Maan e fa “like kpa” e sɔ e niaan’m be nun (Mat. 12:35a)

E kwlaa e kunndɛ kɛ é yó ‘aklunyefuɛ.’ Yɛle kɛ é fá “like kpa” é sɔ́ e niaan’m be nun. (Rɔm. 12:13) I sɔ yolɛ’n ti asɔnun kpɛnngbɛn’m be cinnjin. Ɔ maan kɛ be yia ijɔfuɛ aofuɛ kun’n, be fa ajalɛ naan ɔ nin aniaan wie wlu awlo. Kpɛkun be fa ajalɛ naan asɔnun’n tuɛ i loto kpa’n. Ɔ fata kɛ e tinuntinun e sɔ e niaan’m be nun. Sanngɛ atrɛkpa’n, e kwla se e klun lɔ kɛ e sa nun yoman fɛ. Ɔ maan sran nun sɔlɛ’n kwla yo e kɛnsrɛn kan. Sɛ ɔ ti sɔ’n, maan e wla kpɛn ndɛ nga Zezi kan kleli Marti’n su. (Lik 10:39-42) Zezi i ndɛ’n kle kɛ, kɛ e sɔ e niaan’m be nun’n, like nga e kwla yo’n ‘i nun kpafuɛ’n’ yɛle kɛ e nin be e tran klanman yɛ e wla e wun fanngan. Nán sran’n i aliɛ kpanngban manlɛ’n annzɛ kusu sua’n i klanman yolɛ’n yɛ ɔ ti cinnjin ɔn. Sɛ e nanti afɔtuɛ nga Zezi mannin’n su’n, e kwlaklwa e kwla fa “like kpa” e sɔ e niaan’m be nun kɛ Ɲanmiɛn Ndɛ’n fa kan’n sa.​—3 Zan 5-8.