Maan e uka be nga be siman kanngan kpa’n

1. ?Ngue ti yɛ be nga kannganlɛ’n ti kekle man be’n be like klelɛ timan pɔpɔ ɔ?

¹ Sran wie’m be kwla kunndɛ kɛ bé sí Ɲanmiɛn ndɛ’n. Sanngɛ kɛ mɔ be siman Biblu’n nin e fluwa’m be nun kanngan ti’n, be sa sin kwla bubu be. Ɔ maan sɛ i klikli’n nun’n, e fa e fluwa Biblu’n kle e fa man sran sɔ mun’n, atrɛkpa’n Biblu’n nun like suanlɛ’n su yoman ye. ?Yɛ e yo sɛ naan y’a uka be? E usali jasin bofuɛ wie mun mɔ be sa w’a tɔ jasin bolɛ’n nun’n be ngwlɛlɛ afɛ. Jasin bofuɛ sɔ’m be fin nvle fanunfanun 20 tra su nun. Be ndɛ nga be kannin’n yɛ ɔ o yɛ.

2. ?Fluwa benin mun yɛ be kwla uka be nga be siman kanngan kpa’n annzɛ be siman kanngan mlɔnmlɔn’n niɔn?

² Sɛ sran’n siman kanngan kpa’n annzɛ ɔ siman kanngan mlɔnmlɔn’n, e kwla fa e fluwa pɛplɛɛplɛ Amun tie Ɲanmiɛn ndɛ’n annzɛ Amun tie Ɲanmiɛn ndɛ’n naan amun a ɲan nguan tititi e bo i Biblu’n nun like klelɛ bo. Etazini lɔ atin bofuɛ kun fa fluwa nɲɔn sɔ mun kle sran mun. Kpɛkun ɔ se be kɛ be nian nun fa nga be klo’n. Betɛli ng’ɔ wo Kenia lɔ’n seli kɛ, kɛ be fa fluwa sɔ’m be bo jasin fɛ’n, ɔ ba nvlɛ. Afin sran ble’m be mɛn’n nun’n, kɛ be yiyi ndɛ’n nun tɛɛn’n, ɔ yo sran’m be fɛ tra kɛ be usa be kosan naan be tɛ su’n. Be nga be si fluwa’n, be liɛ’n, be kwla klo kɛ bé kánngan fluwa’n nun naan be usa be kosan naan be tɛ su. Sanngɛ be nga be siman fluwa’n be klomɛn i sɔ liɛ’n kpa. Sɛ sran’n si kanngan kpa’n, jasin bofuɛ wie’m be fa fluwa pɛplɛɛplɛ Jasin fɛ kpa kun fin Ɲanmiɛn!, annzɛ Amun kwla yo Ɲanmiɛn i janvuɛ! annzɛ Biblu’n nun ndɛ’m be kpɔlɛ bolɛ fluwa’n be bo i Biblu’n nun like klelɛ bo.

3. ?Ngue yɛ ɔ fata kɛ e wun i wlɛ naan y’a kwla uka be nga siman kanngan mun ɔn?

³ Amun yo be mo: Ɲannzuɛn kwla kun be nga be siman kanngan’n. Kpɛkun be nun kpanngban be bu i kɛ be nunman sran nun. I sɔ’n ti’n, sɛ e wun yo be fɛ’n, bé klwá sɔ́ Ɲanmiɛn ndɛ’n nun klanman. Asa ekun’n, be nga be siman kanngan’n be nun kpanngban be si ngwlɛlɛ kpa. Sɛ be suan like’n be sí i. I sɔ’n ti’n, maan e ɲin yi be, yɛ e bu be sran. (1 Piɛ. 3:15) Sɛ e se be kɛ be ɲin mɔ be mian be suan Biblu nun like’n, ɔ su kaman ngbɛn, naan be su wun Ɲanmiɛn ndɛ’n i wlɛ kɔ́ be ɲrun’n, i sɔ’n wlá be fanngan. I sɔ’n ti’n, nán amun yaci be mo yolɛ.

4. ?Wafa sɛ yɛ e kwla wla be nga siman kanngan kpa’n be fanngan kɛ be siesie be wun kpa ɔ?

⁴ Kannzɛ like suanfuɛ’n siman kanngan kpa’n, sanngɛ maan e wlɛ i fanngan kɛ ɔ siesie i wun kpa kwlaa naan y’a bo like suanlɛ’n bo. Afriki di Sidi lɔ jasin bofuɛ wie’m be wla like suanfuɛ’m be fanngan kɛ be se be osufuɛ annzɛ be janvuɛ kun m’ɔ si kanngan kpa’n kɛ ɔ uka be. Angle lɔ jasin bofuɛ kun fɛ i fluwa nga i bɔbɔ jajali nun’n fa man i Biblu’n nun like suanfuɛ mun. Kpɛkun be koko ndɛ kpɔlɛ ko ju nɲɔn kun su yalɛ. Ɔ yo sɔ naan like suanfuɛ’m be wun i wlɛ kɛ, kɛ be jaja fluwa’n nun’n, kosan’m be su tɛlɛ’n yoman ya. Ɛndi lɔ aniaan bian kun liɛ’n, like nga ɔ nin like suanfuɛ’n bé wá wún i le mɔcuɛ ng’ɔ́ bá lɔ’n nun’n, ɔ wlɛ i fanngan kɛ ɔ nian i nun desɛn mun naan ɔ bu be su akunndan.

