“Maan e fa periodiki ng’ɔ o e sa nun w’a cɛ’n annzɛ fluwa pɛplɛɛplɛ wafa kun ng’ɔ o e sa nun’n, e man sran nga ndɛ’n yo i fɛ’n”

Anglo nga e fa fluwa Biblu’n kle e man sran mun’n be nun’n, e mian e ɲin e ka e ja nun lɛ e kle be fluwa sɔ’n i nun like. Sɛ kusu sran’n dun mmua le fluwa Biblu’n kle naan w’a kplinman su kɛ e nin i e suan like’n, “maan e fa periodiki ng’ɔ o e sa nun w’a cɛ’n annzɛ fluwa pɛplɛɛplɛ wafa kun ng’ɔ o e sa nun’n, e man sran nga ndɛ’n yo i fɛ’n.” ?Ngue ti ɔ?

Periodiki ng’ɔ o e sa nun w’a cɛ’n ɔ nin fluwa pɛplɛɛplɛ wafawafa’m be nun ndɛ’m be te kwla yo sran mun be ye kpa. Fluwa sɔ’m be nun like wie kwla kan sran’m be awlɛn’n. I ti’n, kɛ é síesíe e wun é kó bó jasin fɛ’n, maan e fa periodiki ng’ɔ o e sa nun w’a cɛ’n ɔ nin fluwa pɛplɛɛplɛ wafawafa mun e wla e pata’n nun. Sɛ e leman wie’n, e kwla ko to aniaan bian ng’ɔ nian fluwa’m be su’n naan ɔ man e wie. Sɛ sran nga e to i’n ɔ le fluwa Biblu’n kle naan w’a kplinman su kɛ e nin i e suan like’n, e kwla fa fluwa sɔ mun e kle i, naan ɔ fa nga ɔ klo i’n. I sin’n, maan e nin i e tie e wun aniɛn naan e sa e sin e ko niɛn i osu. Atrɛkpa’n e nin i é kwlá bó like suanlɛ’n bo.