin i e kwla koko su yalɛ kan. Sɛ sran’n klo e fluwa wafa uflɛ’n, e kwla fa e fluwa nɲa, annzɛ fluwa pɛplɛpɛ annzɛ e fluwa nga e fa man sran mun anglo sɔ’n nun’n, e mɛn i.
4. ?Ngue yɛ e kwla yo naan e nin be nga e man be periodiki titi’n y’a kwla suan Biblu’n nun like ɔ?
4 Nán maan e minndɛ kɛ sran’n i bɔbɔ se e kɛ ɔ kunndɛ kɛ ɔ́ súan Biblu’n nun like. Maan e bɔbɔ e fɛ i wun ajalɛ. Kannzɛ e kannin Biblu’n nun like suanlɛ ndɛ laa naan w’a kplinman su’n, sanngɛ cɛn kunngun’n e kwla fɛ i ɲin sie i ndɛ akpasua nga be flɛ i “Biblu’n i su kosan’m be su tɛlɛ” m’ɔ o Sasafuɛ Tranwlɛ’n nun’n su. Kpɛkun maan e usɛ i sɛ ɔ kunndɛ kɛ e nin i e koko su yalɛ o. Atrɛkpa’n, e kwla bo Biblu’n nun like suanlɛ bo i anuan’n nun lɛ. Kannzɛ bɔbɔ w’a yoman ye’n, e kwla fa periodiki mun e mɛn i titi.