5. ?Kɛ é klé like’n, wafa sɛ yɛ e kwla tra e awlɛn ɔn?

⁵ Maan e tra e awlɛn: Kannzɛ fluwa nga like suanfuɛ’n suan nun like’n ti sɛ ti sɛ’n, maan e fɛ i ɲin e sie i ndɛ cinnjin’m be su. Kpɛkun maan e uka be naan be wun ndɛ cinnjin sɔ’m be wlɛ kpa. I bo bolɛ’n nun’n, sɛ like suanlɛ’n di miniti 10 annzɛ 15 kun’n, ɔ ti kpa. Nán maan e se kɛ é kókó ndɛ kpɔlɛ kpanngan su yalɛ. Sɛ cɛn kun e kɔ naan e yo kan’n, ɔ ti kpa sɔ. Yɛ sɛ like suanfuɛ’n i nuan bliman kannganlɛ’n nun kpa’n, maan e tra e awlɛn i wun. Kɛ ɔ́ kɔ́ i ɲrun m’ɔ́ kló Zoova kpa’n, atrɛkpa’n i nuan blí kannganlɛ’n nun trá laa’n. Kɛ ɔ ko yo naan i kɔnvi w’a sɔ i sɔ yolɛ’n, amun yiɛ i ndɛndɛ kɛ ɔ bla aɲia’m be bo.

6. ?Wafa sɛ yɛ e kwla kle sran’m be kannganlɛ ɔ?

⁶ Sɛ Biblu’n nun like suanfuɛ’m be suan kannganlɛ’n, bé kɔ́ be ɲrun Ɲanmiɛn sulɛ’n nun. (Jue. 1:1-3) I sɔ’n ti’n, kɛ jasin bofuɛ wie’m be wie sran’n i like kle’n, be fa blɛ kan be nin i be nian fluwa An fa kannganlɛ nin like klɛlɛ yo amun junman nun. Sanngɛ, sɛ ɔ nin i sɔ’n ngba’n like suanfuɛ’n i sa sin bubu i’n, maan e wlɛ i fanngan naan ɔ lafi i wun su. E kwla kan like trele kun m’ɔ suannin m’ɔ wun i wlɛ siɛn’n, i ndɛ kle i. Maan e se i kɛ ɔ fa wlɛ i srɛlɛ’n nun, naan sɛ ɔ miɛn i ɲin’n, Zoova yrɛ́ i su. (Nya. 16:3; 1 Zan 5:14, 15) Angle lɔ jasin bofuɛ wie’m be wla be like suanfuɛ’m be fanngan kɛ be fa ninnge wie mun sie be ɲrun kɛ bé yó. I klikli’n nun’n, be se be kɛ be suan ndɛ mma’m be kannganlɛ kunngunngun. Kpɛkun i sin’n, be fa Biblu’n nun ndɛ mma wie mun man be kɛ be kanngan nun. Kɛ ɔ́ kɔ́ i ɲrun’n, be kanngan fluwa nga be nun kannganlɛ’n ti pɔpɔ’n be nun. Blɛ sunman’n, sɛ e waan é úka sran mun’n, ɔ fataman kɛ e kle be kannganlɛ’n ngunmin. Sanngɛ maan e wla be fanngan naan be klo fluwa nun kannganlɛ.

7. ?Ngue ti yɛ ɔ fataman kɛ e sisi e bo naan y’a kle be nga be siman kanngan’n, be Ɲanmiɛn ndɛ’n niɔn?

⁷ Zoova bu be nga be siman fluwa’n be sran. (Zɔb 34:19) Kɛ sran kun i awlɛn’n fa ti’n yɛ Zoova nian ɔn. (1 Nyo. 28:9) I sɔ’n ti’n, nán e sisi e bo naan y’a kle be nga be siman kanngan’n, be Ɲanmiɛn ndɛ’n. E le fluwa kpanngban mɔ e kwla fa bo sran’m be like klelɛ bo ɔ. Kpɛkun atrɛkpa’n, kɛ ɔ́ kɔ́ i ɲrun’n, e kwla fa e fluwa Biblu’n kle e kle be like naan b’a wun Ɲanmiɛn ndɛ’n i wlɛ kpa ekun.