Maan e bo jasin fɛ’n i kpa tra laa: Sran nga e man be periodiki anglo kwlaa nun’n

?Ngue ti yɛ ɔ ti cinnjin ɔn? Sran wie’m be klo e periodiki’m be nun kannganlɛ. Sanngɛ be kloman kɛ e kle be Biblu’n nun like. Atrɛkpa’n, be klun jɔ be Ɲanmiɛn sulɛ wafa liɛ’n su, annzɛ be se be wun kɛ be leman blɛ. Sanngɛ kɛ be kanngan e periodiki’m be nun titi’n, wie liɛ’n, be kunndɛ kɛ bé sí Biblu’n i nun ndɛ’n i kpa ekun. (1 Piɛ. 2:2) E periodiki kun i nun ndɛ wie kwla wluwlu be wun kpa. Annzɛ kusu’n, sa wie ti’n, be akunndan’n kwla kaci. I sɔ’n ti’n, ɔ ti cinnjin kɛ e ko nian sran sɔ’m be osu cɛn kunngun. Sanngɛ nán maan e cɛ lɔ. Sɛ e yo sɔ’n, e wun yó be fɛ. Kpɛkun kɛ é kókó yalɛ’n, é wún like ng’ɔ ti be cinnjin’n. Ɔ maan, kɛ ɔ́ kɔ́ i ɲrun’n, be kwla kplin su kɛ e kle be Biblu’n nun like.

?Wafa sɛ yɛ é yó i sɔ ɔ?

Anglo kwlaa nun’n, maan e fa fluwa Sasafuɛ Tranwlɛ’n nin Réveillez-vous ! e ko man sran’n. I sin’n, e kwla sin lɔ e ko niɛn i osu cɛn kunngun. I liɛ’n, e kwla kan periodiki nga e fa mɛnnin i’n, be nun ndɛ kan e kle i. Annzɛ e kwla fa fluwa nga e fa man sran mun anglo sɔ’n nun’n e mɛn i. Like nga e sunnzun kɛ e nin sran’n é kókó su yalɛ cɛn uflɛ’n, ɔ nin ninnge nga e sieli be nzɔliɛ’n, maan e klɛ e sie.—An nian fluwa Ɲanmiɛn Sielɛ Blɛ junman afuɛ 2014, Zanvie anglo’n i bue 3 su’n nun.
Maan e siesie e wun kpa. Yɛle kɛ nán maan ɔ yo sran’n i periodiki’m be fa manlɛ ngbɛn. Sanngɛ maan e nin i e koko yalɛ naan e wun yo i fɛ. I liɛ’n, Ɲanmiɛn Ndɛ’n i su yalɛ kokolɛ’n kwla yo i fɛ.
Sɛ e ɲɛn i wun atin’n, maan e kle sran’n i Biblu nun like. Wienun ɔn, ɔ kunndɛ kɛ ɔ́ sí ndɛ nga Biblu’n kɛn i sa kun su’n. Sɛ ɔ ti sɔ’n, maan e fa fluwa nga e fa kle sran’m be Biblu’n i nun like’n, be nun kun e mɛn i. Kpɛkun, maan e koko ndɛ sɔ’n i su yalɛ. Kwlaa naan y’a srɛ atin’n, maan e usɛ i ndɛ nga e kokoli su yalɛ’n i su kosan uflɛ, kpɛkun e se i kɛ cɛn uflɛ’n é tɛ́ kosan sɔ’n su. Sɛ e nin sran kun e koko Biblu’n annzɛ fluwa nga e fa kle sran’m be Biblu’n nun like’n be nun kun i su yalɛ titi’n, ɔ ti sran’n i Biblu’n nun like klelɛ. E kwla fa fluwa Jasin fɛ e man sran’n, kpɛkun e kle i wafa nga e kle sran’m be Biblu’n nun like’n. Annzɛ kusu’n, e kwla fa video ?Ngue ti yɛ Biblu’n nun like suanlɛ’n ti cinnjin ɔn? annzɛ ?Wafa sɛ yɛ e kle sran’m be Biblu’n nun like ɔ? e kle sran’n. Atrɛkpa’n, laa ɔ kplinman su kɛ ɔ́ súan Biblu’n nun like. Sanngɛ i akunndan kwla kaci. I sɔ’n ti’n, nán e sa sin bubu e.

Anglo nga nun’n, maan e yo nga e nian:

Sran kwlaa nga e sunnzun kɛ é fá periodiki mun é mán be titi’n, maan e klɛ be dunman’n. I sin’n, maan e fa periodiki uflɛuflɛ mun e man be. Yɛ maan e se be kɛ sɛ periodiki uflɛ fite’n, é mán be wie ekun.