Maan e fa periodiki nga be fiteli w’a cɛ’n e bo jasin fɛ’n
Sɛ periodiki nga be fiteli w’a cɛ’n be te o asɔnun’n i fluwa siewlɛ lɔ’n, annzɛ sɛ e gua be blo’n, be kwlá yoman sran fi ye. I sɔ’n ti’n, ɔ fata kɛ e mian e ɲin e fa periodiki sɔ mun e man sran mun. Afin be nun ndɛ’m be kwla yo be fɛ. Ɔ maan bé bó flɛ́ Zoova. (Rɔm. 10:13, 14) Ajalɛ nga e kwla fa naan y’a fa periodiki sɔ mun y’a di junman’n, be nun wie mun yɛ:
Kɛ é bó jasin fɛ’n lika nga e taman jasin bo’n be nun’n, e kwla fa periodiki kun e wlɛ i be nga be nunman lɛ’n be anuan’n bo. Maan e wlɛ i kpa naan be nga bé sín’n b’a wunmɛn i.
Kɛ é bó jasin loto fawlɛ’m be nun’n, maan e usa be nga be o lɛ’n. Sɛ be kunndɛ kɛ e man be fluwa’n, maan e fa periodiki sɔ mɔ be fiteli w’a cɛ’n e kle be naan be nian nun fa nga be klo’n.
Sɛ e kɔ lika kɛ dɔɔtrɔ sa’n be nun naan lika sɔ’n o e jasin bowlɛ’n nun’n, maan e yaci periodiki nga be fiteli w’a cɛ’n kan sran’m be tran minndɛ lɛ’n. Sanngɛ ɔ fata kɛ sran ng’ɔ le lika’n annzɛ sran ng’ɔ nian lika su’n man e atin ka. Sɛ e wun kɛ periodiki wie’m be o lɔ laa’n, ɔ fataman kɛ e fa wie ekun uka su.
Kɛ é síesíe e wun naan y’a ko nian sran kun i osu’n, maan e bu like ng’ɔ ti i cinnjin’n i akunndan. ?Ɔ le i bɔbɔ i awlobo? ?Ɔ klo ajalɛ tulɛ? ?Ɔ klo flɛli’m be lika nianlɛ? I sin’n, maan e niannian e periodiki nga be fiteli w’a cɛ’n be nun. Atrɛkpa’n, é wún ndɛ wie m’ɔ́ yó i fɛ ɔ. Kpɛkun kɛ e kɔ i osu nianlɛ’n, maan e fa ndɛ sɔ’n e kle i.
Ɔ ju wie’n, Ɲanmiɛn ndɛ’n yo sran wie fɛ. Sanngɛ kɛ e kɔ i osu nianlɛ’n, e tomɛn i. Cɛn nga e to i’n, maan e fa periodiki nga be fiteli w’a cɛ m’ɔ nin a ɲanman be’n e kle i.